Հենց այդ պարապ վիճակն անցնի, գզվռտոց կոչվածն էլ կանցնի. Սամսոնյան
Ներքաղաքական«Քաղաքացիական գիտակցություն» ՀԿ նախագահ ՆԱՐԵԿ ՍԱՄՍՈՆՅԱՆԻ կարծիքով` վերջին շրջանում նկատվող ընդդիմության միջեւ, այսպես ասած, բախումները, եթե դրանք կարելի է բախում համարել, ներընդդիմադիր տարատեսակ հարցերը, միշտ պարապության հետեւանք են լինում:
— Բազմաթիվ դեպքեր են եղել, որ կասեցվել են դրանք, լուծվել են: Միշտ կողմնակից եմ եղել համերաշխության եւ հիմա էլ շարունակում եմ լինել դրա կողմնակիցը: Պարզապես, պետք է տարբերել ընդդիմությանը քննադատողների մոտիվացիաները: Եթե այդ քննադատության մեջ կա ռացիոնալ հատիկ, որն ավելի լավը կդարձնի ընդդիմությանը, պետք է միշտ ընդունել եւ ոչ սրերով: Եվ հակառակը` նրանք, ովքեր իրականում չարախնդալու, ջուր պղտորելու համար են քննադատում, պետք է կա՛մ անտեսվեն, կա՛մ համարժեք պատասխանի արժանանան: Ընդ որում` անվանական ու այնքան անվանական, ինչքան անվանական անում են` ջուր պղտորելով իրենց մեկնաբանություններով: Հենց այդ պարապ վիճակն անցնի, գզվռտոց կոչվածն էլ կանցնի: Բայց վստահ եմ, որ ընդդիմության գոնե առաջնորդների մակարդակում` լինի քաղաքացիական սեկտորում, թե` քաղաքական, այդ մարդիկ այնքան սթափ են, որ անկախ ամեն ինչից, մեծ պառակտման չեն գնալու: Այդ պառակտումը երբեք լուրջ սպառնալիք չի լինելու: Հուսով եմ, որ այս թեման ավելի լայն քննարկելու կարիք չի լինի:
ՀՐԱՆՏ ՍԱՐԱՖՅԱՆ