Մի օր իշխանությունը կհայտարարի, որ Հայաստանը Ռուսաստանի դեսպանատան կարիքը չունի. Բագրատյան.NEWS.am

Ինչո՞ւ է անհրաժեշտ զարգացնել Արեւմուտքի հետ հարաբերությունները՝ Ռուսաստանի հետ հարաբերությունների հաշվին։ Թե՞ դա Արեւմուտքի պահանջն է։ Մի օր իշխանությունը կհայտարարի, որ Հայաստանը Ռուսաստանի դեսպանատան կարիքը չունի։ Այս մասին NEWS.am-ի հետ զրույցում ասաց ՀՀ նախկին վարչապետ Հրանտ Բագրատյանը։ Նա վստահ է, որ Արեւմուտքը կոչ է անում Երեւանին ձեռքերը լվանալ Արցախից եւ ճանաչել այն որպես Ադրբեջանի մաս։ «ՀԱՊԿ-ն օգնություն է առաջարկել, այդ թվում՝ զենք, բայց Փաշինյանը հրաժարվել է եւ քարոզում է, որ ՀԱՊԿ-ն Հայաստանին չի օգնել։ Մոսկվան Հայաստանին ասում է՝ Ադրբեջանի հետ ճանաչեք միմյանց սահմանները։ Ռուսաստանը չի ստիպի Բաքվին, քանի որ դա չի համապատասխանում նրա շահերին՝ համարելով նաեւ, որ Հայաստանի իշխանությունն արժանի չէ դրան։ Ի՞նչ է նշանակում ՀԱՊԿ երկրների հինգ նախագահներին ասել՝ «ասեք, թե որտեղ է անցնում Հայաստանի սահմանը»։ Եթե իշխանությունը ճիշտ է, ինչո՞ւ չեն նախաձեռնում Հայաստանի դուրսբերումը ՀԱՊԿ-ից։ Ե՛վ Ֆրանսիան, ե՛ւ ԱՄՆ-ն զգուշացրել են Հայաստանին, որ Երեւանը դուրս չգա կազմակերպությունից, քանի որ դա զսպող գործոն է։ Նրանք խոստովանեցին, որ Հայաստանին չեն օգնի»,-ընդգծեց Բագրատյանը։

Նա կարծում է, որ ԵՄ դիտորդները ոչինչ չեն զսպում։ «Արդյո՞ք դիտորդները կմեկնեն Լաչին, որը մենք վստահել ենք ռուսներին։ Ենթադրենք՝ գնացել են ու ֆիքսել են, որ Ադրբեջանը փակել է միջանցքը, հետո ի՞նչ։ Փաշինյանն ուզում է բախո՞ւմ հրահրել նրանց եւ ռուսների միջեւ»,-հարց ուղղեց նախկին վարչապետը։