Կյանքից հեռացել է Շիրակի երկրագիտական թանգարանի երկարամյա տնօրենը
ՄշակութայինԿյանքի 70 ֊րդ տարում երկրային կյանքից հեռացել է Շիրակի երկրագիտական թանգարանի երկարամյա տնօրենը։ Շիրակի մարզպետարանից տեղեկացնում են, որ երեկ դեկտեմբերի 4-ին, մահացել է մեծանուն երկրաբան, հնագետ, Շիրակի երկրագիտական թանգարանի երկարամյա տնօրեն, հնագիտական բազմաթիվ ուսումնասիրությունների հեղինակ, գիտնական ՀԱՄԱԶԱՍՊ ԽԱՉԱՏՐՅԱՆԸ։ Նա 70 տարեկան էր։ 1987֊2017թթ. մեծանուն գիտնականը եղել է Շիրակի երկրագիտական թանգարանի տնօրենը։ 1997֊ից մինչ այսօր, համատեղությամբ աշխատել է նաև ՀՀ ԳԱԱ Շիրակի հայագիտական հետազոտությունների կենտրոնում, սկզբում որպես գիտքարտուղար, ապա նաև գիտաշխատող։ 2020֊ից, նա Շիրակի Երկրագիտական թանգարանի գլխավոր ֆոնդապահն էր։ 1989 թվականից Խաչատրյանը կազմակերպել և ղեկավարել է Շիրակի երկրագիտական թանգարանի հնագիտական արշավախումբը, որի արդյունքում Շիրակի մարզում հայտնաբերվել են 30֊ից ավելի հնագիտական հուշարձաններ, որոնց մի մասում արշավախմբի կողմից իրականացվել են հնագիտական պեղումներ։
Համազասպ Խաչատրյանը, Շիրակի մարզի պատմամշակութային արժեքների, անգնահատելի գտածոների գիտակն էր Հայաստանում, նա անմնացորդ նվիրումով փայփայում էր Շիրակի երկրագիտական թանգարանի 30 հազարից ավելի նմուշները, մեծ ոգևորությամբ պատմում նրանցից յուրաքանչյուրի պատմությունը։ Նա հեղինակ է շուրջ 70 գիտական հոդվածների, որոնց մի մասը հրատարակվել է արտասահմանյան հայտնի գիտական ամսագրերում։ Ունի հրատարակված 1 մենագրություն։ Խաչատրյանի գիտական վաստակը նշանակալի ներդրում է ունեցել Հայոց հնագույն մշակութային ժառանգության ուսումնասիրության գործում։ Նրա անմիջական ջանքերի շնորհիվ, Եվրոպական գիտական շրջանակներին հասանելի դարձան մեր ժողովրդի հարուստ մշակութային արժեքները և պատահական չէր, որ բազմաթիվ արտերկրյա նշանավոր գիտական կենտրոնների ներկայացուցիչներ և արշավախմբեր, անմիջական մասնակցություն ունեցան Շիրակի հնագիտական ուսումնասիրությունների գործում։ Նշենք, որ Խաչատրյանի երազանքն էր, որ լինի թանգարան նրա գտած բացառիկ ցուցանմուշներով, ցավոք նրա երազանքը այդպես էլ անկատար մնաց։ Ինձ էլ է բախտ վիճակվել ճանաչել անվանի գիտնականին, նա մեր Հայրենյաց գյուղի դամբարանադաշտում էլ էր պեղումներ իրականացնում,իր գործի վարպետն էր, հիանալի անձնավորություն։ Հոգեհանգիստը կկայանա այսօր դեկտեմբերի 5֊ին, Գյումրիի Սուրբ Նշան եկեղեցում ժամը 17։00֊ին, հուղարկավորությունը վաղը դեկտեմբերի 6֊ին ժամը 13։30֊ին ։
Ցավակցում ենք անվանի գիտնականի հարազատներին, ընկերներին կորստի համար։
ՀՈՎՀԱՆՆԵՍ ՍԱՐԳՍՅԱՆ