Թուրքիան կխփի իսրայելական ինքնաթիռները. «Թուրքիայի ձայն»

Քրդական PKK/YPG-ն Իսրայելից օգնություն է խնդրել Սիրիան գրաված թուրքամետ «Սիրիայի ազգային բանակի» դեմ պայքարում: Քրդերը խնդրել են մինչեւ իսկ օդային ուժեր օգտագործել թուրքամետ ուժերի դեմ։

«Թուրքիայի ձայնը» տեղեկացնում է, որ թեման քննարկել է «Անկարայի բարձրաստիճան ներկայացուցիչների հետ» և ստացել նրանց պատասխանը: Ըստ այդմ.

«Թուրքիան գիտակցում է դա։ Մեր գործակալությունները նախապես հասկացրել են Իսրայելին, որ ոչ մի դեպքում չեն հանդուրժի աջակցությունը PKK/YPG SDF ահաբեկիչներին Իսրայելի ռազմաօդային ուժերի կամ այլ ուժերի կողմից։ Եթե ​​Իսրայելը որոշի նման գործողություններ ձեռնարկել, մեր հակաօդային պաշտպանության համակարգերն ու կործանիչները պատրաստ են ոչնչացնել դրանք։ Համապատասխան հրամաններն արդեն փոխանցվել են Թուրքիայի զինված ուժերի մեր գլխավոր շտաբին»:

Սրան եւս երեք փաստ պետք է ավելացնել: Իսրայելը մի փոքր հարաբերական դադարից հետո վերսկսել է Սիրիայում օդային զանգվածային հարվածները` շարունակելով դանդաղ առաջխաղացումը:

Հաջորդը. Սիրիայի հարավային գոտու մի շարք էթնիկ խմբեր դիմել են Իսրայելին` նրա կազմ անցնելու խնդրանքով: Հասկանալի է, թե այդ խնդրանքն ինչ ծագումնաբանություն ունի, նաեւ, որ այսպիսով Իսրայելը Սիրիայի հարավով, դեպի քրդական գոտիներ ծավալվելու ծրագրեր ունի:

Վերջապես, հայտնի դարձավ, որ Թուրքիան մեծ ուժեր է մտցնում Սիրիա` ուղղելով քրդերի դեմ: Այսինքն, երեկ կայացած Բլինկենի եւ Ֆիդանի բանակցությունները, թերեւս, որեւէ արդյունք չեն տվել:

Այս ամենը, թերեւս, հաստատում է այն թեզը, որ եթե անգամ Թուրքիան եւ Իսրայելը (ԱՄՆ-ն) պայմանավորված խաղ տարան ասադյան Սիրիայում, սակայն այս պահին նրանց շահերը կտրուկ բախման մեջ են: