Իշխանությունները ոտուձեռ ընկած են և հասկանում են, որ հողը ոտքերի տակից փախչում է. Արմեն Հովասափյան

Այն, որ Գյումրիում իշխանությունները ոտուձեռ ընկած են և հասկանում են, որ հողը ոտքերի տակից փախչում է, էլ ավելի ընդգծվեց նախ՝ Նիկոլ ի երեկվա բառամթերքից (գործողությունները լրիվ կանխատեսելի էին), իսկ այսօր՝ արդեն Գյումրիում ընթացող ակնհայտ ռեպրեսիվ գործողություններից։

Առավոտվանից Գյումրիում գերլարված իրավիճակ է. իշխանությունը հենց նոր ձերբակալեց Գյումրու քաղաքապետի թեկնածու Մարտուն Գրիգորյանի հորն ու որդուն (շինծու «շեբինի գործի» շրջանակներում)։ Ի դեպ, առավոտվանից շրջապատված են Գրիգորյանի նախընտրական շտաբները. ոստիկանները արգելափակել են մուտքերը և մարդկանց թույլ չեն տալիս ներս մտնել։ Ռեպրեսիան ուղղված է ոչ միայն Գրիգորյանի, այլև նրա ողջ թիմի դեմ. իրավապահները այցելել են ավագանու թեկնածուներին և շտաբի անդամներին։

Մինչ այդ, մի քանի օր առաջ, Մխիթարյան Ռուբենին «վարորդական իրավունքի» գործն էին հրապարակ բերել, և քարոզարշավը կիսատ թողնելով՝ նրան կանչել էին Երևան՝ «պարզաբանման»։ Ընդդիմադիր մյուս թեկնածուի շտաբում նույնպես առավոտվանից «ստուգումներ» էին իրականացվում։ Իշխանությունն այս կերպ փորձում է ընդդիմադիր թեկնածուներին վախեցնել և շինծու «ռոլիկներով» նրանց ցանկացած ձևով «փռել ասֆալտին»։

Գյումրու նկատմամբ նման լարվածություն ստեղծելը հերթական անգամ վկայում է իշխանության մերկության և ապիկարության աստիճանի մասին։ ԱԺ-ում Կոնջորյան Հայկի բացառապես նախընտրական երանգավորում ունեցող ելույթը Նիկոլի վերջին ճիչերից էր՝ ընտրություններին ընդառաջ, երբ բուն հարցի քննարկումը թողած՝ Կոնջորյանը թիրախավորեց Գյումրու ընդդիմադիր թեկնածուներին՝ տարբեր պիտակավորումներ հնչեցնելով։

Ըստ էության, այս ամենը ցույց է տալիս մեկ բան. ընդդիմությունը Գյումրիում Նիկոլին ջախջախելու այլընտրանք չունի, և իշխանության այս բռնապետական վարքագիծը հակադարձ ազդեցություն է ունենալու հենց իրենց վրա՝ գրեթե կասկած չունեմ «թարս կապուտի» սցենարի վրա։ Նիկոլը հասկանում է, որ ամեն ինչ փլուզվում է, ստիպում է նրան վաբանկ գնալ՝ սեղանին դնելով ամեն ինչ՝ Գյումրին պահելու համար։