Ինչո՞ւ Բերձորի միջանցքը չփակվեց 5-6 ամիս առաջ. քաղաքագետը փակագծեր է բացում
ՆերքաղաքականՔաղաքագետ ԲԵՆԻԱՄԻՆ ՄԱԹԵՎՈՍՅԱՆԻ պնդմամբ` Պրահայում Հայաստանի եւ Ադրբեջանի ղեկավարների հանդիպման ժամանակ «խմբագրվել է» 2020 թվականի նոյեմբերի 9-ի հայտարարությունը: Նրա կարծիքով` հենց դրա հետ է կապված Բերձորի միջանցքի հետագա շրջափակումը:
— Ինչո՞ւ Բերձորի միջանցքը չփակվեց 5-6 ամիս առաջ, որովհետեւ այդ ժամանակ նոյեմբերի 9-ի փաստաթուղթը վերախմբագրված չէր: Այն, ինչ տեղի ունեցավ Պրահայում, վերահաստատեց Հայաստանի եւ Ադրբեջանի պաշտոնյաների բանակցությունների արդյունքում ձեռքբերված համաձայնությունը: Նոյեմբերի 9-ի փաստաթղթի մեջ Արցախի կարգավիճակի վերաբեյալ խոսք չկար, իսկ եթե վերլուծում ենք նախկինում եղած բանակցությունները, ապա տեսնում ենք, որ միշտ մոտեցումը եղել է այն, թե ինչ կարգավիճակ պետք է ունենա Բերձորի միջանցքը, նույնը պետք է ունենա Արցախի Հանրապետությունը: Երբ դու պայմանավորվում ես եւ ճանաչում ես Արցախը որպես Ադրբեջանի մաս, դա նշանակում է, որ ե՛ւ Բերձորի միջանցքը, ե՛ւ տեղի հանքերը, ե՛ւ ցանկացած այլ կառույց, որը գտնվում է Արցախում, Ադրբեջանինն է: Ուստի` տրամաբանական է, որ Ադրբեջանն անելու է այն, ինչ հիմա տեսնում ենք: Նրանք օգտագործելու են բոլոր գործիքները, որ հասնեն իրենց նպատակին: Երկու օր առաջ կանգնած էինք Արցախի պետականության կազմալուծման առջեւ (նկատի ունի Արցախի բարձրաստիճան պաշտոնյաների հրաժարականի եւ ԱԺ արտահերթ ընտրություններ անցկացնելու մասին շրջանառվող լուրերը, - հեղինակ), ինչն ամենակարճ ճանապարհներից մեկն է, որով կարող էին ամրագրվել Պրահայի բանակցությունները: Ցավոք, մեզանում քննարկվում են տեխնիկական լուծումներ՝ նոր ճանապարհ սարքել, օդային միջանցք բացել, բայց եթե հարցը քաղաքական է, ապա դրա լուծումը եւս քաղաքական դաշտում է: