Ո՛չ քրիստոնյա է, ո՛չ էլ ներողամիտ, նա հայտնի խոսքի վաճառական է․Միքայել արքեպիսկոպոս Աջապահյանը Փաշինյանի՝ քրիստոնեությունը հիշատակելու մասին

Օրեր առաջ Նիկոլ Փաշինյանը «Գնդակահարության պատ» վերտառությամբ գրառում էր կատարել, որտեղ մասնավորապես ասված է․«Քանի որ իրատեսական չէ բոլոր post-երի ներքո առկա բովանդակային մեղադրանքները տեսնել (ժողովուրդ ջան, ինչքան էլ շատ մեկնաբանություններ եք գրում), որոշեցի այս գրառումն անել, որպեսզի այստեղի մեկնաբանություններում մեր հարգելի օգտատերերը գրեն ինձ ուղղված իրենց մեղադրանքները, որոնցից բովանդակայիններին հընթացս կպատասխանեմ՝ առանձին գրառումներով: Բնականաբար, հայհոյանքներին, առավել եւս՝ հայհոյանքով, չեմ պատասխանելու եւ, որպես քրիստոնյա, նման գրառումներ անողներին ներում եմ կանխապես»։

Ինչո՞ւ Փաշինյանը, ով առիթը բաց չի թողնում ամենաստոր ձեւերով քննադատել եկեղեցուն, արհամարել ցանկացած քրիստոնեական տոն հիշել, որ ինքը քրիստոնյա է, գուցե որոշե՞լ է ապաշխարհել հարցով դիմեցինք Շիրակի թեմի առաջնորդ Միքայել արքեպիսկոպոս Աջապահյանին, ով նկատեց․

-Ինչ ապաշխարհության մասին է խոսքը, նա հայտնի խոսքի վաճառական է , շատ լավ գիտի խոսքի արժեքը ու գիտակցում է, երբ, որտեղ, ինչ պահի ինչ է ասում, վստահ լինելով, որ նրա խոսքին հավատացողներ կլինեն։ Նա այդ ամենը ասում է զուտ իր անձնական փիառի համար, ուզում է տպավորություն թողնել, որ ինքը քրիստոնյա է, ներողամիտ է, քաջ գիտակցելով, որ ոչ քրիստոնյա է, ոչ էլ ներողամիտ։