Բրիտանիան սնանկացման եզրին է. բրիտանացի քաղաքական գործիչ

Բրիտանիան սնանկացման եզրին է, իսկ բյուջեն համալրելու բոլոր հնարավոր ուղիները միայն բարդացնում են իրավիճակը, գրում է բրիտանացի քաղաքական գործիչ Դեյվիդ Ֆրոստը The Telegraph-ի հոդվածում։

«Ելք չկա: Հարկերի բարձրացումը չի ավելացնի եկամուտները, իսկ լեյբորիստները չեն կարող խթանել տնտեսական աճը կամ կրճատել ծախսերը»,- ասել է Ֆրոստը։

Նրա խոսքով՝ գանձապետարանի կանցլեր Ռեյչել Ռիվզը ստիպված է կրկին բանակցել բյուջետային անվտանգության գրասենյակի հետ՝ բյուջեի ծախսերի աուդիտի ֆոնին։

«Երեք ամսից էլ քիչ է անցել այն պահից, երբ գանձապետարանի մեծ բյուջեի պլանը հնացել է: Բյուջեի դեֆիցիտը կարող է հասնել մինչև 20 միլիարդ ֆունտի։ <….> Հարկերի բարձրացումը կհանգեցնի ռեցեսիայի, բյուջեի ծախսերի կրճատումը չի գնահատվի ընտրողների կողմից, իսկ օրենսդրության էական մասշտաբով փոփոխությունը կհանգեցնի անկանխատեսելի հետևանքների»,- ասաց քաղաքական գործիչը։

Ֆրոստը նաև նշում է, որ մեկ շնչին ընկնող ՀՆԱ-ն արագորեն նվազում է վառելիքի բարձր գների, անվերահսկելի ներգաղթի և հետկովիդային տնտեսական շոկի պատճառով։ Գանձապետարանին մնում է միայն վարկերը, որոնք պետք է մարվեն։ Հարկային բեռի, պետական ​​պարտքի և բյուջեի ծախսերի անընդհատ աճը տնտեսությունն ավելի ու ավելի է մոտեցնում անդունդին։

Քաղաքական գործիչը կանխատեսում է, որ կանցլերը ստիպված կլինի մշտապես դիմել կիսամիջոցների՝ բոլոր կողմերի ճնշումների պատճառով՝ հետաձգելով անխուսափելին, եւ կարող է միայն հույս ունենալ, որ պարտքի ռումբը կպայթի իր հրաժարականից հետո:

Ռիվզն ավելի վաղ ասել էր, որ Բրիտանիայի տնտեսական պայմանները վատթարագույնն են Երկրորդ համաշխարհային պատերազմից հետո։ Նա ասել է, որ բրիտանական տնտեսությունը լճացած է և 2010-24 թվականների պահպանողական կառավարությունը որակել է որպես քաոս և քաղաքական անպատասխանատվություն: