ԱՐՈՆՅԱՆԻ ԱՆՀԱՋՈՂ ԽԱՂԱՓՈՒԼԸ ԿԱԼԿԱԹԱՅՈՒՄ
Արխիվ 16-20Հնդկաստանի Կալկաթա քաղաքում անցկացվող արագ եւ կայծակնային խաղի Tata Steel Chess India Rapid & Blitz մրցաշարի շրջանակներում տեղի են ունեցել կայծակնային խաղի առաջին շրջանի 9 պարտիաները: Հայկական շախմատի առաջատար Լեւոն Արոնյանը անհաջող է հանդես եկել:
Այսպես, Արոնյանը պարտվել է հնդիկներ Պենտալա Հարիկրիշնային եւ Վիշվանաթան Անանդին, հոլանդացի Անիշ Գիրիին, ամերիկացի Հիկարու Նակամուրային, աշխարհի չեմպիոն, նորվեգացի Մագնուս Կարլսենին, ռուսաստանցի Յան Նեպոմնյաշչուն, ոչ-ոքի խաղաց հնդիկ Գուջրատի Վիդիտի եւ ամերիկացի Ուեսլի Սոյի հետ: Հայ գրոսմայստերը հաղթել է միայն չինացի Դին Լիրենին եւ 27 հնարավորից 11 միավորով նախավերջին տեղում է: Ավելի վատ արդյունք ունի միայն Վիդիտը՝ 10 միավոր: Առաջատարը Մագնուս Կարլսենն է՝ 21,5 միավոր: Նոյեմբերի 26-ին տեղի կունենան պատասխան պարտիաները: Հաղթողը հայտնի կդառնա արագ եւ կայծակնային խաղի արդյունքների հանրագումարում: Tata Steel Chess India-ն Grand Chess Tour-ի նախավերջին փուլն է: Իսկ Grand Chess Tour-ի եզրափակիչը կմեկնարկի դեկտեմբերի 2-ին Լոնդոնում: Իսկ Զագրեբի գրոսմայստերական շրջանային մրցաշարին մասնակցող Հրանտ Մելքումյանը կարեւոր հաղթանակներ տոնեց 5-րդ եւ 6-րդ տուրերում: 5-րդ տուրում Մելքումյանը սպիտակներով առավելության հասավ Կոժուլ Զդենկոյի նկատմամբ, իսկ 6-րդում սեւերով հաղթեց Ռոբերտ Զելչիչին: 6 տուրից հետո Մելքումյանը, Վասիլի Իվանչուկը, Ռագեր Մարկուսը եւ Մարին Բոսիոչիչը 4-ական միավորով գլխավորում են աղյուսակը: ԱՄՆ Սենթ Լուիս քաղաքում ավարտվեց Winter Chess Classic միջազգային մրցաշարը: A մրցաշարում հաջող հանդես եկավ ԱՄՆ ներկայացնող մեր հայրենակից Սամուել Սեւյանը, ով 9 հնարավորից վաստակեց 5 միավոր եւ կիսեց 2-5-րդ հորիզոնականները: Լրացուցիչ ցուցանիշների հաշվարկից հետո Սեւյանը հայտնվեց 3-րդ տեղում: 5,5 միավորով մրցաշարի հաղթող դարձավ ԱՄՆ ներկայացուցիչ Ջեֆֆրի Սյունը: Հովհաննես Գաբուզյանը 3,5 միավորով գրավեց 9-րդ, իսկ Վարուժան Հակոբյանը 3 միավորով՝ 10-րդ հորիզոնականը: B մրցաշարում Մելիքսեթ Խաչիյանը 5 միավորով գրավեց 5-րդ հորիզոնականը, իսկ Տիգրան Հարությունյանը 4,5 միավորով զբաղեցրեց 6-րդ տեղը: 6,5 միավորով մրցաշարի հաղթող դարձավ Էմիլիո Կորդոբան: Փոխարենը՝ նվաճումներով աչքի են ընկնում մեր ավագ սերնդի շախմատիստները: Հայկական շախմատի լեգենդներից Ռաֆայել Վահանյանը նվաճել է Ռումինիայի մայրաքաղաք Բուխարեստում ավարտված վետերանների աշխարհի չեմպիոնի կոչումը: 68-ամյա Ռաֆայել Վահանյանը հանդես է եկել 65+ տարիքային խմբում եւ 11 հնարավորից վաստակել է 8,5 միավոր: