Ասադը որոշել է լքել նախագահի պաշտոնը և երկիրը. ՌԴ ԱԳՆ

Բաշար ալ Ասադի և Սիրիայի Արաբական Հանրապետության տարածքում զինված հակամարտության մի շարք մասնակիցների միջև բանակցությունների արդյունքում Ասադը որոշել է լքել նախագահի պաշտոնը, ինչպես նաև երկիրը՝ ցուցումներ տալով իշխանության փոխանցումը իրականացնել խաղաղ ճանապարհով։ Այս մասին ասված է Ռուսաստանի ԱԳՆ-ի տարածած հայտարարության մեջ:

«Ռուսաստանը չի մասնակցել այս բանակցություններին։

Միևնույն ժամանակ, համոզիչ կոչով դիմում ենք ներգրավված բոլոր կողմերին՝ հրաժարվել բռնության կիրառումից և կառավարման բոլոր խնդիրները լուծել քաղաքական ճանապարհով։Այդ կապակցությամբ Ռուսաստանի Դաշնությունը կապի մեջ է սիրիական ընդդիմության բոլոր խմբերի հետ։ Մենք կոչ ենք անում հարգել սիրիական հասարակության բոլոր էթնո-դավանական ուժերի կարծիքը և աջակցում ենք ՄԱԿ-ի Անվտանգության խորհրդի կողմից միաձայն ընդունված 2254 բանաձևի հիման վրա ներառական քաղաքական գործընթաց հաստատելու ջանքերին»,-ասված է հաայտարարության մեջ:

Նշվում է նաև, որ Սիրիայում ռուսական ռազմաբազաները բարձր պատրաստվածության վիճակում են: Այս պահին դրանց անվտանգությանը լուրջ վտանգ չի սպառնում։

Ավելի վաղ հայտնել էինք, որ այսօր  առավոտյան ահաբեկչական խմբավորումների զինյալները մտել են Դամասկոս։ Ըստ Al Jazeera-ի՝ կառավարական ուժերը լքել են քաղաքի կենտրոնը։ Զինված խմբավորումները նոյեմբերի վերջին սկսել են լայնածավալ հարձակում սիրիական բանակի դիրքերի դեմ։ Դեկտեմբերի 7-ի երեկոյի դրությամբ Սիրիայի նախագահ Բաշար ալ Ասադի հակառակորդները գրավել են Հալեպը, Համա, Դեյր էզ Զորը, Դարաան և Հոմսը։

Ինչպես հայտնի է՝ Դամասկոսը վերահսկողության տակ առնելուց հետո ահաբեկիչները ներխուժել են Սիրիայի ՊՆ շենք, նաև նախագահական պալատի համալիր:

Իր հերթին իրանական Tasnim-ը հայտնել է, որ թեև ահաբեկիչների առաջնորդ Աբու Մուհամմադ ալ Ջոլանին կարգադրել էր հասարակական և կառավարական գույքի վրա չհարձակվել, սակայն ոմանք մտել են Դամասկոսում նախագահ Բաշար ալ Ասադի տուն և թալանել այն: