Մարդ կա նույնիսկ տկլոր է դուրս եկել, առանց մի փոխնորդի. Իրավիճակը Ստեփանակերտի հրապարակում

Ադրբեջանի վերջին ռազմագործողության հետևանքով Արցախի տարբեր շրջաններից տարհանված հազարավոր  արցախցիներ շարունակում են մնալ Ստեփանակերտի Վերածննդի հրապարակում:

Այստեղ հիմնականում տարեցներ, կանայք ու երեխաներ են. արդեն 5-րդ օրն է՝ ոմանք բաց երկնքի տակ են գիշերում, ոմանք մեքենաներում, որոշներն էլ վրաններ են տեղադրել:   Սնունդը, վառելափայտը, խմելու ջուրն այստեղ հայթայթում են՝ ով ինչպես կարողանում է:

Հաթերքի բնակիչ 78-ամյա Վալերի Հայրապետյանը հրապարակից մեզ հետ զրույցում մի կերպ արցունքները խեղդելով պատմում է գլխին եկածը. «Հազիվ եք դուրս եկել հայրենի գյուղից, հապճեպ, ոչինչ չենք հասցրել մեզ հետ վերցնել: Առավոտյան ասացին՝ գյուղը հայաթափվում է, թուրքը մտնում է: Մարդ կա նույնիսկ տկլոր է դուրս եկել, առանց մի փոխնորդի»,- պատմում է տարեց տղամարդը:

ԱՐԿԵՐԻ ՏԱՐԱՓԻՑ ՄԱԶԱՊՈՒՐԾ ԱՐՑԱԽՑԻՆԵՐԸ ԻՐԵՆՑ ՓՈՔՐԻՇԱՏԵ ԱՊԱՀՈՎ ԵՆ ՀԱՄԱՐՈՒՄ ՌՈՒՍ ԽԱՂԱՂԱՊԱՀՆԵՐԻ ՄՈՏ

Արկերի տարափից մազապուրծ արցախցիները իրենց փոքրիշատե ապահով են համարում ռուս խաղաղապահների մոտ, այդ պատճառով է, որ չեն ցանկանում լքել օդանավակայանի տարածքը: «12 շնչով մաշինների մեջ ենք քնում»,- ասում է տեղահանված կինը:

Այստեղ տեղավորվել ոչ միայն հեռու գյուղերից տեղահանվածները, այլ նաեւ շրջակա տարածքների բնակիչները. «Սկզբում իջանք նկուղները, հետո ռուս խաղաղապահները եկան ու ասացին, որ այստեղ ավելի ապահով է, նպատակ էլ չունենք այստեղից հեռանալ, որովհետեւ մեզ ոչ մի տեղ ապահով չենք զգում: Դե լուրեր են պտտվում, որ արդեն թուրքի հետ ինտեգրացված ենք, բայց մենք չենք կարող ապրել թուրքի հետ»,- ասում է արցախցի կինը:

Տեղահանվածները այլեւս հնարավոր չեն համարում վերադարձը հայրենի բնակավայրեր: Նրանք այլեւս Արցախում իրենց ապագան չեն պատկերացնում, միակ պահանջն է՝ միջանցք տրամադրել հայրենիքից դուրս գալու համար:

«Ո՞նց գնանք մեր տուն, եթե բանակ չունենք, ոստիկանություն չունենք, մեզ ո՞վ է պաշտպանելու: Մենք թուրքի հետ անելիք չունենք, եթե ինտեգրացիա է, բացառվում է հետ գնալը»,-ասում է կինը:

Հրապարակում գիշերակացով տեղավորված արցախցիների մի մասն էլ հստակ տեղեկատվություն չունեն՝ մնալու են, տարհանվելու են, ինչպես են պաշտպանվելու։ Արցախցի մի կին պատմում է.«Ասում են իբր հայկական կողմը չի ցանկանում արցախցիների առջև դուռ բացել,ասում են ռուսներն են իբր ասել, բայց ես ու իմ նման շատերը կոնկրետ ռուսներից ես նման բան չենք լսել, բայց բոլորն այդ թեմաներից են խոսում, որ եթե մարդասիրական միջանցք էլ բացվի, Ադրբեջանը համաձայնի բացել, Հայաստանը մեզ չի ընդունելու։ Ճիշտ է՝ ես չեմ հավատում նման խոսակցությունների, Հայաստանը մենակ երկրի ղեկավար վարչապետը չի։ Եթե չընդունեց էլ, թող միջանցք տա, մենք դուրս գանք ուրիշ երկիր։ Այստեղ ավելի շատ Ադրբեջանն ու Ռուսաստանն են, որ չեն թողնում մենք այստեղից դուրս գանք»: