Ֆրանսահայերը կարողացան բոյկոտել ադրբեջանական «Խոջալուի ցեղասպանություն» միջոցառումները
Արխիվ 16-20Փարիզի Սուրբ Օստաշ եկեղեցում փետրվարի 26-ին ադրբեջանցիները Խոջալուի ցեղասպանություն անվան տակ իրականացրել են համերգ-ակցիա: Ֆրանսիայի հայկական կազմակերպությունների համակարգող խորհրդի «Նոր սերունդ» կազմակերպության երիտասարդները հակաքարոզով բոյկոտել են ադրբեջանական միջոցառումը: «Իրավունքը», կապ հաստատելով Ֆրանսիայի հարավում հայկական կազմակերպությունների համակարգող խորհրդի համանախագահ ԿԱՐԵՆ ԽՈՒՐՇՈՒԴՅԱՆԻ հետ, պարզեց, որ Ադրբեջանն ամեն տարի Եվրոպայում նման ակցիաներ է իրականացնում եւ ապատեղեկատվություն տարածում, որոնց հակահայկական ակցիաները տեղի հայերը մշտապես բոյկոտում են:
««ՄԵՐ ՀԱՅՐԵՆԻՔԸ» ԵՐԳԵԼՈՎ, ՏԵՐՈՒՆԱԿԱՆ ԱՂՈԹՔՈՎ ԲՈՅԿՈՏԵՑԻՆ»
- Ադրբեջանցիների կողմից Եվրոպայում «Խոջալուի ցեղասպանություն» անվան տակ իրականացվող, ապատեղեկատվություն տարածող այդ ակցիաները ֆինանսավորվում են անմիջապես ադրբեջանական կառավարության կողմից: Նրանք ամեն անգամ ընտրում են տարբեր քաղաքներ: Բայց օրինակ` Մարսելում դա անհնար է իրականցնել, որովհետեւ համայնքը շատ մեծ է, եւ կարող են միտինգներ անել իրենց դեմ: Այս տարի նրանք այդ ակցիան իրականացրին Փարիզի Սուրբ Օստաշ եկեղեցում, որը Ֆրանսիայի հայկական կազմակերպությունների համակարգող խորհրդի «Նոր սերունդ» կազմակերպության երիտասարդները «Ղարաբաղը մերն է» վանկարկումներով ու ՀՀ օրհներգը` «Մեր հայրենիքը» երգելով, տերունական աղոթքով բոյկոտեցին: Այդ առթիվ արդեն բաց նամակներով դիմել ենք Ֆրանսիայի կաթոլիկ եկեղեցու բարձրաստիճան պաշտոնյաներին, նաեւ այդ եկեղեցու եպիսկոպոսական կարգին, որպեսզի այսուհետ նմանատիպ միջոցառումներ եկեղեցու միջոցով չիրականացվեն Ֆրանսիայում: Որպեսզի կաթոլիկ հոգեւորականները ուշադրություն դարձնեն դրան, եւ այսուհետ արգելվեն նմանատիպ միջոցառումները եկեղեցում: Հասկանալի է` իրենք խորը չուսումնասիրելով` կարծել են, թե ցեղասպանություն է, աղոթքով օգնենք նրանց, բայց իրականում դա քաղաքական թերություն է: Ի դեպ, բացահայտեցինք, որ Ֆրանսիայի Լիոն քաղաքը մտադրված է ապակենտրոնացված հարաբերություն սկսել Ադրբեջանի հետ` փոխքաղաքապետի եւ Ադրբեջանի դեսպանի հետ հանդիպումից հետո: Դրա դեմ մեծ ակցիաներ ենք նախապատրաստում:
- Կարեն, Ֆրանսիայի նախագահ Էմանուել Մակրոնը, վերջերս Ֆրանսիայի հայկական կազմակերպությունների համակարգող խորհրդի ամենամյա ճաշկերույթի ընթացքում հայտարարեց, որ ապրիլի 24-ը Ֆրանսիայում հռչակվելու է Հայոց ցեղասպանության հիշատակի պաշտոնական օր, ինչը բուռն ընդունվեց Թուրքիայի կողմից:
- Այո, դա տեղի ունեցավ Ֆրանսիայի հարավում հայկական կազմակերպությունների համակարգող խորհրդի` իմ համանախագահ ընտրվելուց օրեր առաջ, ¥ես Անի Ստեփանովի հետ եմ ղեկավարում խորհուրդը¤: Ֆրանսիայում ապրող բոլոր հայերը ապրիլի 24-ը նշում էին որպես հիշատակի օր, սակայն պետությունը դրան որպես այդպիսին մասնակցություն չէր ունենում: Բայց Մակրոնի հայտարարությունից հետո ֆրանսիական բոլոր նահանգապետերն ու քաղաքապետարանները մասնակից պետք են լինեն ապրիլի 24-ի Հայոց ցեղասպանության հիշատակման օրվան: Բայց Բորդոյի նախկին քաղաքապետ Ալեն Ժյուպեն, ով հադիսանում է Բոսֆորի կոմիտեի անդամ եւ վճարվում է թուրքական մեծ գործարարների կողմից, նշանակվեց Սահմանադրական խորհրդի անդամ, դեմ է այդ օրենքին: Նաեւ սենատում ֆրանս-թուրքական ընկերակցության նախագահ Ժակ Մեզարը, ով ստորագրահավաք էր կազմակերպել սենատում, որպեսզի չեղարկվի այդ օրենքը: Նրանք միացան Սահմանադրական խորհրդի նախագահ Ժան Լուի Դբրեին, ով եւս դեմ է մեր պահանջած օրենքին: Սա մեզ համար իհարկե անկանոն իրավիճակ է ստեղծում սահմանադրական խորհրդում, ուստի մեր խորհուրդը բաց նամակով դիմեց Ֆրանսիայի նախագահին եւ հանրությանը` չեղարկելու այդ երկու անձերի սահմանադրական խորհուրդ մտնելը: Մենք արգելում ենք թուրք պրոպագանդան Ֆրանսիայում, չի կարող թուրքամետ քաղաքականություն վարող անձ ներգրավվել երկրի բարձրագույն դեմոկրատական գագաթում: Պետք է Ֆրանսիայի կառավարությունը, պառլամենտը եւ պատգամավորները ուշադիր լինեն, որպեսզի նման անձինք տեղ չունենան այնտեղ: Այնուամենայնիվ, մեր խորհուրդը ամեն հնարավոր ջանք կներդնի, որպեսզի Հայոց ցեղասպանության մերժողականության քրեականցման օրենքը ընդունվի Ֆրանսիայի պառլամենտի ու սենատի կողմից: Այդ ուղղությամբ պետք է հստակ քաղաքական լոբբինգ իրականացնենք, հատուկ մեխանիզմներ ենք մշակել որպեսզի կարողանանք հասնել մեր նպատակներին: Այո, ճիշտ եք. Է. Մակրոնի այդ հայտարարությանը, բնականաբար, հաջորդեց Թուրքիայի սադրիչ եւ անպատիվ խոսքերը՝ ուղղված Մակրոնին: Վստահ ենք, որ մինչեւ ապրիլի 24-ը այդ օրը Ֆրանսիայում պաշտոնապես կընդունվի որպես պետական օր:
«ՊԵՏՔ Է ՄԵՐ ՏԱՐԱԾՔՆԵՐԸ ՊԱՀՊԱՆԵԼՈՒ ՀԱՄԱՐ՝ ՊԱՏՐԱՍՏ ԼԻՆԵՔ ՊԱՏԵՐԱԶՄԻ»
- Ձեր ղեկավարած Ֆրանսիայի հայկական կազմակերպությունների համակարգող խորհուրդը որքանո՞վ է հետամուտ լինում Արցախի հարցին, քանի որ Հայաստանում խաղաղության նախապատրաստելու կոչեր են արվում, իսկ սահմանի մյուս կողմում դիրքերն են ամրացնում:
- Մեր երկրորդ մեծ քայլը Արցախի հարցն է: Այն հսկայական միլիարդները, որն Ադրբեջանի կառավարությունը ծախսում է՝ զինամթերք ձեռք բերելու համար, մեզ սարսափելի անհանգստություն է պատճառում: Այդ ուղղությամբ քայլեր ենք ձեռնարկում, որպեսզի դատապարտենք այն պետություններին, որոնք Ադրբեջանին զենք են վաճառում, ընդ որում, առաջնահերթ՝ ֆրանսիային: Ի դեպ, Է. Մակրոնը այդ ճաշի ժամանակ ասաց, որ այո, մենք վաճառում են զենք Ադրբեջանին, բայց ոչ այնպիսի զենք, որն օգտագործվի Հայաստանի եւ Արցախի դեմ: Ֆրանսիայում կան հատուկ պետական չեզոք կազմակերպություններ, որոնցից պաշտոնական տվյալներ ենք խնդրելու, թե կոնկրետ ինչ զենք է վաճառում Ֆրանսիան` Ադրբեջանին, որից հետո պատրաստվում ենք ակցիա անել այդ ամենի դեմ: 2016 թվականին Իսրայելը հայտարարեց, որ Բաքվին պետք է վաճառի 4 միլիարդ 850 մլն դոլար արժողությամբ ռազմամթերք: Այդ առնչությամբ եւս մենք պատրաստվում ենք մեծ գործունեություն իրականացնել, փորձելու ենք՝ Ֆրանսիայում հրեական համայնքի ուշադրությունը հրավիրել եւ իրենց միջնորդությամբ ճնշում գործադրել Իսրայելի նկատմամբ, որպեսզի դադարեցնի Ադրբեջանի համար զենքի վաճառքը: Սա շատ կարեւոր է, քանի որ ամեն ինչ սկսվում է զինվածությունից: Դրա համար պատրաստվում ենք բողոքի ակցիա անել Իսրայելի հյուպատոսության առաջ: Իսկ ինչ վերաբերում է խաղաղությանը, ապա գերտերությունները փորձում են անել այնպես, որպեսզի Արցախի հարցը խաղաղ ճանապարհով ընթանա: Բայց դրան հակառակ, Թուրքիայի նախագահ Ռեջեփ Էրդողանը խոսում է եւ պահանջում, որպեսզի Հայաստանը հետ վերադարձնի այսպես կոչված գրավված հողերը: Պարզապես պետք է ամեն վայրկյան մտածենք, որ վաղը կարող է պատերազմ սկսվել: Պետք է զգոն լինենք, չլճանանք այն մտքի մեջ, թե խաղաղություն է լինելու: Իհարկե, եթե խաղաղություն լինի, շատ լավ, բայց պետք է քաղաքականապես եւ գործով մեր տարածքները պահպանելու համար՝ պատրաստ լինենք պատերազմի, որովհետեւ ով զենք է գնում, ուրեմն նպատակ ունի այն գործածելու: Պետք է գերտերությունների, Մինսկի խմբի ուշադրությունը հրավիրենք այս իրավիճակին, որ Արցախը նորից դառնա բանակցային կողմ: Այդ մասին արդեն ասել ենք Ֆրանսիայի նախագահին, որը Մինսկի խմբի անդամ է, ու փորձում ենք նրա միջոցով մեր ձայնը լսելի դարձնել:
Զրուցեց ԼԻԼԻԹ ԵՂԻԱԶԱՐՅԱՆԸ