Տեղի ունեցավ տարվա ամենաաստղային հարսանիքը. Աշոտ Կարապետյանն ու Լիլիթ Համբարյանն ամուսնացան

Դուդուկ նվագող հարս, «Բերդ» պարող փեսա, բազմաթիվ երգերի պրեմիերաներ… Այսպիսին կարող էր լինել միայն դերասան, հաղորդավար շոումեն ԱՇՈՏ ԿԱՐԱՊԵՏՅԱՆԻ եւ երգչուհի, դերասանուհի ԼԻԼԻԹ ՀԱՄԲԱՐՅԱՆԻ հարսանիքը: 

Այո՛, այն գեղեցիկ սիրո պատմությունը, որի բոլոր խենթություններն ու արկածները, ռոմանտիկ երեկոները եղել են հեռուստադիտողների աչքի առաջ՝ ATV-ով հեռարձակվող ռեալիթի շոուի շրջանակներում, հասավ իր բաղձալի ու կարեւոր փուլին: Նոյեմբերի 13-ին Արաբկիրի Սուրբ Խաչ եկեղեցում՝ խորանի առաջ Աշոտ Կարապետյանը խոստացավ տեր լինել Լիլիթ Համբարյանին, նա էլ վստահեցրեց, որ լինելու է հնազանդ: 

Ի դեպ, հիշեցնենք, որ Աշոտն ու Լիլիթը դեռեւս 2022 թվականից հանրությունից չէին թաքցնում իրենց հարաբերությունները: Նրանց միասին լուսանկարները սոցցանցերում հայտնվեցին ուղիղ երկու տարի առաջ, իսկ ահա երկու տարի անց՝ Աշոտն ու Լիլիթն արդեն ամուսիններ են:

Նշենք, որ հարսանեկան արարողությանը ազաբն ու հարսանաքույրը մեկի փոխարեն երկուսն էին. հարսնաքրոջ պարտականությունները ստանձնել էին «Հայ Սուպերսթար» 4-ի ֆինալիստ եւ «Հայաստանի ձայնը 3»-ի հաղթող Ռայիսա Ավանեսյանը եւ դերասանուհի, երգչուհի Աննա Գրիգորյանը, իսկ ազաբներից մեկը՝ շոումեն Արթուր Կարապետյանն էր՝ Աշոտի հարազատ եղբայրը: Տոնական երեկոյին ներկա էր մի ողջ աստղաբույլ, այդ թվում՝ դերասաններ Հայկ Հովհաննիսյանը, Անահիտ Մանուկյանը, Արմեն Դալլաքյանը, Սեւակ Հարությունյանը, Ագնեսա Շահնազարյանը, երգիչներ Սենչը, Ռուբեն Սասունցին, Օքսաննա Բաբուրյանը, Հայկ Ղուլյանը, Արսեն Հայրապետյանը, Նարինե Մկրտումյանը, Լիլուշ Պետրոսյանը, Դիանա Հարությունյանը, հաղորդավար Արայիկ Հարությունյանը, երաժիշտ Սարգիս Ավագյանը, Վիվալդի Բենդը (գեղ. ղեկավար՝ Արման Դաշյան) եւ այլք:

Հարսանեկան արարողությունը հատկանշվեց երգի պրեմիերաներով եւս: Նախ հարսնացուն՝ Լիլիթ Համբարյանը, կատարեց հատուկ այդ օրվա համար Րաֆֆի Ալթունյանի կողմից գրված երգը՝ նվիրելով այն փեսացուին: Երգի ժամանակ նա նաեւ դուդուկ նվագեց: Իսկ հետո կայացավ նաեւ երգչուհի Լիլուշ Պետրոսյանի նոր երգի պրեմիերան: 

Դե, իհարկե, Աշոտ Կարապետյանը «տակ մնացողներից» չէ, «Մագա դանս ստուդիո»-յի պարուհիների ուղեկցությամբ Լիլիթ Համբարյանի հարսի պարին հաջորդեց, ո՛չ ավել, ո՛չ պակաս Աշոտ Կարապետյանի պարը՝ այն էլ «Բերդ»: Նրան այս հարցում աջակցեց Hakobyans wedding պարային համույթը: Երեկոն թեժ էր՝ ճիշտ Աշոտ եւ Արթուր Կարապետյան եղբայրների կազմակերպած միջոցառումներին բնորոշ:

Իսկ մեզ մնում է անսահման երջանկություն մաղթել նորապսակներին եւ ցանկանալ անամպ երկինք, ներդաշնակություն ու խաղաղություն իրենց նորաստեղծ ընտանիքում:

ՀՐԱՆՏ ՍԱՐԱՖՅԱՆ