Հայաստանի ազգային ֆիլհարմոնիկը ներկայացնում է հայ երիտասարդ  երաժիշտներին

 Այսօր Արամ Խաչատրյան համերգասրահում կկայանա ՀԱՖՆ-ի եւ տաղանդավոր ջութակահարուհի, բազմաթիվ  միջազգային փառատոնների մասնակից՝ տասնութամյա ՍՈՖՅԱ ՎԱՐԴԱՆՅԱՆԻ  համատեղ համերգը, դիրիժոր ՌՈՒԲԵՆ ԱՍԱՏՐՅԱՆԻ ղեկավարությամբ:

Համերգն անցկացվում է Հայաստանում Ֆրանկոֆոնիայի երկամսյակի շրջանակներում: Ծրագրում ընդգրկված են ֆրանսիացի եւ հայ կոմպոզիտորների ստեղծագործություններ, դրանց թվում. Բեռլիոզի «Բեատրիչե եւ Բենեդիկտ» օպերայի նախերգանքը, Միրզոյանի «Ինտրոդուկցիա եւ անընդհատ շարժում»՝ ջութակի եւ նվագախմբի համար գործը, Ռավելի «Գնչուհի» կոնցերտային ռապսոդիան՝ ջութակի եւ նվագախմբի համար եւ Ֆրանկի Սիմֆոնիան (ռե մինոր):

ՀԱՖՆ-ը, մաեստրո Թոփչյանի գլխավորությամբ, հետեւողականորեն հանրությանն է ներկայացնում հայ տաղանդավոր երիտասարդ երաժիշտ-կատարողներին: Վերջիններս, չնայած իրենց երիտասարդ տարիքին, հասցրել են լավագույնս ներկայանալ երաժշտական միջազգային ասպարեզում՝ հնարավորություն տալով մեր երկրին հպարտությամբ կանգնել դասական հարուստ ավանդույթներ ունեցող երաժշտական գերտերությունների կողքին:

Սոֆյան, չնայած իր երիտասարդ տարիքին (18 տարեկան), արդեն երրորդ անգամ է հանդես գալիս ՀԱՖՆ-ի հետ: Առաջին անգամ նվագախմբի հետ ելույթ է ունեցել 2012թ.-ին՝ Բեթհովենի «Ռոմանսի» կատարմամբ (դիրիժոր՝ Հարություն Արզումանյան), իսկ 2016-ին՝ Բախի Կրկնակի կոնցերտի կատարմամբ (դիրիժոր՝ Էդուարդ Թոփչյան):  Այսօր նա հանդես կգա Էդվարդ Միրզոյանի «Ինտրոդուկցիա եւ անընդհատ շարժում» ջութակի եւ նվագախմբի համար եւ Ռավելի «Գնչուհի» կոնցերտային ռապսոդիայի կատարմամբ:

Սոֆյա Վարդանյանը ծնվել է 1999-ին Երեւանում` երաժիշտների ընտանիքում: Ջութակ սկսել է նվագել յոթ տարեկանից: Ավարտել է Չայկովսկու անվան ՄՄԵԴ-ը, սովորել է պրոֆ. Ալեքսանդր Կոսեմյանի (2007-2014) եւ պրոֆ. Արտաշես Մկրտչյանի (2014-2017-ին) դասարաններում: 2017-ի սեպտեմբերից Սոֆյա Վարդանյանը սովորում է Detmold Musik Hochschule-ում (Գերմանիա)՝ պրոֆ. Մարիա-Էլիզաբեթ Լոթի դասարանում: