Ի վերջո, ովքեր կվերցնեն թափուր մնացած մանդատները. ԿԸՀ-ից փակագծեր են բացում

ԱԺ «Հայաստան» խմբակցության պատգամավորներ Արամ Վարդեւանյանի, Վահե Հակոբյանի, Ելենա Կիրակոսյանի եւ Հռիփսիմե Ստամբուլյանի վայր դրած մանդատները շարունակում են թափուր մնալ: Վաղը լրանում է ժամկետը` Արամ Վարդեւանյանի մանդատը հետ վերցնելու հնարավորության, ուստի` այլեւս ԿԸՀ-ն պետք է որոշում կայացնի, թե ում է փոխանցվում առաջին հերթին Վարդեւանյանի մանդատը: Այս մասին «Իրավունքը» մանրամասներ է պարզել ԿԸՀ մամուլի քարտուղար ՍԵԴԱ ՂՈՒԿԱՍՅԱՆԻՑ:

— Առ այս պահը ովքե՞ր են արդեն իսկ դիմում ներկայացրել ԿԸՀ` պատգամավորական մանդատից հրաժարվելու վերաբերյալ:

— Ռիմա Ղազարյանից, Ռուբեն Մելքոնյանից, Ռոբերտ Հայրապետյանից, Սայաթ Շիրինյանից, Մարիա Պետրոսյանից արդեն ստացել ենք ինքնաբացարկի դիմումներ եւ սահմանված կարգով` ԿԸՀ նախագահի կողմից համապատասխան արձանագրություն արդեն իսկ կազմվել է:

— Ձեր նշած անունների ցանկում չկար Մհեր Սահակյանը, ով ցուցակում նախորդում էր Մարիա Պետրոսյանին եւ Սայաթ Շիրինյանին…

— Մհեր Սահակյանից մենք ինքնաբացարկի դիմում` այս պահի դրությամբ չենք ստացել:

— Իսկ ունե՞ք տվյալներ, թե ընդհանրապես ովքե՞ր են վերցնում իրենց հասանելիք պատգամավորական մանդատները:

— Այս պահին դեռ` ոչ: Ամենայն հավանականությամբ` վաղը ԿԸՀ նիստ տեղի կունենա եւ օրակարգում այդ հարցը ներառված կլինի:

— Ընտրական օրենսգիրքը պահանջում է սեռային համամասնություն` 30 տոկոսի մասով: Այս առումով` հնարավո՞ր է, որ «Հայաստան» դաշինքի ցուցակում մանդատ ստանան ոչ թե նրանք, ովքեր կլինեն ցուցակում հաջորդը, այլ հաջորդ կին պատգամավորի թեկնածուն` հաշվի առնելով, որ մանդատը վայր դրած պատգամավորներից երկուսը կին են:

— «Հայաստան» դաշինքում կա 9 կին պատգամավոր, հետեւապես սեռային հավասարության խնդիր չունեն: Այնպես որ, մանդատ կստանան ցուցակի հաջորդականությամբ նրանք, ովքեր ինքնաբացարկի դիմում չեն ներկայացնի:

Այսպիոսով` համադրելով ԿԸՀ-ից ստացած տեղեկությունները կարող ենք եզրակացնել, որ մանդատ վերցնում են ՀՅԴ-ական Մհեր Սահակյանն ու Արփինե Վարդանյանը, իսկ հաջորդ երկուսը` կարող են լինել Զոլաքարի նախկին համայնքապետ Արման Ղազարյանը եւ «Խայադթա» Հայաստանի Ասորական կազմակերպությունների ֆեդերացիայի նախագահ Իրինա Գասպարյանը:

ՀՐԱՆՏ ՍԱՐԱՖՅԱՆ