«Ինչից խռով եք, ինձ էլ է տանջում, բայց Արարատից խռով չմնաք»
Արխիվ 16-20Շուրջ 40 տարի Ֆրանսիայի հայաշատ Մարսել քաղաքում գործող Խաչատուր Աբովյան դպրոցը, ուր վերջին տարիներին հայ փոքրիկներին դասը մատուցվում է արեւելահայերենով` հայաստանյան հայերենով, վերջերս տոնեց իր հոբելյանը:
Այդ մասին «Իրավունքին» տեղեկացրեց 40-ամյա դպրոցի հոգաբարձուների խորհրդի արդեն 4-րդ նախագահ ԿԱՐԵՆ ԽՈՒՐՇՈՒԴՅԱՆԸ, որը նշեց` իր նախագահ ընտրվելուց հետո դժվարությամբ, բայց հաղթահարելով շատ բարդություններ` կարողացել է հասնել նրան, որ դպրոցում դասավանդվի արեւելահայերենով` հայաստանյան հայերենով. «Կարողացա իմ խորհրդի անդամներին վստահեցնել, որ դա է ճիշտը»,- շեշտեց զրուցակիցն ու վստահեցրեց, որ տարիներ շարունակ դպրոցում դասավանդել են հայ համայնքի բազմաթիվ պատկառելի ներկայացուցիչներ: Անդրադառնալով հոբելյանին` վերջինս տեղեկացրեց, որ մատուցվել է սուրբ պատարագ, հետո հոգեհանգստյան արարողություն` դպրոցի ստեղծմանը եւ զարգացմանը օժանդակած բոլոր հանգուցյալների հիշատակին, ապա տեղի են ունեցել պարգեւատրման արարողություններ:
- Պատարագ մատուցվեց Մարսելի Սրբոց Թարգմանչած եկեղեցում` Ֆրանսիայի հայոց թեմի առաջնորդ, բարեշնորհ տեր Վահան Եպիսկոպոս Հովհաննիսյանի կողմից: Անմիջապես ավարտին Ֆրանսիայի առաջնորդը առաջնորդարանի «Վարդան Մամիկոնյան» շքանշանով պարգեւատրեց դպրոցի կյանքում մեծ դեր ունեցած վաստակաշատ անձանց` Ռոբերտ Տորլիգյան, Ելիզաբեթ Գարաբեդյան, Էլիան Գարգիլո Կազանջյան եւ Անահիտ Ստեփանյանին: Ի դեպ, դպրոցը հիմնադրվել է Ցեղասպանությունից մազապուրծ եղածների երեխաների կողմից ու պատարագից հետո չորս սերնդի ներկայացուցիչներով` ծաղկեպսակ դրեցինք եկեղեցու տարածքում գտնվող Հայոց ցեղասպանության հուշարձանին` մեդալակիր Անահիտ Ստեփանյանը, ես` դպրոցի ներկա նախագահս եւ երկու ուսանող` ամենափոքրիկ եւ միջին դասարաններից` ցույց տալու, որ Հայոց ցեղասպանությունից հետո Մարսելում գոյություն ունի 4 սերունդ, որը խոսում է հայոց լեզվով: Այդ օրը ՀՀ սփյուռքի նախարար Հրանուշ Հակոբյանի կողմից դպրոցի 4 հիմնադիրներ՝ Ռոբերտ Տորլիգյանը, Ելիզաբեթ Գարաբեդյանը, Էլիան Գարգիլո Կազանջյանը և Տիրան Գարաբեդյանը եւս պարգեւատրվեցին «Մայրենիի դեսպան» շքանշաններով, որը նախարարի անունից հանձնեց վաստակաշատ հայագետ Ռոբերտ Տեր-Մերգելյանը: Հոբելյանական երեկոյին ներկա էին նաեւ Ֆրանսիայի Հայկական բարեգործական ընդհանուր միության նախկին նախագահ Ռոշե Կույումջյանն իր տիկնոջ եւ ՀԲԸՄ-ի ներկայիս նախագահ` Անրի Վերնոյի որդի Պատրիկ Մալաքյանը, հայ եկեղեցու հոգեւորականներ, հայ համայնքի բազմաթիվ կազմակերպությունների նախագահներ, ինչպես նաեւ Էվերեստը բարձրացած, հայ էքստրիմ սպորտի վաստակավոր սպորտսմեն Արա Խաչատուրյանը եւ այլ վաստակաշատ հայ անձինք:
