Ավինյանին ասեցին, չարեց

Երեւանի քաղաքապետ Տիգրան Ավինյանն իր նախընտրական քարոզարշավի ժամանակ ասում էր. «Ասեք, կանենք», բայց երեւանցին ասում է, անող չկա: Այն խայտառակ իրավիճակը, որը տիրում է մայրաքաղաքում, ամենեւին չի հուշում, թե Երեւանն ունի քաղաքագլուխ: Բայց ինչո՞վ է պայմանավորված այն, որ Նիկոլ Փաշինյանը ո՛չ տեսնում, ո՛չ էլ փորձում է խառնվել հարցին, էլ ավելի ուշագրավ է: Ըստ էության, ինչպես նախկին քաղաքապետ Հայկ Մարությանի դեպքում՝ Փաշինյան Նիկոլը որոշել է թողնել, որ Տիգրան Ավինյանը տապալվի մինչեւ վերջ, որպեսզի բնական դառնա նաեւ նրան քաղաքական աղբանոցը նետելու օպերացիան: Այո՛, թերեւս այսպես է Նիկոլ Փաշինյանը չեզոքացնում իր հնարավոր մրցակիցներին թիմի ներսում: Դե իսկ Երեւանի քաղաքապետ հեռացնելու փորձ, ՔՊ-ն արդեն իսկ ձեռք է բերել. քաղաքապետին փոխքաղաքապետով փոխելը մեկից մեկ է (Ավինյանի տեղակալ Արմեն Փամբուխչյանի ականջն էլ կանչի): Բայց ստեղծված իրավիճակում առավել հատկանշական է Արամ Զավենիչի «Հանրապետություն» կուսակցության դիրքավորումը: Փաստացի Երեւանի ավագանիում լինելով ՔՊ-ի թուղթութանաքով ստորագրած գործընկերը, ստանձնելով տարբեր պաշտոններ քաղաքապետարանում ու վարչական շրջաններում` Զավենիչենք բոլորովին մտահոգության, նույնիսկ կենդանության նշույլներ ցույց չեն տալիս քաղաքային խնդիրների հարցում: Թողես` Արամ Զավենիչը ժամերով աշխարհաքաղաքական հարցերից խոսի, բայց մի քաղաք կառավարելու էլ, պարզվում է, ունակ չեն:

ԵՐԵՎԱՆՈՒՄ ԱՊՐԵԼԸ ԴԱՐՁԵԼ Է ՎՏԱՆԳԱՎՈՐ ԱՌՈՂՋՈՒԹՅԱՆ ՀԱՄԱՐ

Իսկ հիմա խոսենք փաստերով. դե չինովնիկների երեխաները Դիսնեյ Լենդ են գնում, դժվար թե իմանան` ինչ իրավիճակում է Մանկական երկաթուղին: Բայց շարքային քաղաքացու հին սիրելի վայրը վերածվել է աղբանոցի: Քամուց պոկված ու գետնին թափված ծառերն ու հաստ ճյուղերը տպավորություն են թողնում, որ հենց նոր ցունամի է եղել, տեղյակ չենք եղել: Իսկ երկաթուղին վաղուց չի աշխատում, վագոններն էլ օգտագործվում են որպես հարբեցողության եւ թմրամիջոցների օգտագործման ապահով վայր։ Ցավոք, երբեմնի ապահով մայրաքաղաքն էլ առաջվանը չէ. մի կողմից` տարբեր այգիներ են իբր վերականգնում, լուսանկարվում ու հիանում իրենք իրենցով, մյուս կողմից` եղածն են անտերության մատնում:

«Էկո-մեդիա» լրագրողական ցանցի համահիմնադիր Նարինե Կիրակոսյանն ահազանգում է, որ Երեւանում ապրելը, էկոլոգիական տեսանկյունից, վտանգավոր է առողջության համար։ Պարզվում է՝ Երեւանում օդի՝ փոշով աղտոտվածության ցուցանիշը, ինչպես նաեւ ծծմբային գազի պարունակությունը գերազանցում է թույլատրելի չափը: Մինչդեռ ըստ նրա՝ պատկան մարմինները կանխարգելիչ գործողություններ չեն ձեռնարկում աղտոտվածության մակարդակը նվազեցնելու կամ էլ ձեռնարկած միջոցները բավարար չեն եղած խնդիրները վերացնելու համար: Նրա խոսքով՝ Երեւանում ապրելը, էկոլոգիական տեսանկյունից, վտանգավոր է առողջության համար։

«Երեւանը թունավորվում է «Նուբարաշենի» աղբանոցի այրումի, մեքենաների ֆիլտրերի բացակայության եւ սաղարթախիտ ծառեր չունենալու պատճառով: Երեւանի քաղաքապետարանի «Կանաչապատում եւ շրջակա միջավայրի պահպանություն» ՀՈԱԿ-ն ուղղակի թոզ է փչում մեր աչքերին։ Մինչեւ ծառահատումներ անելն այդ կառույցի աշխատակիցները մեր կազմակերպության հետ եւս խորհրդակցություն ունեցան։ Ես առաջարկեցի ուսումնասիրել, թե ինչ ծառեր են տնկվել Խորհրդային Միության ժամանակ։ Խոսեցինք սոսիների, մագլցող բույսերի մասին, որոնք շատ հող չեն պահանջում, բայց էկոլոգիական մեծ նշանակություն ունեն։ Բայց իրենք որոշեցին թեղիները հատել՝ պատճառաբանելով, թե դրանք հիվանդ են ու նոր ծառատեսակներ բերվեցին, որոնք չեն կարող չեզոքացնել ծծմբի գազի հետեւանքները։ Դա կարող են անել կաղնին, կեչին, բարդին», - նշում է Կիրակոսյանը եւ ընդգծում, որ քաղաքապետարանի համապատասխան կառույցը ուղղակի հանցավոր գործողություն է անում` թանկարժեք ծառեր առնելով եւ մեծ սաղարթով ծառերը կտրելով։ Բացի այդ, Արզնի տանող ճանապարհին շաբաթը մեկ ոչնչանում են սարերը, որոնք քարի, ավազի, շեբենի հանքեր են։ Եվ քանի որ Երեւանը կախվածություն ունի քամիներից, դրանք այդ փոշին բերում են այնտեղից։ Ըստ էության, ստացվում է, որ այսօրվա դրությամբ Երեւանում մաքուր օդ չկա:

