Գրքի երեւանյան փառատոնը նպատակ ունի ամրապնդել գրող-հրատարակիչ-ընթերցող կապը

Երեկ Երեւանում մեկնարկեց  Գրքի երեւանյան առաջին փառատոնը`«Yerevan Book Fest», որ անցկացվում է առաջին անգամ եւ նպատկ ունի ընթերցողին ավելի ճանաչելի դարձնել հայ ժամանակակից գրականությունը, ամրապնդել գրող-հրատարակիչ-ընթերցող կապը եւ ավելի հասանելի դարձնել նոր հրատարակությունների մասին եղած տեղեկատվությունը: Գրքի փառատոնին մասնակցում են 27 հրատարակչություն, գործելու է գրքի ցուցահանդես-տոնավաճառ եւ գրքի տաղավարներում լինելու են մինչեւ 30 % զեղչեր:
ՀՀ մշակույթի փոխնախարար ՆԵՐՍԵՍ ՏԵՐ-ՎԱՐԴԱՆՅԱՆԻ խոսքով` գրքի փառատոնը վաղուց հասունացած անհրաժեշտություն էր հայ մշակութային կյանքում. «Մենք վաղուց կարիք ունեինք այսպիսի տոնի` գրականություն ստեղծողների, այն տարածողների եւ պարզապես ընթերցողների համար: Կարծում եմ` փառատոնն ունի բոլոր նախադրյալները հետագայում վերածվելու ամենամյա միջազգային հարթակի»,-փառատոնի բացաման ժամանակ նշեց Ներսես Տեր-Վարդանյանը:
Հայաստանի գրողների միության անդամ, բանաստեղծ ՀՈՒՍԻԿ ԱՐԱՅԻ խոսքով`ողջունելի է ցանկացած նմանատիպ միջոցառում, որը տալիս է դրական, բայց ոչ մեծ արդյունքներ. «Եթե մարդիկ չցանկանան ընթերցել, ապա դրա վրա որեւէ ազդեցություն չի կարող ունենալ փառատոնը, նրանք գրքին չեն մոտենա, կանցնեն կողքով, բայց չեն մոտենա: Սխալ է, որ ասում են ոչինչ չեն անում, անում են, բայց այլ բան է, որ մարդը ի սկզբանե չի ցանկանում ընթերցել, քանի որ 25-30 տարի այս երկրում եղավ գրողի ու գրքի արժեզրկում: Ի վերջո մարդկանց մեջ պետք է գրքի ու գրականության նկատմամբ ձեւավորվի մշակույթ»,-«Իրավունքի» հետ զրույցում նշեց բանաստեղծը եւ նկատեց, որ անցել է Խորհրդային Միության տարիների ընթերցող սերունդը եւ այսօր ձեւավորվում է ընթերցող նոր սերունդ. «Երիտասարդները ընթերցում են, ճիշտ է, մեծ չէ նրանց թիվը, բայց կան: Կան որ գնողունակ չեն, բայց գիտեմ, որ ուսանողներն իրենց ընկերների ծննդյան օրը գիրք են նվիրում, բայց ամբողջ կուրսն այդ գիրքը կարդում է, վերջում միայն փոխանցում հոբելյարին: Չնայած, Հայաստանում գիրքը թանկ չէ, բայց մարդիկ չեն կարող 3 կամ 5 հազար դրամով գիրք ձեռք բերել»,-ընդգծեց Հուսիկ Արան:
Փառատոնի ընթացքում ներկայացված գրքերի ու հեղինակների բազմազանության մեջ բանաստեղծը խորհուրդ տվեց ընթերցել Գրիգոր Խանջյանի «Տուր ձեռքդ պստլո» վեպը, որը նրա կարծիքով շատ բան կարող է տալ ընթերցողին:

Գրքի երեւանյան փառատոնը կազմակերպել է «Միհր» ստեղծագործողների միությունը, աջակցողը Մշակույթի նախարարությունն է: Նախագիծը, բացի արդեն իրենց տեղն ունեցող գրողներին ներկայացնելը, հավակնում է բացահայտել նաև տաղանդավոր սկսնակ գրողների եւ նպաստել նրանց առաջխաղացմանը. «Գրքի երեւանյան փառատոնը գալիս է լրացնելու այն բացը, որը կա ժամանակակից հայ գրականության հանրահռչակման գործում: Վստահ եմ Գրքի եռօրյա փառատոնի մասին դեռ երկար ենք խոսելու, քննարկելու եւ ամենակարեւորը հիշելու» - փաստեց «Միհր»-ի նախագահ ՇՈՂԱԿԱԹ ՄԼՔԵ-ԳԱԼՍՏՅԱՆԸ:  

Նշենք, որ փառատոնի ընթացքում ընթերցանության սրահում փառատոնի գրական մրցույթի մասնակից հեղիանկները կարդացին իրենց ստեղծագործությունները: Նրանց ան­տիպ գործերի մրցույթն էլ  նախագծի հիմնական մասն է։   Փառատոնի շրջանակում հայտարարվել էր մրցույթ. մասնակցության հայտ էին ներկայացրել բոլոր ցանկացողները՝ առանց տարիքային սահմանափակման, ստացվել էր 133 հայտ։ 
Երեւանյան գրքի փառատոնի երեք օրերի ընթացքում ընթերցասերները հնարավորություն կունենան մասնակցել մի շարք միջոցառումների:  Վարպետության դասընթացներ եւ քննարկումներ կանցկացվեն հրատարակիչներին, գրողներին ու ընթերցողներին օգտակար թեմաներով: 

 ԶՎԱՐԹ ԽԱՉԱՏՐՅԱՆ

Այս թեմայով Աֆրոդիտեի մասին լեգենդի կողմից սրբացված քարերը դառնում են բնության շոշափելի մասունքներ, նկարչի համար՝ կտավ Այս օրերին բոլորս մի քիչ ջերմանալու կարիք ունենք… լավ տողը կարող է ջերմացնել. Լիլիթ Գալստյան Ցավոք, ոչ բոլորին է հասու այս ամենը, սակայն, միեւնույնն է, ամրոցն անպարտ է. Մամիկոն Խուրշուդյան Բեռնաթափում. ԿԳՄՍՆ-ն՝ հայ հին եւ միջնադարյան գրականությունը դուրս թողնելու լուրերի մասին ԳԱԿ մշակութային խաչմերուկ. ժամանակակից արվեստագետների այց Վրաստանից եւ Իրանից