«ՈՐՊԵՍԶԻ ԴԱԴԱՐԻ ՖՐԱՆՍԻԱՅՈՒՄ ԳՈՅՈՒԹՅՈՒՆ ՈՒՆԵՑՈՂ ՍՊԻՏԱԿ ԱՎԱՐԱՅՐԸ»
- Կարեն, օտարության մեջ ինչպե՞ս եք կարողանում պահպանել հայոց լեզուն, ավելին` հայաստանյան հայերենը, որը չի հաջողվում Սփյուռքում շատ հայկական դպրոցների ղեկավարների:
- Վերհիշենք Վռամշապուհի, Սահակ Պարթեւի եւ Մեսրոպ Մաշտոցի գործը, որ իրենց գործունեությամբ կարողացան 387 թվականի մասնատված Հայաստանը` կիսված Բյուզանդիայի եւ Պարսկաստանի միջեւ, մեր լեզվի միջոցով ժամանակի ընթացքում միրավորել, որպեսզի ժողովուրդը չձուլվի: Հոբելյանին իմ զեկույցով անդրադարձա դրան, որպեսզի դադարի Ֆրանսիայում գոյություն ունեցող սպիտակ Ավարայրը: Երբ հայերը մուսուլմանական պետություններում են, հայապահպանությունը եւ քրիստոնեությունը հիմնարար դրույթների վրա են, քանի որ ազգը, որի մեջ գտնվում են, այլ կրոնի է պատկանում: Իսկ եվրոպական պետություններում, որտեղ ավելի շատ քրիստոնյա են, հայերը գնում են ձուլման, ինչն էլ ես անվանում եմ սպիտակ Ավարայր: Դրա դեմն առնելու միակ միջոցը մեր դպրոցն է: 2-րդ կարեւորագույն օղակը. Հայաստան-Սփյուռք աներեւոյթ կամուրջն է, որին նախորդում է ամենակարեւոր աներեւույթ կամուրջը` լեզուն, որի միջոցով նաեւ կրոնը: 3-րդ կարեւոր կետը Հայաստանից նոր արտագաղթած հայերի հիմնախնդիրն է` սոցիալական խնդիրներից ելնելով` նրանք ապրում են Մարսելի ամենավատ թաղամասերում` մուսուլմանների թիրախում, որտեղ հայ երեխաները արաբացված ֆրանսերենի մշակույթի զոհ են դառնում: Այս դեպքում եւս մեր դպրոցը եւ հայկական եկեղեցին փրկություն է, որտեղ ցույց կտանք, որ հայ ազգը, հայոց լեզուն ու հայոց պատմությունն ավելի արժեքավոր է: Միեւնույն ժամանակ, հայերենին զուգահեռ, նրանց սովորեցնում ենք ֆրանսերեն, որպեսզի եթե մնալու են` արագ ոտքի կանգնեն, իսկ որքան արագ ոտքի կանգնեն, այնքան նրանց ընտանիքը կուժեղանա, դրանով նաեւ մեր համայնքը, հետեւաբար նաեւ Հայաստանը կուժեղանա: Մի ուժեղ հայ` Ֆրանսիայում` մի ընտանիք ուժեղանում է Հայաստանում:
«ՀԱՄԱՅՆՔԱՅԻՆ ԳԱՂԱՓԱՐԱԽՈՍՈՒԹՅՈՒՆՆԵՐԸ ՀԱՃԵԼԻ ՉԵՆ ՖՐԱՆՍԻԱՅՈՒՄ»
- Մարսելի քաղաքային իշխանություններն ինչպե՞ս են ընդունում այդ փաստը:
- Նրանք պայքար ունեն համայնքային իրավիճակներին, ընդունում են մեկ պետություն, մեկ ժողովուրդ կարգախոսը եւ համայնքային գաղափարախոսությունները հաճելի չեն Ֆրանսիայում: Բայց փորձում ենք մեր գործունեությամբ պահպանել Ֆրանսիայում գտնվող հայերի լեզուն, պահպանել եւ արժեւորել նրանց արժեքները, որպեսզի կարողանան իրենց համար դառնալ ապագայի հզոր ուժ: Ինչպես նաեւ նոր եկած հայերին սովորեցնել ֆրանսերեն, որպեսզի կարողանան արագ ինտեգրվել: Սրանք հանգամանքներ են, որ մեր տարածքային ապակենտրոնացված իշխանությունները լավ են վերաբերվում եւ ջատագովում են:
- Խաչատուր Աբովյանի դպրոցում հայերի կողմից պահանջարկը շա՞տ է:
- Այո, պահանջարկ կա: Պատկերացրեք, երբ 2005- ին ընդունվեցի դպրոցի հոգաբարձուների խորհրդում, որպես անդամ , ունեինք ընդամենը տասը երեխա, իմ նախագահության իրականացրած քաղաքականության արդյունքում միայն երեխաների քանակը դարձավ 54։ Ի դեպ, որոշել ենք, որ հայոց լեզվի, հայ քաղաքակրթության, հայ մշակույթի եւ կրոնի ուսուցանումը ամբողջապես անվճար լինի: Պետք է օգնենք, պայքարենք, գտնենք լուծումներ, որպեսզի ցանկացած հայ երեխա կամ ծնող, ով ցանկություն ունի, որ իր երեխան վերադառնա իր արմատներին, քաջալերենք եւ օգտակար լինենք:
ՀԱՅԱՍՏԱՆԻՑ ԿՊԱՏՎԻՐԵՆ ԱՌԱՋԻՆԴԱՍԱՐԱՆՑԻՆԵՐԻ ՀԱՅՈՑ ԼԵԶՎԻ ՏԵՏՐԱԿՆԵՐ
- Կարեն, իսկ դպրոցի համար գրականությունն ինչպե՞ս եք ապահովում, այդ հարցն ինչպե՞ս է լուծվում, Հայաստանի՞ց է գալիս:
- Անկեղծ, երբեւիցե Հայաստանից գիրք չեմ ստացել, բայց Սփյուռքի նախարարությունում Եվրոպայի վարչության ակտիվ աշխատակիցները, բավականին շատ են առաջարկում գրքեր: Քանի որ մենք ունենք բյուջե, չեմ ուզում, որ Հայաստանի Հանրապետությունը եւս բյուջե ծախսի մեզ համար: Բայց այս տարի կփորձեմ Հայաստանից պատվիրել առաջին դասարանցիների տետրակներ եւ մեր դպրոցի աշակերտներին էլ ապահովել այդ տետրակներով, որպեսզի Հայաստանի եւ Մարսելի առաջին դասարանցիները լինեն նույն մակարդակի վրա: Ճիշտ է, մեզ մոտ մեկօրյա է դպրոցը, բայց դա բավական է, որպեսզի մեկ օրում սովորեն Հայաստանի մեկ շաբաթվա սովորած հայոց լեզուն:
«ԱՐՏԱԳԱՂԹԸ ԿԱՆԽԵԼՈՒ ՀԱՄԱՐ ՖՐԱՆՍԻԱՆ ՉՊԵՏՔ Է ՆԵՐԿԱՅԱՑՆԵԼ ՈՐՊԵՍ ԷԼԴՈՐԱԴՈ»
- Վերջին տարիներին հայերը հիմնականում արտագաղթում են Ֆրանսիա, ի՞նչ կա այդտեղ, որ նրանց հայրենիքից կտրում է:
- Ամեն ժողովին ես ծնողներին ասում եմ` այո, մեր հայրենակիցներից շատերն այստեղ են, ու պետք է իրենց ամեն գնով օգնել: Բայց նրանց խնդրել եմ, որ Ֆրանսիան չներկայացնեն որպես Էլդորադո, այլ ասեն իրականությունը, ինչը տեղի է ունենում այստեղ` ինչ դժվարություններ են ապրում, զգում, որպեսզի այն ռեալ ազդեցություն ունենա Հայաստանի արտագաղթի վրա: Այսինքն` չգովազդել արտակարգ ձեւով, որպեսզի մարդիկ Հայաստանում զրկվեն իրենց փոքր ունեցվածից, արտագաղթեն ու այստեղ ունենան ոչինչ: Ինչից խռովեք, ինձ էլ է տանջում, բայց Հայաստանից, մեր լուսնից, մեր արեւից, մեր Արարատից խռով չմնաք: Համենայնդեպս, փորձում եմ ամեն կերպով սիրել տալ Հայաստանը, մեր լեզուն մեր կրոնը, մեր ժողովրդի պատմությունը` ամենափոքրիկ տարիքից սկսած, բայց նաեւ ամեն գնով կանխել ամենակարեւորը` արտագաղթը, որովհետեւ թոթոփված Հայաստանը կդառնա սպիտակ Ավարայր:
Զրուցեց ԼԻԼԻԹ ԵՂԻԱԶԱՐՅԱՆԸ