ԽԱՅՏԱՌԱԿ ԻՐԱՎԻՃԱԿ՝ ՇԻՆԹՈՒՅԼՏՎՈՒԹՅՈՒՆՆԵՐԻ ՈԼՈՐՏՈՒՄ

Ակներեւ է, որ մայրաքաղաքում շենքերը սնկի պես աճում են: Այնպիսի տպավորություն է, որ Տիգրան Ավինյանը ոչ մեկի չի մերժում, ասել են կառուցում ենք, անում են: Թե դրանցից քանիսն են ապօրինի, չկասկածեք, մի օր դա էլ է դառնալու աղմկոտ բացահայտման գլխագիր, երբ այլեւս Տիգրան Ավինյանին հեռացնելու պահը հասունանա: Ավելին՝ երբ ուսումնասիրում ես, թե ովքեր են շենքեր կառուցում, ովքեր՝ թաղամասեր, այնպիսի տպավորություն է, որ Տիգրան Ավինյանը վաղուց հեռացել է ոչ թե իշխանությունից, այլ Նիկոլ Փաշինյանից ու հիմա որոշ ընդդիմադիրների հետ է գործ բռնում: Երեւանը, կարծես, դարձել է որբի գլուխ, ով գլուխը շոյում է՝ արտոնություն է ստանում շինարարություն սկսելու:

Մի այլ պատմություն է փոսալցումներն ու ասֆալտապատումը: Այն, որ հերթական բյուջեի մսխումն է իրականացվում անորակ փոսալցումներով, արձանագրում են քիչ, թե շատ ընդդիմադիր ավագանիները։ Իսկ այն, որ ոչ նորմալ գծանշում է արվում, ոչ նորմալ՝ ասֆալտ, այս հարցում պրոֆեսոր պետք չէ լինել, նկատելու համար:

«Երեւանում ամիսներ առաջ քաղաքային «իշխանությունը» ավտոմեքենաների կայանատեղին, այն է՝ կարմիր կետագծերը, թանկացրեց՝ տարեկան վճարը հասցնելով 160.000 դրամի։ Այս խայտառակ ու անհեռատես որոշումը պայմանավորեցին կենտրոնը բեռնաթափելու ֆեյք բացատրությամբ։ Հանգստյան սեզոնին Երեւան քաղաքում տեղաշարժվելը նույն կերպ դժվար է ու բարդ, մեքենա կայանելը՝ մեծ խնդիր։ Մի քանի օր հետո սկսվելու են դասապրոցեսն ու ակտիվ աշխատանքային սեզոնը։ Երեւանը վերածվելու է խցանված մի քաղաքի, որն անհնար է լինելու կառավարել։ Սա եւս ապացույց է, որ քաղաքային ժամանակավոր «իշխանությունը» ձախողել է հերթական «ռեֆորմը», - արձանագրում է ընդդիմադիր ավագանու անդամ Գեւորգ Ստեփանյանը, ում գնահատմամբ՝ ամեն բան թանկացնելու մոլուցքով առաջնորդվողներն արժանանալու են քաղաքացիների ամենօրյա «դրական» վերաբերմունքին. «Չէին ասել՝ թանկացրե՛ք․ ասել էր 9%-ը, ու հիմա իրենք էլ են ձեզ «ողջունում»։

Ամեն բան ձախողած չինովնիկները պետք է ազատեն անիմաստ զբաղեցրած աթոռները»։

Եվ այսպես կարելի է անվերջ խոսել երեւանյան խնդիրների մասին, այդպես էլ չկարգավորված տրանսպորտի, նոր մետրոյի կայարանը փնտրող ու այդպես էլ չգտնող աջափնյակցիներին: Բայց այս ամենը չի հուզում հեծանվորդ Նիկոլ Փաշինյանին, չար լեզուներն ասում են, թե բորբոքված թեժ աշունը հանգցնելու լավագույն տարբերակը մի կարկառուն թիմակցի «զոհաբերելն է», եւ այդ մարդը, կարծես թե, արդեն նշանակված է: Չի հեռանա լավով՝ մի քրեական գործ էլ իր վրա կկարվի:

ՀՐԱՆՏ ՍԱՐԱՖՅԱՆ

Այս թեմայով Հայի հետին խելք. ԸՆԿԵՐ ՓԱՆՋՈՒՆԻ Գաղտնիքի խնդիր չկա, կա դիվանագիտական կոռեկտության հարց. Փաշինյանը՝ խաղաղության պայմանագրի կետերը չհանրայնացնելու մասին (տեսանյութ) Պատրաստ եմ ջանք գործադրել ՀՀ-Չինաստան հարաբերություններն առավել զարգացնելու համար․ Փաշինյան Երևանի Նիկոլ Աղբալյանի անվան թիվ 19 դպրոցում առավոտյան երեխաներին տարհանել են Փաշինյանն առաջարկում է հայի ետին խելքը առաջ բերել