ԿԱՐՃ ԼՈՒՐԵՐ

‹‹Փշրված պատրանքի մի գիշեր››՝ Մհեր Մկրտչյան արտիստական թատրոնում (տեսանյութ)

24.03.2017 00:00 ՄՇԱԿՈՒՅԹ ԱԶԴԱԳՐԵՐ
‹‹Փշրված պատրանքի մի գիշեր››՝ Մհեր Մկրտչյան արտիստական թատրոնում (տեսանյութ)

Մհեր Մկրտչյանի անվան արտիստական թատրոնում մարտի 25-ին կկայանա թատրոնի գեղարվեստական ղեկավար, ռեժիսոր ՄՀԵՐ ՄԿՐՏՉՅԱՆԻ հեղինակած ‹‹Փշրված պատրանքի մի գիշեր›› բեմադրության առաջնախաղը՝ Գագիկ Մադոյանի ռեժիսուրայով: Ներկայացման գլխավոր հերոսուհուն մարմնավորած դերասանուհի ԱՆԻ ԽԱՉԻԿՅԱՆՆ «Իրավունքի» հետ զրույցում պատմեց, որ հիմքում կին-տղամարդ հարաբերություններն են՝ իրենց խնդիրներով ու բարդույթներով. «Փորձել ենք ներկայացնել հարաբերություններ,որոնց կառուցման ընթացքը բերում հանգեցնում է մի բանաձեւի՝ անկեղծ լինելու ու միմյանց լսելու պարզ կարողության, եւ որ ամեն բան հնարավոր է հաղթահարել,միայն պետք է ցանկություն եւ ամենակարեւորը՝ սեր»:

«Սա ուղղակի անիմաստ միջոցառում է». Մհեր Մկրտչյան

 Ներկայացման մեջ գլխավոր պրոդյուսերի կերպարը մարմնավորած ԱՐԾՐՈՒՆ ՉՈԲԱՆՅԱՆԻ կարծիքով, հանդիսատեսը կհեռանա թատրոնից իր քայլերի համար պատասխանատու լինելու հոգեվիճակով. «Կարծում եմ՝ հանդիսատեսը կտեսնի կնոջը սիրող, հավատարիմ ամուսին: Հանդիսատեսն իր հետ թատրոնից կտանի անկեղծ լինելու և ընտանիքի առաջ պատասխանատու  լինելու հոգեվիճակ»:

Պիեսի գործողությունները տեղի են ունենում հյուրանոցի համարում, որտեղ գլխավոր հերոսներ՝ պրոդյուսեր Արթուրը եւ նրա կինը՝ Մերին, իրենց ամուսնական առաջին գիշերն են անցկացնում: Մերիին, սակայն, հանգիստ չեն տալիս անցյալում կատարված իրադարձությունները, որոնց մասին ամուսինը չգիտի: Ամուսնու հետ վերջապես անկեղծանալու նրա փորձը ձախողվում է Արթուրի ընկերոջ անհաջող կատակի պատճառով. կեսգիշերին նրանց սենյակ է ներխուժում դերասանուհի Մագդալենան, որը ֆիլմում գլխավոր դեր ստանալու համար պատրաստ է գիշեր անցկացնել Արթուրի հետ: Ստեղծված դրությունից դուրս գալն ուղեկցվում է հեղինակի և ռեժիսորի կողմից տրված հետաքրքիր լուծումներով՝ համեմված հումորով և անկեղծությամբ:

ԼԻԼԻԹ ԵՂԻԱԶԱՐՅԱՆ

 

 

КОМСОМОЛЬСКАЯ ПРАВДА