Ցավակցում եմ Հայաստանին` ՄԻՊ պաշտոնի հանդեպ այսպիսի վերաբերմունքի համար. Ալավերդյան

ՄԻՊ Քրիստինե Գրիգորյանի` առանց մեկնաբանության հրաժարականի մասին «Իրավունքը» զրուցել է ՀՀ Մարդու իրավունքների առաջին պաշտպան ԼԱՐԻՍԱ ԱԼԱՎԵՐԴՅԱՆԻ հետ:

— ՄԻՊ աշխատակազմը հայտնում է, որ Պաշտպանը հրաժարական է ներկայացրել այլ աշխատանքի անցնելու կապակցությամբ՝ նշելով, որ «պատշաճ պահի Գրիգորյանը հանրությանը կտեղեկացնի այլ աշխատանքի մասին տեղեկություն, իսկ մինչ այդ ձեռնպահ կմնա այս թեմայով որեւէ մեկնաբանությունից»: Ի՞նչ կասեք այս մասին:

— Նախեւառաջ ես պետք է ասեմ, որ ըստ Սահմանադրության` Հայաստանում ամեն մարդ իրավունք ունի դիմել Մարդու իրավունքների պաշտպանին, դրա համար պետք է այնպես կազմակերպվի, որ այդ պաշտոնը թափուր չմնա: Այսինքն` ՄԻՊ-ը պետք է շարունակի իրականացնել իր գործառույթները եւ պաշտոնը զբաղեցնի մինչեւ չընտրվի նորը: Սա առաջինն է, ինչն այս օրերին շատերին եմ բացատրում: Երկրորդ` ես ցավակցում եմ Հայաստանին` ՄԻՊ պաշտոնի եւ այդ հաստատության հանդեպ այսպիսի վերաբերմունքի համար: Միշտ համարել եմ, որ Մարդու իրավունքների պաշտպանը պաշտոն չէ, այլ առաքելություն է: Եվ այդ առաքելությունը լքել այլ պաշտոնի անցնելու համար` համարում եմ առաջին հերթին իջեցում` ցանկացած պաշտոն գործադիր իշխանությունում: Եվ երկրորդ`  այդ վերաբերմունքը՝ լինի գործադիրի կողմից, լինի տիկին Գրիգորյանի կողմից, համարում եմ ոչ ընդունելի: Սա հարված էր ՄԻՊ հաստատությանը: Կոչ եմ անում մարդկանց մերժողական վերաբերմունք չունենալ այդ հաստատության հանդեպ եւ բոլորին հիշեցնում եմ, որ ՄԻՊ հաստատությունը կարեւորագույն օղակ է իրավական պետություն դառնալու ճանապարհին:

— Որքանո՞վ եք ընդունելի համարում, որ Ազգային ժողովի ընտրված Մարդու իրավունքների պաշտպանն ազատվում է աշխատանքից` որեւէ լուրջ պատճառաբանություն չներկայացնելով:

— Արդեն ասացի, որ այդ վերաբերմունքը վրդովեցնում է ինձ, ես ուրիշ խոսք չեմ ուզում օգտագործել, նա երիտասարդ անձ է, նա դեռ կյանք ունի ապրելու, ցանկանում եմ միայն հաջողություններ, բայց այդպիսի վերաբերմունքը ՄԻՊ հաստատությանը վրդովեցնող է: Ի դեպ, ես միշտ եմ դա արտահայտել, երբ  մարդու իրավունքների պաշտպանը լքել է իր պաշտոնը, ինչպես դա արել է Արմեն Հարությունյանը ՝ այլ աշխատանքի անցնելու համար: Նա հաղթել է մրցույթում եւ ՄԱԿ-ի կողմից ընդգրկվել է աշխատակազմի մեջ: Լինի դա Կարեն Անդրեասյանի ժամանակ, երբ ինքն ուղղակի հրաժարական է տվել՝ համարելով, որ ճնշումները շատ են: Ես դա ընդունում եմ վրդովմունքով: Կարծում եմ` շատ ավելի մեծ ակնածանքով պետք է վերաբերվել այդ պաշտոնին:

— Փաստորեն, ՄԻՊ-ը վերջին ողբերգական դեպքի` 15 զինվորի այրվելու վերաբերյալ առանց արտահերթ զեկույց ներկայացնելու հեռացավ: Հնարավո՞ր է, որ հենց սա էր պատճառը` հապշտապ հրաժարականի, որպեսզի խուսանավի ներկայացնել իրականությունը:

— Ես երբեք կռահելու մեծ տաղանդ չեմ ունեցել, եւ ցանկացած այդպիսի վարկածները, ցանկացած իրավիճակ միայն ու միայն ՄԻՊ-ի մոբիլիզացման առիթ պետք է ծառայի: Այլ տարբերակ ինքս անձամբ չեմ տեսնում: Էլի եմ ասում՝ ցանկանում եմ հաջողություններ ցանկացած պարագայում, կյանքում, բայց ափոսում եմ, որ երիտասարդ մասնագետն այս փորձությանը չդիմացավ կամ գայթակղվեց: Դա պարզ կդառնա հետագայում:

ԼԻԼԻԹ ՀԱՐՈՒԹՅՈՒՆՅԱՆ

Այս թեմայով Մենք էդ ազգը չե՛նք, որ նվնվանք ու վնգստանք, թշնամուն պիտի սարսափ կերցնենք. Գրիգոր Գրիգորյան Փոստանջյանը չէր գոռո՞ւմ, որ Քոչարյանը պետական դավաճան ա...ինքնասիրություններդ լավ ա՞. Գեւորգ Գրիգորյան Ադրբեջանն անթաքույց պատրաստվում է ցեղասպանական հերթական ագրեսիայի. Լարիսա Ալավերդյան Փաստորեն, դեղերը այլեւս միայն կապիտուլյանտին չեն, որ պետք են. Միքայել Գրիգորյան Պահպանենք մեր ազգային ինքնությունը. մեկնարկում է «Գութան» Հայաստանի ազգային-ավանդական երգի-պարի ամենամյա փառատոնը