ՀԱՅ ՇԱԽՄԱՏԻՍՏՆԵՐԸ ՄՏՆՈՒՄ ԵՆ ԹԻՄԱՅԻՆ ՊԱՅՔԱՐԻ ՄԵՋ ԵՎՐՈՊԱՅԻ ԱՌԱՋՆՈՒԹՅՈՒՆՈՒՄ

Վրաստանի Բաթումի քաղաքում մեկնարկել է շախմատի Եվրոպայի թիմային առաջնությունը: Հայաստանի հավաքականի կազմն այսպիսին է՝ Լեւոն Արոնյան, Գաբրիել Սարգսյան, Հրանտ Մելքումյան, Հայկ Մ. Մարտիրոսյան, Արման Փաշիկյան: Կանանց թիմում Զավեն Անդրիասյանի գլխավորությամբ կխաղան Էլինա Դանիելյանը, Սիրանուշ Ղուկասյանը, Լիլիթ Մկրտչյանը, Մարիա Գեւորգյանը եւ Աննա Մ. Սարգսյանը:

Կանցկացվի 9 տուր: Առաջնությունը կավարտվի նոյեմբերի 2-ին: Առաջին տուրում Հայաստանի հավաքականը կմրցի նորվեգացիների հետ, կանանց Հայաստանի թիմի մրցակիցը կլինի Ֆինլանդիան: Հիշեցնենք, որ օրեր առաջ Լեւոն Արոնյանին այդպես էլ չհաջողվեց աշխարհի չեմպիոնի տիտղոսի հավակնորդների մրցաշարի ուղեգիր նվաճել: Մեն կղզում անցկացված FIDE Chess.com Grand Swiss շախմատի միջազգային մրցաշարի ավարտական՝ 11-րդ տուրում Արոնյանը ոչ-ոքի խաղաց աշխարհի գործող չեմպիոն Մագնուս Կառլսենի հետ եւ վաստակած 7,5 միավորով լրացուցիչ գործակիցների հաշվարկով գրավեց 4–րդ տեղը: Արոնյանը 27660 դոլար պարգեւավճար ստացավ: Նույն ժամանակահատվածում Հայաստանի մեկ այլ ներկայացուցիչ իր հաշվին հասցրեց եւս մեկ նվաճում գրանցել: Պորտուգալիայում անցկացված XXI Torneio Internacional da Cela մրցաշարում գրոսմայստեր Կարեն Գրիգորյանը 8 հնարավորից վաստակել է 8 միավոր եւ գրավել առաջին տեղը: Մրցաշարին մասնակցել է 7 երկրի 41 շախմատիստ: Գրիգորյանն այս տարի արդեն երրորդ հաղթանակն է տանում Պորտուգալիայում բացարձակ արդյունքով: Իսկ Հնդկաստանի Նյու Դելի քաղաքում ընթացող մինչեւ 20 տարեկանների շախմատի աշխարհի առաջնությունը մոտենում է վերջնագծին: Մրցաշարի ավարտից երկու տուր առաջ Շանթ Սարգսյանն ու Արամ Հակոբյանը հավակնում են առաջնության գլխավոր պարգեւներին: 9-րդ տուրում Շանթ Սարգսյանը հաղթեց ռուսաստանցի Սերգեյ Դրիգալովին ու վաստակեց 6,5 միավոր: Նույնքան միավոր ունի նաեւ Արամ Հակոբյանը, որը հաշտություն կնքեց իսրայելցի Օր Բրոնշտեյնի հետ: Մեր շախմատիստները մեկ միավորով են հետ մնում մրցաշարի միանձնյա առաջատար, ուկրաինացի Եվգենի Շտեմբուլյակից: Տուրը հաղթական էր նաեւ Արթուր Դավթյանի համար, ում մրցակիցն իսրայելցի Յոավ Միլիկովն էր: Արսենի օգտին 5,5 միավոր է գրանցված: Աղջիկների մրցաշարում Մարիամ Ավետիսյանը պարտության մատնեց հնդիկ Դեհանկար Մրուդուլին ու վաստակեց 5,5 միավոր: Մարիամը 2,5 միավորով է հետ մնում առաջատարից:

ՔՐԻՍՏԻՆԵ ՊԵՏՐՈՍՅԱՆ

Այս թեմայով Լեւոն Քոչարյանը եւս երաշխավորություն ներկայացրեց՝ Աշոտյանի խափանման միջոցի փոփոխության համար Շիրինյան-Սաֆարյան «միջնորդական առաքելությունն» ավարտվել է ֆիասկոյով Լեւոն Դռնոյանի որդիները գուժում են հոր մահվան մասին «Մենք ու Մունք». տեղի կունենա հայկական ջազի եւ շախմատի երեկո Գերեվարվել է գեներալ-լեյտենանտ Լեւոն Մնացականյանը