ԿԱՐՃ ԼՈՒՐԵՐ

Սերժ Սարգսյանի վերաբերյալ քրեական գործը ենթակա է կարճման. Փաստաբանը միջնորդություն է ներկայացրել

15.01.2020 14:19 ՕՐՎԱ ՊԱՏԿԵՐ ՔԱՂԱՔԱԿԱՆ ԻՐԱՎՈՒՆՔ ԹԱՎՇՅԱ ՏԵՌՈՐ
Սերժ Սարգսյանի վերաբերյալ քրեական գործը ենթակա է կարճման. Փաստաբանը միջնորդություն է ներկայացրել

ՀՀ երրորդ նախագահ Սերժ Սարգսյանին վերաբերող քրեական գործով օրինականությունը պահպանելու դեպքում այն ենթակա է անհապաղ կարճման։ Այս մասին «Փաստինֆո»-ի հետ զրույցում ասել է փաստաբան Ամրամ Մակինյանը։ 

Գեորգի Կուտոյանի կողմից ֆինանսական խնդիրներ ունենալու վերաբերյալ որևէ փաստական տվյալներ չեն ստացվել. ՔԿ

Նշենք, որ հունվարի 14-ին ավարտվել է քրեական գործի նյութերին ծանոթանալու համար կողմերին տրված ժամկետը։ «Փաստինֆո»-ի հետ զրույցում ՀՀ երրորդ նախագահի պաշտպան Ամրամ Մակինյանն ասաց, որ ծանոթացել են քրեական գործի ողջ նյութերին, որի ընթացքում հաստատվել է իր այն համոզմունքը, որ Սերժ Սարգսյանին մեղսագրված արարքի մասին փաստող ապացույցներ գործում առկա չեն ։

«Քրեական գործում շատ հետաքրքիր բաներ կան, որոնք արդեն իսկ մեր ձեռքի տակ են, որոնց մասին պարբերաբար կտեղեկացնենք հանրությանը։ Վարույթն իրականացնող մարմնի ուշադրությունը հրավիրել ենք, որ այդ պայմաններում առավել քան ակնհայտ է՝ պարոն նախագահի նկատմամբ քրեական հետապնդումը պետք է դադարեցվի և քրեական գործի վարույթը կարճվի»,-նշեց Ամրամ Մակինյանը`ընդգծելով. «քրեական գործում չկան թե՛ Սերժ Սարգսյանին մեղադրելու բավարար հիմքեր, թե՛ նրա նկատմամբ խափանման միջոց նշանակելու բավարար հիմքեր, թե՛ գույքի վրա կալանք դնելու բավարար հիմքեր»։

Վերջինս տեղեկացրեց՝ նախաքննության փուլում միջնորդել էին վարույթն իրականացնող մարմնին նշանակել համապատասխան համալիր փորձաքննություն.

«Այս քրեական գործում կա տարբեր բնագավառների մասնագետների մասնագիտական եզրակացության անհրաժեշտություն։ Իհարկե, վարույթն իրականացնող մարմինը շատ լավ հասկանում է, որ այդ փորձաքննության արդյունքներն ուղղակի կփլուզեն այս քրեական գործը, ինչի համար էլ մերժում է առանց հիմնավորելու»,-նշեց Ամրամ Մակինյանը՝ հավելելով՝ քրեական գործի նյութերն ուսումնասիրելուց հետո վերահաստատում են փորձաքննություն նշանակելու իրենց դիրքորոշումը։ Պաշտպանը գտնում է՝ քննիչի գիտելիքները բավարար չեն այդպիսի բարդ փորձաքննության եզրակացության վերաբերյալ կարծիք կազմելու համար։ Ամրամ Մակինյանը պնդում է՝ երեք բնագավառի փորձագետ ներգրավելու անհրաժեշտություն կա. «Քննիչն այդ երեք համապատասխան, հատուկ մասնագիտական գիտելիքներ ունեցող փորձագետների ներգրավման անհրաժեշտություն չի տեսել և նշել է, որ քրեական գործով իբրև թե հավաքված տեղեկությունները բավարար են, սակայն քննիչը չէր կարող գնահատել։ Օրինակ այդ մեկը ֆինանսատնտեսական բնագավառի շատ բարդ վերլուծությունների արդյունքում կարող է եզրահանգումներ անել»,-հավելեց Ամրամ Մակինյանը։

«Փաստինֆո»-ի հարցին, թե որքանով է նախաքննության ընթացքում ապահովվել քրեական դատավարության օրենսգրքով սահմանված անկողմնակալ քննության պայմանները, այն է՝ բազմակողմանիությունը, օբյեկտիվությունն ու լրիվությունը՝ Ա.Մակինյանն արձանագրեց, որ չի ապահովվել ո՛չ օբյեկտիվությունը, ո՛չ բազմակողմանիությունը և ո՛չ լրիվությունը։ «Այս քրեական գործով նախաքննությունն իրականացվել է նպատակահարմարության սկզբունքով։ Այսինքն այդպիսի նպատակահարմարություն է եղել, որի արմատները քննչական ծառայությունում չեն»,-նշեց Ամրամ Մակինյանը։

Հարցին՝ արդյոք հնարավոր է այս հարցով դիմեն ՄԻԵԴ, Ամրամ Մաիկնյանն ասաց. «Մենք օրենքով չարգելված բոլոր միջոցներով իրականացնելու ենք պարոն նախագահի պաշտպանությունը»,-ասաց փաստաբանը։

Ավելի վաղ տեղեկացրել ենք, որ դեկտեմբերի 4-ին ՀՀ երրորդ նախագահ Սերժ Սարգսյանին մեղադրանք է առաջադրվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով։ Ըստ նախաքննական մարմնի՝ զբաղեցնելով ՀՀ նախագահի պաշտոնը, նա իր պաշտոնեական դիրքն օգտագործելով, 2013 թվականին կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489.160.310

ՀՀ դրամի հափշտակության կատարումը: Երրորդ նախագահի նկատմամբ որպես խափանման միջոց է ընտրվել ստորագրություն՝ չհեռանալու մասին։

Փաստաբան Ամրամ Մակինյան հայտարարել էր, որ չի հաղթահարվել Սերժ Սարգսյանի գործառութային անձեռնմխելիությունը և բողոք էր ներկայացրել դատախազություն՝ պահանջելով դադարեցնել Սերժ Սարգսյանի նկատմամբ քրեական հետապնդումը, ինչը դատախազությունը մերժել էր։ Այնուհետև բողոք ներկայացվեց նաեւ Երևանի ընդհանուր իրավասության դատարան, սակայն դատարանը՝ դատավոր Մնացական Մարտիրոսյանի նախագահությամբ, գտել էր, որ ՀՀ երրորդ նախագահի գործառութային անձեռնմխելիության հարցը քննարկումը դատական վերահսկողության տիրույթից դուրս է։

 

КОМСОМОЛЬСКАЯ ПРАВДА