5 րոպե ծայրահեղ ցուրտն անչափ օգտակար է մարդկանց համար. հետազոտություն

Հասարակություն 27 Նոյեմբեր, 2024 16:20

Քունը բնական ֆիզիոլոգիական գործընթաց է, որն անհրաժեշտ է մեր օրգանիզմի վերականգնման և բնականոն գործունեության համար: Երբեմն սթրեսը և այլ գործոններ ազդում են մեր քնի որակի վրա, սակայն գիտնականները տարեցտարի փնտրում են եղանակներ, որոնք հնարավորություն կտան մեզ ավելի արագ և խոր քուն մտնել: Նոր հետազոտության ընթացքում գիտնականներն, ըստ ամենայնի, միանգամայն նոր եղանակ են հայտնաբերել, գրում է Gizmodo-ն։

Կանադայից և Ֆրանսիայից հետազոտողների միջազգային թիմը ապացույցներ է գտել, որ ծայրահեղ ցրտին պարբերաբար ենթարկվելը կարող է իրականում դրական ազդեցություն ունենալ մեր քնի որակի վրա: Նշենք, որ խոսքն օրական ընդամենը 5 րոպե ծայրահեղ ցածր ջերմաստիճանի պայմաններում կանոնավոր մնալու մասին է:

Մոնրեալի և Պուատիեի համալսարանի թիմը սառեցնող հետազոտություն է անցկացրել՝ հետևելու ամբողջ մարմնի ամենօրյա «կրիոխթանման» հնարավոր օգուտներին: Հետազոտության ընթացքում գիտնականները լաբորատոր պայմաններում ուսումնասիրել են առողջ կամավորներին և պարզել, որ սառը պայմաններում անցկացված թերապիայի ընթացքում մարդկանց քնի տևողությունը և որակը մեծանում է: Հետազոտողների բացահայտումները ցույց են տալիս, որ կրիոխթանումը, հավանաբար, արդյունավետ եղանակով բուժում է քնին առնչվող խնդիրներ ունեցող մարդկանց համար:

Հետազոտությանը մասնակցել են ընդհանուր առմամբ 9 կին և 11 տղամարդ՝ բոլորը 20 տարեկան: Փորձը տևել է 5 օր. ամեն օր ժամը 18-ին կամավորները հանվում էին և 5 րոպե մնում մինչև -90 աստիճան սառեցված խցիկում: Նշենք, որ մնացած դեպքում կամավորներն ապրել են սովորականի պես, սակայն նրանց ապրելակերպը սահմանափակվել է քնի որակի վրա ազդելու ունակ ոգելից խմիչքի, կոֆեինի և այլ մթերքների արգելքով։

Փորձարկվողներին տրվել են նաև սարքեր, որոնք հետևում էին նրանց սրտի զարկերի հաճախականությանը, ուղեղի գործունեությանը և քնի ռեժիմին, երբ նրանք գնում էին քնելու: Բացի դրանից, հետազոտության մասնակիցները քնի որակը գնահատող հարցաթերթիկներ են լրացրել: Որպես համեմատական հսկողություն՝ կամավորները երկրորդ անգամ անցել են նույն դիտարկման ընթացակարգը, բայց գործնականում քնելուց առաջ որևէ սառը թերապիա չեն ստացել:

Արդյունքները ցույց են տալիս, որ կամավորները կրիոթանումից հետո ավելի լավ են քնել, բայց ոչ անմիջապես: Հետազոտողները նշում են, որ արդյունքների տարբերությունը նկատվել է միայն սեանսների հինգերորդ օրվանից հետո։ Առավել էական փոփոխությունները նկատվել են քնի ամենավերականգնող փուլի՝ դանդաղ ալիքի կամ խոր քնի ժամանակ:

Հետազոտության հեղինակները նշել են, որ միջին հաշվով փորձարկվողների խոր քունը սառը թերապիայից հետո 7,3 րոպեով ավելացել է: Կամավորները միաժամանակ նշել են, որ քնի որակը բարելավվել է կրիոխթանման ենթարկվելուց հետո, թեև ավելի մանրամասն ուսումնասիրության արդյունքում փոփոխությունը նշանակալի է եղել միայն կանանց համար:

Հետազոտության արդյունքները հրապարակվել են Cryobiology հանդեսում: Սակայն հետազոտության հեղինակները նշում են, որ չարժե շտապել և մարդու չափսերի հասնող սառցարան գնել։ Նախ, քնի բարելավումները դեռևս բավականին համեստ են: Երկրորդ, արդյունքները հիմնված են փոքր ընտրանմուշի վրա և հետագա հետազոտություն են պահանջում:

Ընդսմին, ըստ հետազոտության համահեղինակ, Մոնրեալի համալսարանի Կինեզիոլոգիայի և ֆիզիական ակտիվությունն ուսումնասիրող դպրոցի դոցենտ Օլիվյե Դյուպուիի՝, նա և իր գործընկերները կարծում են, որ կրիոխթանումը կարող է հատկապես օգտակար լինել քնի խնդիրներ ունեցող մարդկանց համար: Նշենք, որ հետազոտությունն անցկացվել է այն մարդկանց վրա, ովքեր նման խնդիրներ չեն ունենում։

Ի դեպ, այս հետազոտությունը Դյուպուիի թիմի ավելի մեծ՝ կրիոխթանման առողջության օգուտներն ուսումնասիրող նախագծի մի մասն է: Այլ հետազոտությունները ցույց են տվել, որ այն կարող է պոտենցիալ կերպով թեթևացնել ցավն ու բորբոքումը: