Համբերություն, ուժ եւ անկոտրուն կամք ձեզ, սիրելի արցախցիներ. Մարգարիտա Խաչատրյան
Ներքաղաքական«Հայկական բանակի սիրելի զինվորներ, պարոնայք սպաներ, ազատամարտի վետերաններ, հայրենիքի պաշտպանների ծնողներ, հանուն հայրենիքի կյանքը տված մեր հերոսների հարազատներ, սահմանապահ հայ ժողովուրդ, շնորհավորում եմ Ամանորի եւ Սուրբ ծննդյան տոների առթիվ:
Վերջին տարիներին տոները մեզ համար լիարժեք չեն լինում, քանի որ մեզ հետ չեն մեր հազարավոր հայրենակիցները: Նրանք անմահացան եւ իրենց կյանքի գնով կյանք տվեցին մեզ: Ցավոք, 2022-ին եւս մեր սահմանները խաղաղ չէին: Նենգ թշնամին թիրախավորում է արդեն Սյունիքի, Վայոց ձորի ու Գեղարքունիքի բազմաթիվ քաղաքներ ու գյուղեր: Շնորհիվ մեր քաջ զինվորների, սպաների ու կամավորների թշնամու առաջխաղացումը կասեցվեց: Ցավոք, կրկին, զոհերի գնով: Փա՜ռք նրանց:
Ծանր վիճակում է այսօր մեր վիրավոր Արցախը: Ամանորի երեկոյին բոլորիս սրտերն ու մտքերը Արցախի մեր հայրենակիցների հետ են: Համբերություն, ուժ եւ անկոտրուն կամք ձեզ, սիրելի արցախցիներ:
Առանձնահատուկ ցանկանում եմ շնորհավորել մեր զոհված հերոսների ծնողներին, որոնցից շատերը Ամանորին լինում են Եռաբլուրում: Ձեր որդիների ու հայրերի շնորհիվ այսօր կա Հայաստանն ու Արցախը: Հավերժ փա՜ռք ձեզ ու ձեր հերոս տղաներին: Սիրելի հայրենակիցներ, թող 2023 թվականը լինի առաջընթացի, կայունության եւ ձեռբերումների տարի: Շնորհավոր Ամանոր եւ Սուրբ ծնունդ», - գրել է «Զինվոր» ՀԿ համակարգող խորհրդի նախագահ ՄԱՐԳԱՐԻՏԱ ԽԱՉԱՏՐՅԱՆԸ: