Հանքի շահագործում հնարավոր չէ, սրանք հերթական, ոչ մի տեղ չտանող պրոցեսներ են. Ակտիվիստ

«Մասնավոր հատվածի հետ բանակցությունների մի մաս կա դեռ, սակայն ամեն ինչ գնում է նրան, որ տեղի է ունենալու բանկերի կողմից Ամուլսարի վարկավորումը։ Իմ տպավորությամբ` խանգարող հանգամանքները հերթականությամբ լուծվում են։ Արդյունքում՝ սկզբում կունենանք շինարարության փուլ, հետո արդյունահանման փուլ։ Պլանավորում ենք արդեն հոկտեմբերից արդյունահանում անել»,- այս մասին հայտարարել է էկոնոմիկայի նախարար Գևորգ Պապոյանը: Պատրաստվո՞ւմ են արդյոք կրկին բողոքի ակցիաներ իրականացնել Ջերմուկի բնակիչները փորձել ենք հետաքրքրվել ակտիվիստ Շիրակ Բունիաթյանից.

– Եթե անկեղծ՝ լուրջ չեմ վերաբերվում, փորձը ցույց է տալիս, որ տարիներ շարունակ գնացել են, տարբեր մարդկանց, կազմակերպությունների, բանկերի հետ ինչ-որ բանակցություններ են վարել, ու տպավորություն է եղել, թե ընդամենն օրերի հարց է, որ հանքը շահագործվի, բայց դա տեղի չի ունեցել: Սա ուղղակի համարում եմ հերթական ոչ մի տեղ չտանող գործընթաց: 

Իհարկե մենք շարունակում ենք հետևել դեպքերի ընթացքին, մարդկանց տրամադրություններով ենք հետաքրքրվում, ու տվյալ համայնքի դիրքորոշումն անփոփոխ է: Վստահաբար կարող եմ ասել, որ մարդկանց այն հատվածը, որ դեմ էր հանքի շահագործմանը, շարունակում է դեմ լինել, նրանց ո՛չ պատկերացումը, ո՛չ էլ դիրքորոշումը չեն փոխվել: Մարդիկ հստակ համոզմունք ունեն՝ Ջերմուկը առողջարանային գոտի է, ու դա չպետք է փչացնել ժամանակավոր ինչ-որ անհայտ ներդրումներով: 

– Իսկ այդ ներդրումներն ինչո՞ւ չեն իրականանում:

– Ժամանակին այս ծրագրում ներառված էին միջազգային շատ լուրջ բանկեր, կառույցներ, որոնք տեսան ռիսկեր, երբ ճանապարհները փակվեցին և այլն, ու դուրս եկան: Կարծում եմ՝ մյուս կազմակերպությունները, բանկերը ևս, հաշվի առնելով արդեն իսկ գոյություն ունեցող փորձը, ռիսկեր են տեսնում: Ավելի մանրամասն չեմ կարող ասել, որովհետև, իհարկե, ավելի մանամասն ինֆորմացիայի չեմ տիրապետում, բայց այն, ինչ տեսնում ենք՝ փաստ է: 

– Այսինքն՝ հիմնական պատճառը տեղի բնակչության ընդվզո՞ւմն է:

– Չէ՛, բայց դա պատճառներից մեկն է: Եթե նայում ենք աշխարհաքաղաքական իրավիճակին, մեր տարածաշրջանում կատարվողին՝ ստիպում են ինձ ունենալ համոզմունք, որ գոնե առաջիկա տարիներին Ամուլսարում լուրջ գործընթացներ տեղի չեն ունենա:

– Պարո՛ն Բունիաթյան, չնայած հանրային դժգոհություններին՝ իշխանությունը շարունակում է առաջ տանել հանքի շահագործման օրակարգը, ինչո՞ւ հաշվի չեն առնում բնակչության, մասնագետների կարծիքները:

– Բացի ձեր նշած հանգամանքներից՝ գոյություն ունեն նաև դատական վճիռներ, որոնք, ճիշտ է, դեռ ուժի մեջ չեն մտել, բայց կայացված են ու շատ լուրջ փաստերի հիման վրա են կայացվել, ու ես վստահ եմ, որ վճռի էական փոփոխություն չի լինելու: 

Այդ վճիռներն անգամ չեն ստիպել իշխանությանը վերանայելու իր որոշումը: Ես ինքս պայքարել, պայքարում ու պայքարելու եմ հանքի շահագործման դեմ: Ես ունեմ լուրջ համոզմունքներ, որ լուրջ գործողություններ չեն լինելու, բայց ոչինչ չեմ բացառում:

– Հիմա ինչ-որ գործողություններ կատարվո՞ւմ են այդտեղ:

– Չէ՛, բացարձակ, 2020-ից հետո Ամուլսար տանող ճանապարհները բաց են, ու այնտեղ միայն պահնորդական ծառայությունն է, պահակներ են, որոնք ուղղակի հսկում են տարածքը, ու վերջ, ոչ մի այլ գործընթաց տեղի չի ունենում այնտեղ: Բացարձակ ոչ մի աշխատանք տեղի չի ունենում այնտեղ: 

– Ամուլսարի հետ կապված իրադարձությունների ֆոնին որոշ շերտի կողմից մշտապես հարց է հնչում, թե ո՞ւր են այն բնապահպան-ակտիվիստները, որոնք շատ ակտիվ պայքարում էին: Ձեր մեջ այդ հարցն առաջանո՞ւմ է, իսկապես այդ մարդիկ դադարե՞լ են պայքարել:

-Մարդիկ, որոնք ակտիվ պայքարի մեջ են եղել, ես անձամբ բոլորի հետ էլ կապի մեջ եմ, բոլորն էլ նույն դիրքորոշման են, ուղղակի քանի որ ընդհանուր պրոցեսը ակտիվ չէ, ոչ մի բան տեղի չի ունենում, իմաստ չկա գնալ Ամուլսարի մուտքերի մոտ ինչ-որ ակցիա անելու: Այսինքն՝ այս պահին լուրջ գործընթաց գոյություն չունի, ու նորմալ է, որ մարդիկ իրենց առօրյա հոգսերով են: Երբ գործընթաց կլինի, այդ ժամանակ պարզ կլինի՝ կա՞ն այդ ակտիվությունը, մասնակցությունը, թե՞ չէ: Հիմա մի քիչ դժվար է դրա մասին խոսել: Բայց, կրկնում եմ, որ, իմ կարծիքով, մոտ ապագայում հանքի շահագործում հնարավոր չէ, սրանք հերթական, ոչ մի տեղ չտանող պրոցեսներ են: