Անգամ Եվրամիության անդամ երկրներն են ասում, որ Հայաստանը դեռ շատ հեռու է ԵՄ անդամ լինելուց. Գառնիկ Դանիելյան

Կառավարության նիստի ժամանակ Նիկոլ Փաշինյանը ներկայացրեց «Եվրոպական միությանը Հայաստանի Հանրապետության անդամակցության գործընթացի մեկնարկի մասին» օրենքի ընդունման հետ կապված հիմնական ուղենիշները եւ հետագա գործողությունների հնարավոր ընթացքը։ Նա մասնավորապես ընդգծեց, որ կառավարության դիրքորոշումն է չառարկել օրենքի ընդունմանը։ Վերջինս նաեւ նշել է, որ օրենքի ընդունումից հետո Հայաստանի եւ Եվրամիության միջեւ պետք է քննարկում լինի ճանապարհային քարտեզի մշակման շուրջ, որը կներառի թե՛ ԵՄ-ի, թե՛ Հայաստանի տեսլականը։ Այս մասին «Իրավունք»-ը զրուցել է ԱԺ «Հայաստան» խմբակցության պատգամավոր ԳԱՌՆԻԿ ԴԱՆԻԵԼՅԱՆԻ հետ:

— Ադրբեջանի նախագահ Ալիեւի տարածքային պահանջների եւ պատերազմի սպառնալիքների ֆոնին՝ ՀՀ կառավարությունը հաստատեց Եվրամիությանն անդամակցելու գործընթացի մեկնարկի մասին օրենքի նախագիծը եւ ուղարկեց խորհրդարան: Ձեր տեսակետն ինչպիսի՞ն է այս հարցի շուրջ:

— Կարծում եմ, որ այդ հարցում մեծ առումով մեկնաբանելու որեւէ բան էլ չկա: Մենք բազմիցս ասել ենք, որ նախ մենք այս պահին գործող ԵԱՏՄ-ի մեջ ենք, ՀԱՊԿ-ի մեջ ենք եւ, որպես ՀԱՊԿ-ի եւ ԵԱՏՄ-ի անդամ պետություն, պարզ է չէ՞, որ ունենք փոխադարձ պայմանավորվածություններ եւ պարտականություններ: Ուստի՝ մեր տեսակետը հայտնի է բոլորին, որ անկախ այն ամենից, ինչ այժմ ասում են ե՛ւ իշխանությունները, ե՛ւ Նիկոլ Փաշինյանի գրպանային կուսակցությունները, որոնք այդ «Եվրաքվե» նախաձեռնությունն են իրականացնում եւ այլն, այդ ամեն ինչը կեղծ օրակարգ է: Այսինքն, իրականությունն այն է, որ Հայաստանը չի կարող այն պարտականություններն ու պարտավորվածությունները, որ ունի (կրկնում եմ՝ ԵԱՏՄ-ի շրջանակներում) անտեսել: Մենք տեսնում ենք, որ նաեւ Հայաստան եւ Ռուսաստան ապրանքաշրջանառությունը 2024 թվականի 10 ամիսների ընթացքում կազմել է շուրջ 10 մլրդ 400 մլն: Այսինքն՝ անցնող հաշվետու տարին 10 մլրդ-ից ավել է կազմել եւ այստեղ պարզ է չէ՞, որ ե՛ւ առեւտրային որպես գործընկեր, ե՛ւ այլ հանգամանքներ հաշվի պետք է առնել: Հետեւապես, այժմ օրակարգ բերել մի խնդիր, որն անգամ նաեւ Եվրամիության անդամ երկրներն են ասում, որ դեռ Հայաստանը շատ հեռու է Եվրամիությանը անդամ լինելուց եւ բերել դա օրակարգ՝ կարծում եմ՝ այնքան էլ Հայաստանի Հանարապետության շահերից չի բխում՝ նաեւ բազմաթիվ հանգամանքներ հաշվի առնելով:
Սա կեղծ օրակարգ է, դա անգամ քննարկելն այս պահին ռացիոնալ չէ, իրատեսական չէ: Պատճառն, իհարկե, շատ պարզ է: Բոլորս էլ շատ լավ գիտենք, որ այս պահին մարտահրավերներ եւ խնդիրներ կան մեր պետության առաջ, եւ այդ ամենը ինչպե՞ս կարող ենք թողնել ու բերել օրակարգ նման հարց: Ընդ որում՝Հայաստանը գիտենք, որ դեռ բազմաթիվ չափորոշիչների՝ ԵՄ-ին անդամակցելու առումով, չի համապատասխանում՝ հաշվի առնելով մեր տնտեսության վիճակը, կախվածությունը: Եվ հայտարարությունները, որոնք հնչում են Ռուսաստանից, ակնհայտ է, որ այդ պարագայում նաեւ խնդիր կլինի ԵԱՏՄ անդամակցության: Այսինքն, մեր տնտեսությունը լուրջ խնդիրներ կունենա՝ եթե չասենք, որ կոլապսի առաջ կկանգնի: Իրականությունը դա է, եւ այս պայմաններում խոսել անդամակցության մասին՝ կարծում եմ, որ այնքան էլ լուրջ չէ:

