Խաչիկ Ասրյանը վերջնականապես մերժել է Արշակ Կարապետյանին եւ չեղարկել ստորագրված համագործակցության հուշագիրը

«Հայոց Արծիվներ. Միասնական Հայաստան» կուսակցության նախագահ, «Հայոց Արծիվներ» կամավորական մարտական ջոկատի հրամանատար, գնդապետ ԽԱՉԻԿ ԱՍՐՅԱՆԸ մերժել է ՀՀ պաշտպանության նախկին նախարար Արշակ Կարապետյանին եւ նրա հովանավորներին՝ մասնակցելու Բագրատ արքեպիսկոպոս Գալստանյանի միտինգներին ու դուրս է եկել «Համահայկական Ճակատ» շարժումից: Այս մասին փորձեցինք մանրամասներ պարզել Խ. Ասրյանից, սակայն նրա հետ կապ հաստատել չհաջողվեց, սակայն ավելի ուշ պարզեցինք, որ նա հայտարարությամբ է հանդես եկել:

Խ. Ասրյանը մասնավորապես նշել է, որ «Հայոց Արծիվներ․ Միասնական Հայաստան» կուսակցությունը սույն թվականի մարտի 1-ին Մոսկվա քաղաքում համագործակցության հուշագիր էր ստորագրել ՀՀ Պաշտպանության նախկին նախարար Արշակ Կարապետյանի կողմից հիմնադրված «Համահայկական Ճակատ» շարժման հետ՝ նպատակ ունենալով՝ համատեղ ուժերով փրկել, պաշտպանել, հզորացնել Հայաստանը՝ ասել է թե՝ Հայոց Հայրենիքն ու Հայոց պետությունը, հերթական անգամ ազատագրել Արցախը, պահպանել եւ հզորացնել Հայաստան-Ռուսաստան ռազմաքաղաքական դաշինքը։

«Սույն թվականի մայիսի 9-ից սկսած՝ Արշակ Կարապետյանի հետ իմ հիմնական հակասությունները վերաբերել են Երեւանում տեղի ունեցող՝ Բագրատ արքեպիսկոպոս Գալստանյանի կողմից առաջնորդվող՝ «Տավուշը՝ հանուն Հայրենիքի» կամ «Սրբազան պայքար»-ի միտինգներին մասնակցել-չմասնակցելուն. մենք կողմ ենք մասնակցելու միայն այն միտինգներին, որոնք կազմակերպում ենք բացառապես մենք։ Վերջին 33 տարիների ընթացքում իմ՝ Հայաստանում ծավալած ազգային, պետական, ռազմական, քաղաքական գործունեության ժամանակ ձեռք բերած փորձից ելնելով՝ համոզված եմ, որ Բագրատ արքեպիսկոպոս Գալստանյանի կողմից առաջնորդվող միտինգները՝ Հայաստանում իշխանափոխություն իրականացնելու համար, կեղծ օրակարգ են՝ կեղծ գործողություններով։ Ավելին՝ հավաքական Արեւմուտքի աջակցությամբ եւ ուղղորդմամբ Հայաստանում տեղի ունեցող՝ Բագրատ արքեպիսկոպոս Գալստանյանի միտինգների գլխավոր նպատակը ոչ թե Հայաստանում իշխանափոխություն իրականացնելն է, ոչ թե Արցախի հերթական ազատագրումն է, ոչ թե Հայաստանի տարածքային ամբողջականության վերականգնումն ու պահպանումն է, այլ Հայաստանի քաղաքական ընդդիմադիր դաշտը միշտ զբաղեցնելն է՝ մինչեւ Ազգային ժողովի հաջորդ ընտրությունները, ուստի՝ կտրականապես դեմ եմ եղել այդ կեղծ միտինգներին «Համահայկական Ճակատ» շարժման հետ համագործակցող կուսակցությունների մասնակցությանը», - նշել է Ասրյանը:

Ըստ «Հայոց Արծիվներ. Միասնական Հայաստան» կուսակցության նախագահի` հաշվի առնելով այն, որ սույն թվականի հոկտեմբերին Երեւան քաղաքում տեղի ունեցած հեռակապով ժողովի ընթացքում կրկին Արշակ Կարապետյանի եւ նրա հովանավորների կողմից եղել է որոշում, թե՝ «Համահայկական Ճակատ» շարժման հետ համագործակցող կուսակցությունները պետք է մասնակցեն Բագրատ արքեպիսկոպոս Գալստանյանի միտինգին եւ հետո ինչ-որ թղթեր բաժանեն, նույն ժողովի ընթացքում ինքը հերթական անգամ ու վերջնականապես մերժել է Արշակ Կարապետյանի եւ նրա հովանավորների այդ որոշումը, ինչպես նաև չեղարկել է «Հայոց Արծիվներ․ Միասնական Հայաստան» կուսակցության եւ «Համահայկական Ճակատ» շարժման միջեւ ստորագրված համագործակցության հուշագիրը ու դուրս եկել «Համահայկական Ճակատ» շարժումից։

Հիշեցնենք, որ ավելի վաղ «Համահայկական Ճակատ» շարժումից դուրս էր եկել  նաեւ շարժման համահիմնադիր, ռազմական-քաղաքական գործիչ Գեւորգ Գեւորգյանը, շարժման հետ դադարեցրել էր համագործակցությանը «Հայկական երազանք» կուսակցության նախագահ Արմեն Մկրտչյանը, շարժման ղեկավար կազմից դուրս էր մնացել կուսակցության գլխավոր քարտուղար ընտրված Արաբկիրի նախկին թաղապետ Հովհաննես Շահինյանը: