o C     08. 08. 2020   : :

ԿԱՐՃ ԼՈՒՐԵՐ

Ով հիմա «ազգային» բառն է օգտագործում, կրակի մեջ է ընկնում. ինչու էր Արթուր Վարդանյանը գնացել ԱԱԾ 

26.06.2020 18:57 ՕՐՎԱ ՊԱՏԿԵՐ ՔԱՂԱՔԱԿԱՆ ԹԵՄԱ
Ով հիմա «ազգային» բառն է օգտագործում, կրակի մեջ է ընկնում. ինչու էր Արթուր Վարդանյանը գնացել ԱԱԾ 

«Իրավունքի» ունեցած տեղեկությունների համաձայն, «Բեւեռների միացում» ազգային հասարակական կազմակերպության հիմնադիր-ղեկավար ԱՐԹՈՒՐ ՎԱՐԴԱՆՅԱՆԸ երեկ ինքնակամ գնացել էր ԱԱԾ: Խնդիրն այն է, որ «Բեւեռների միացում» նորաբաց ՀԿ-ի գրասենյակը, կարծես թե, հայտնվել է Ազգային անվտանգության ծառայության ուշադրության կենտրոնում։ Տեղի ունեցածի մասին մանրամասները փորձեցինք պարզել հենց Ա. Վարդանյանից:

Եթե կա որեւէ մեկը, որ պետք է հեռանա զբաղեցրած պաշտոնից, դա Դուք եք պարոն Թորոսյան. Թեհմինա Վարդանյան

– Պարոն Վարդանյան, ինչո՞ւ էիք գնացել ԱԱԾ եւ ի՞նչ է կատարվում «Բեւեռների միացում» նախաձեռնության գրասենյակի շուրջ:

– Ինձ տեղեկացրեցին, որ որոշ մարդիկ ԱԱԾ-ի անվան տակ եկել են ու նկարահանել մեր գրասենյակի տարածքը, հարցուփորձ են արել շրջակա խանութների տերերին եւ մարդկանց, ովքեր ապրում են հարակից շենքերում, ժամերով մնացել են եւ արձանագրել, թե ովքեր են գալիս, ովքեր են անցնում այդ փողոցով: Մասնավորապես` հարցրել են, թե ովքեր են այստեղ իրականացնում «հականիկոլական» գործունեություն, տեսե՞լ  եք «հականիկոլական» որեւէ անձի, ինչո՞ւ է գրասենյակի պատշգամբից դրոշ կախված, ի՞նչ իրավունքով...

– Խոսքը` Եռագույն դրոշի մասի՞ն է:

– Այո: Բացի այդ, մի քանի շաբաթ առաջ էլ հարեւանները տեղեկացրեցին, որ գիշերվա ժամը` մոտ 01:00-ին մի աղջիկ ու տղա փորձել են ներխուժել գրասենյակ, բայց նրանց չի հաջողվել, որովհետեւ հարեւանները ձայնի վրա դուրս են եկել, եւ նրանք անմիջապես նստել են մեքենա եւ հեռացել են: Սա պատահականություն չի կարող լինել, ուստի` անձամբ գնացել եմ ԱԱԾ, որպեսզի պարզեմ, թե ինչ է տեղի ունենում: Նրանք փաստացի ինձ անմիջապես ճանաչեցին, քանի որ 4 տարի կալանավորված եմ եղել հենց ԱԱԾ-ի «պադվալներում»: Գնացել էի հարցնելու, թե ի՞նչ իրավասություն ունեն նման գործողությունների:

– Այսինքն` հաստատեցի՞ն, որ ԱԱԾ-ից են եկել ու հարցուփորձ արել Ձեր գրասենյակի մասին:

– Ո՛չ հերքեցին, ո՛չ հաստատեցին: Իմ անունից գրավոր հարցում ներկայացրեցի, որպեսզի պարզաբանում ստանամ անմիջապես ԱԱԾ տնօրեն Արգիշտի Քյարամյանից: Հարցումս ուղղված է անձամբ իրեն, թե ինչ էին փնտրում` հարցուփորձ անելով հասարակ քաղաքացիներին, որոնք ապրում են իրենց կյանքով եւ ոչ մի տեղեկատվության չեն էլ տիրապետում: Մարդկանց անգամ հարցրել են, թե այստեղ սոցցանցերում «հականիկոլական ֆեյքեր» ունեցող մարդիկ կա՞ն, թե` ոչ: Սա հատկապես զավեշտալի է, որովհետեւ գրասենյակում մենք նույնիսկ համակարգիչ չունենք, թուղթ ու գրիչով ենք աշխատում: Հաշվի առնելով այն, որ մենք մեկ ամիս է, ինչ գործունեություն ենք իրականացնում, ինձ համար շատ տարօրինակ է, որ այսօր մեր Ազգային անվտանգությունն ավելի կարեւոր գործեր թողած` մեր կազմակերպությունով է զբաղվում: Կարծում եմ` ավելի լուրջ գործերով պետք է զբաղվել, որը վերաբերում է մեր ազգային անվտանգությանը:

– Իսկ ԱԱԾ-ում բացատրեցի՞ն, թե ինչ է նշանակում «հականիկոլական գործունեություն»:

– Ոչ մի պատասխան չտվեցին, միայն ասացին, որ շատ սեղմ ժամկետում կաշխատեն պարզաբանել եւ անպայման պետք է հարցում անեն ԱԱԾ երեւանյան գրասենյակին,  որպեսզի ճշտեն, թե օրենքի ո՞ր կետերի հիման վրա է այս ամենն իրականացվում: Եթե դու հասարական կազմակերպություն ես բացում, պետությունը պարտավոր է օժանդակել եւ աջակցություն ցույց տալ, ինչն օրենքով ամրագրված է: Մենք նույնիսկ այդ օժանդակությունը չենք ուզել: Սեղմ պայմաններում, մեր անձնական գումարներով, ոչ մեկից ոչինչ չխնդրելով, գրանտ չվերցնելով` փորձում ենք մեր գործունեությունն իրականացնել: Եթե նույնիսկ սա է անհանգստացնում որոշ ուժերի, ուրեմն` պետք է պարզաբանեն, թե ինչու, որովհետեւ սա օրենքի եւ իրավունքի կոպիտ խախտում է: 

– Այնուամենայնիվ, կարծում եք, որ հենց ԱԱԾ աշխատակիցնե՞րն են հետաքրքրված գրասենյակի գործունեությամբ:

– Թեպետ նրանք ո՛չ հաստատեցին, ո՛չ հերքեցին, բայց զարմացած եմ, մի քիչ` հիասթափված: Եթե հաստատեն, կցանկանայի իմանալ դրա իրավասության աստիճանը, իսկ եթե հերքեն, նշանակում է, որ քրեական օրենսգրքով հանցագործութուն է եղել, որովհետեւ ԱԱԾ-ի անունից գործունեություն է իրականացվել, մարդկանց վրա ճնշում է գործադրվել: Եթե սա եղել է ինչ-որ մարդկանց կողմից, ովքեր փորձում են սադրիչ քայլեր իրականացնել, ապա շատ հետաքրքիր է, թե ովքեր են նրանք: Իսկ եթե ԱԱԾ-ն է եղել, էլի եմ ասում` իրենք ոչ թե պետք է զբաղվեն հկ-ներով, կուսակցություններով, սովորական մարդկանց հետապնդելով, այլ ազգային անվտանգությամբ: 

– Եթե ոչ ԱԱԾ-ականներն, ապա ովքե՞ր կարող էին հետաքրքրվել Ձեր գրասենյակով եւ նման հարցեր ուղղել քաղաքացիներին: 

– Միգուցե ադրբեջանական ուժերն են եղել, որովհետեւ մենք հայտարարել ենք, որ յուրաքանչյուր ապազգային ուժ, ով կփորձի վնասել մեր հայրենիքին, մեր ազգին, փորձելու ենք ատամներով պաշտպանել մեր հայրենիքն ու մեր ազգին: Սա գուցեեւ անհանգստացրել է մեր թշնամիներին եւ նրանց գաղտնի կազմակերպություններից են եղել, որովհետեւ առնվազն տարօրինակ է ինձ համար, թե ով Հայաստանում կարող էր հարցնել` ի՞նչ իրավունքով են եռագույն դրոշը դրել: Սա ի՞նչ է նշանակում, կուզենամ եռագույն դրոշը ձեռքիս ման կգամ փողոցով, ոչ ոք ինձ ոչինչ չի կարող ասել, սա իմ իրավունքն է` որպես հայ, որպես ՀՀ քաղաքացի:

– ԱԱԾ-ում որեւէ կերպ անդրադարձ եղե՞լ է «Բեւեռների միացում» ՀԿ-ի գործունեության վերաբերյալ:

– Վերջին երկու օրվա ընթացքում կան անուղղակի զգուշացումներ, թե մարդիկ անհանգստացած են Ձեր գործունեությունից: Ինչո՞ւ, չեմ կարողանում հասկանալ: Միգուցե նրա համար, որ մենք կարողանում ենք հեղինակություն ձեռք բերել, քանի որ մաքուր ենք` ո՛չ գրանտներ ենք ստանում, ո՛չ ընդդիմություն ենք, ո՛չ իշխանական ուժ ենք, այլ սովորական հասարական կազմակերպություն ենք, որը զբաղված է ազգային սոցիալ- մշակութային վերլուծական գործունեությամբ: Բայց մեզ արդեն որերորդ անգամ ասում են` զգո՛ւյշ եղեք, ով հիմա «ազգային» բառն է օգտագործում, կրակի մեջ է ընկնում: Բայց չէ՞ որ մենք ազգային պետություն ենք ու չպետք է «ազգային» բառից խորշենք եւ հետապնդենք այն մարդկանց, ովքեր առաջնորդվում են ազգային գաղափարախոսությամբ: Ես ընդամենը ցանկանում եմ, որ իսկապես ունենանք իրավական մի պետություն, ազգային պետականություն, որտեղ քաղաքական ու հասարական գործիչները, հասարակ գյուղացին ու բանվորը, իրավաբանն ու լրագրողը եւ յուրաքանչյուր ոլորտի մարդ չվախենա իր երկրում ապրելուց, իր երկրում դրոշ ծածանելուց եւ ազգային գործունեություն իրականացնելուց: Մեր երկիրը շրջապատված է թշնամիներով եւ անուղղակի ու ուղղակի ձեւով բազմաթիվ ուժեր փորձում են մեր պետականությանը վնաս հասցնել, ուստի`  յուրաքանչյուրիս պարտքն է մեր լուման ներդնել մեր պետության, մեր հայրենիքի համար, ոչ թե թողնենք ու հեռանանք եւ գա մի պահ, երբ հետ կնայենք ու կտեսնենք, որ այլեւս հայրենիք չունենք: 

ՀՐԱՆՏ ՍԱՐԱՖՅԱՆ

Հ.Գ.- «Բեւեռների միացում» ազգային սոցիալ-մշակութային վերլուծական ՀԿ-ի գործունեության մասին, կարող եք ստորեւ ներկայացված Ա. Վարդանյանի հարցազրույցից:

 

КОМСОМОЛЬСКАЯ ПРАВДА