— Փաշինյանը նշել է նաեւ այն մասին, որ Հայաստանի ԵՄ անդամակցությունը միայն հանրաքվեի ճանապարհով պետք է լինի: Դա ինչպե՞ս եք պատկերացնում:

— Նրանք հասարակությանը մոլորության մեջ են գցում, նույն այդ «Եվրաքվե» կոչվածը: Շատ ժամանակ նաեւ ստորագրություն են կորզում՝ մարդկանց խաբելով եւ ասելով, որ վիզաների ազատականացում, Եվրոպա գնալու միտում կլինի եւ այլն, իսկ դրա տակ ուրիշ բան են իրականում կատարում: Դրա հիմքում մարդկանց մոլորության մեջ են գցում եւ ճիշտը չեն ասում: Հենց նույն նաեւ Եվրամիությունը բազմաթիվ անգամներ ասել է, որ Հայաստանը տասնյակ պահանջներ պետք է բավարարի, եւ նոր սկսենք դրա մասին խոսելը: Այսինքն, անգամ այդ հարցում իրենք ազնիվ չեն եւ ժողովրդի հետ նաեւ ճիշտ չեն խոսում: Իրենք կարող են մի օրակարգով մտնել հասարակության մեջ, մոլորեցնել հասարակությանը, խաբել մարդկանց՝ ասելով, որ վիզաներ են ազատականացնում, բոլորն ազատ կգնան Եվրոպա եւ կգան, բայց դրա տակ իրականում շատ ու շատ այլ բաներ կան թաքնված: Թեկուզ անգամ եթե հայտ էլ է ներկայացնում պետությունը, օրինակ, նույն Եվրոպական միությանը միանալու, ապա բոլորս էլ շատ լավ գիտենք, որ այդ գործընթացը տասնյակ տարիներ է ձգձգվելու: Այս առումով օրինակները բազմաթիվ են: Նույն Վրաստանի օրինակը, Ուկրաինայի, Թուրքիայի, որոնք շուրջ 20 տարուց ավել է, ինչ անդամակցության հայտեր են ներկայացրել: Այսինքն` պարզ է չէ՞, որ այդ ամենն իրականում մեկ կամ երկու օրվա աշխատանք չէ, բայց այն խնդիրները, որոնք կարող են մեր առջեւ առաջանալ՝ դա մեկ անգամ եւս կրկնում եմ, որ մեր պետությանը շատ լուրջ վնասներ է հասցնելու: Այդ հաշվարկները իրենք կա՛մ չեն պատկերացնում, կա՛մ հասկանալով են անում՝ փորձելով մեր պետությունն այն վիճակի մեջ դնել, որից շատ դժվար է լինելու իրականում դուրս գալը: Եվ այժմ օրակարգ բերել նման խնդիրներ եւ դարձնել օրվա թեմա, ճիշտ չէ: Դա նաեւ կարող է կապված լինել այն հանգամանքի հետ, որով կարելի է ասել, որ փորձում են ժողովրդի ուշադրությունը շեղել, փորձել ընտրությունների արդյունքում մարդկանց ինչ-որ խաբել եւ ասել, որ գիտե՞ք ինչ, ավելի լավ կյանքի, ավելի լավ պայմանների եք արժանի, բայց իրականությունը դա չէ՛, իրականությունը հեռու է դրանից:

ԴԻԱՆԱ ՄԱՆՈՒԿՅԱՆ