Ովքեր են այս տարի «Եվրատեսիլ» երգի մրցույթի Հայաստանի հնարավոր թեկնածուները

hraparak.am-ը գրում է. «Առաջին ալիք»-ից այս տարի նշում են, որ «Եվրատեսիլ 2025»-ի մասնակցին ընտրելու է հեռուստադիտողը։ «Առաջին ալիքը»» մեկնարկում է «Դեպի Եվրատեսիլ» նախագիծը, որը կանցկացվի Շվեյցարիայի Բազել քաղաքում:

«Այս տարի դուք ոչ միայն ընտրողն եք, այլ գուցե հենց մասնակիցը: «Դեպի Եվրատեսիլ» նախագիծը այն հարթակն է, որտեղ դուք կարող եք լսելի դարձնել ձեր ձայնն ամբողջ աշխարհին:
Մրցույթին կարող են մասնակցել 2025թ. մայիսի 13-ի դրությամբ առնվազն 16 տարեկանը լրացած անձինք՝ ներկայացնելով նախկինում երբևէ չհրապարակված և չհնչած մրցութային երգի վերջնական տարբերակ:

Մրցույթին մասնակցելու համար այցելեք www.eurovision. am և լրացրեք առցանց հայտը:

Հայտերն ընդունվում են մինչև 2025 թվականի հունվարի 10-ը»- , ասված է հաղորդագրության մեջ:

Հանրայինի մեր աղբյուրը պատմեց, որ վերջին տարիներին շատ են քննադատություններն առ այն, որ «Առաջին ալիք»-ն է փակ քվեարկությամբ ընտրում պատվիրակին և երբեմն ընտրում է այնպիսի երգիչների, որոնց մարդիկ չեն ճանաչում: Բայց Հ1-ում վստահ են, որ հայ հանդիսատեսը չի փայլում իր բարձր ճաշակով և այս անգամ որոշել են հանրությանն այսպես ասած դաս տալ և ողջ պատասխանատվությունը գցել հեռուստադիտողի վրա: Հանրայինում կարծում են, որ հեռուստադիտողը ընտրելու է այնպիսի մեկին, ով Եվրատեսիլում եզրափակիչ չի անցնելու: Քանի որ նման մի քանի փորձ ունենք՝ Սևակ Խանաղյանի պարագայում, նրան ընտրել էր հանդիսատեսը, այս անգամ պատվիրակությունը որոշել է կրկին հեռուստադիտողին տալ հնարավորություն, որպեսզի հնարավոր ձախողումից հետո այս թեման մեկընդմիշտ փակվի:

Մենք տեղեկացանք, որ այս տարի «Եվրատեսիլ» երգի մրցույթի հնարավոր թեկնածուներն են՝ երգչուհի D’litte-ը, ով երիտասարդների շրջանում հայտնի ու սիրված է, Անահիտ Հակոբյանը, ով վերջերս հաղթեց «Նոր ալիք» երգի մրցույթում, ասում են, որ վերջինս վստահ է, որ հաղթելու է նաև Եվրատեսիլում, դերասան Աշոտ Ղազարյանի թոռնուհին՝ Անահիտ Ադամյանը և Աթենա Մանուկյանը, ով 2020 թվականին հեռուստադիտողի քվեարկությամբ հաղթեց, սակայն քովիդի պատճառով այդ տարի մրցույթը չկայացավ: Աթենան ապրում է Հունաստանում, անգամ հայերեն խոսել չգիտի, սակայն Եվրատեսիլից Եվրատեսիլ հիշում է, որ ազգությամբ հայ է: