Ոճաբան Անի Ավդալյանը` աշխարհի առաջնությունում

Ոճաբան, վարսահարդար Անի Ավդալյանի թիմը մասնակցելու է սեպտեմբերի 9-11-ը Փարիզում կայանալիք Վարսահարդարների եւ դիմահարդարների աշխարհի առաջնությանը՝ (HAIRWORLD OMC WORLD CUP) Հայաստանը ներկայացնելով մի քանի անվանակարգերում:

Ավդալյանի խոսքով՝ առաջնությունը ոլորտի ամենահեղինակավոր իրադարձություններից է, որի ժյուրիի անդամները բարձր պրոֆեսիոնալներ են, խիստ են դատում յուրաքանչյուր աշխատանք:

«Առաջնությանը մասնակցում են ոչ միայն վարսահարդարներ եւ դիմահարդարներ, այլեւ գեղեցկության բնագավառի այլ մասնագետներ: Ինքս ժամանակին մասնակցել եմ OMC-ի Եվրոպայի առաջնությանը, աշխարհի առաջնությանը, արժանացել մրցանակների, սակայն ոչ մի անգամ Հայաստանը թիմով հանդես չի եկել»,-շեշտում է Անի Ավդալյանն ու տեղեկացնում՝ իր թիմում ընդգրկված են 11 պրոֆեսիոնալ մասնագետներ, որոնք աշխատում են ինչպես Հայաստանում, այնպես էլ արտերկրում:

Նրանք ներկայանալու են չորս անվանակարգում`

«Կրեատիվ գույն եւ ոճ» (CREATIVE H. COLOR & STYLE) անվանակարգում յուրաքանչյուր մասնակից պետք է ցուցադրի իր ստեղծագործական միտքը, աշխատի վրձնով, մազերի հետաքրքիր գունային խաղ ստանա: Նրանք պետք է ապահովեն գույների մաքրություն, ցույց տան իրենց երեւակայության թռիչքը, որը բարձր է գնահատվում: Աշխատելու են մանեկենների հետ: Այս անվանակարգում Հայաստանից ներկայանալու են Հասմիկ Մանուկյանը, Սարգիս Բաղդասարյանը, Նարինե Գրիգորյանը, Գոհար Թովմասյանը եւ Ռուզաննա Հովսեփյանը:

«Հյուսքերի տեխնիկա եւ ոճ» (TECHNICAL BRAIDED STYLE) անվանակարգում հանդես է գալու Մարտա Քեշիշյանը: Նա պետք է կարողանա քառասուն րոպեում ստանալ այն, ինչ հարկավոր է, ցուցադրել փայլուն տեխնիկա եւ երեւակայություն:

«Կոմերցիոն կտրվածք եւ ոճ» (STREET CUT & STYLE) անվանակարգում կներկայանան Հայկանուշ Մարգարյանն ու Կարինե Հովհաննիսյանը: Մասնակիցները պետք է կարողանան աշխատանքն ավարտել 35 րոպեում՝ ստանալով լավագույն կտրվածքը:

«Հոնքերի շտկում եւ ներկում» (EYEBROWS SHAPING & TINTING) անվանակարգում կներկայանա Քրիստինե Պետրոսյանը, որը վերապատրաստվել է Մոսկվայում՝ դիմահարդար Գոհար Ավետիսյանի ստուդիայում: Նա պետք է հասցնի իր աշխատանքն ավարտել 25 կամ 35 րոպեում:

Անի Ավդալյանը վստահեցնում է՝ եթե մրցանակների չարժանանան, անպայման աչքի են ընկնելու իրենց հիանալի աշխատանքով:

«Շատ կարեւոր է, որ Հայաստանի մասնակիցները տարբերվեն յուրատահուկ ձեռագրով, վառ երեւակայությամբ ու փաստեն, որ չեն զիջում որեւէ մեկին»,- նշում է ոճաբանը: 

Այս թեմայով Կամո Ունանյանը կրկին հաղթանակներով է վերադարձել հայրենիք Հայաստանի կարատեի միության նոր աջակիցն է Կարեն Մարգարյանը Ինչպես է Վարդավառը տոնել աշխարհի բազմակի չեմպիոն Էդգար Սողոմոնյանը Ինչպես է աշխարհի բազմակի չեմպիոն Էդգար Սողոմոնյանը նշել հերթական հաղթանակը Սպորտային կարատեի Աշխարհի եւ Եվրոպայի չեմպիոն Կամո Ունանյանը դժգոհ է ՀՀ կառավարությունից