Հնարավոր չէ ՀՀԿ-ին լռեցնել. Հենրիխ Դանիելյան

ՀՀԿ փոխնախագահ Արմեն Աշոտյանին Քննչական կոմիտեն մեղադրանք է առաջադրել` քրեական օրենսգրքի երկու հոդվածով` իբրեւ «պաշտոնական դիրքի չարաշահում, որն առաջացրել է ծանր հետեւանքներ» եւ «փողերի լվացում»: Խափանման միջոց է ընտրվել երկրից չբացակայելը: Այս եւ այլ թեմաների մասին «Իրավունքը» զրուցել է ՀՀԿ ԵԿ ղեկավար ՀԵՆՐԻԽ ԴԱՆԻԵԼՅԱՆԻ հետ:

— Տեւական ժամանակ է` մամուլում շրջանառվում էր լուրեր, թե շուտով Արմեն Աշոտյանին ձերբակալելու են, նրան նախ չթողեցին պաշտոնական այցով մեկնել երկրից, ապա  Քննչականը որոշեց, թե նա մեղադրյալի կարգավիճակ ունի: Ի՞նչ կասեք այս մասին:

— Արմեն Աշոտյանը շատ հաճախ արտասահմանյան մեր գործընկերների հետ շփումներ է ունենում եւ բարձրաձայնում է բոլոր այն հարցերը, որոնք Հայաստանի Հանրապետությանն ու Արցախին են վերաբերում: Ընդգծում եմ` ոչ թե նեղ անձնական ու կուսակցական շահերի մասին է խոսքը, այլ մեր կուսակցության փոխնախագահը միշտ ներկայացնում է ՀՀ այն խնդիրները, որոնց մասին չեն խոսում այսօրվա իշխանությունները: Արմեն Աշոտյանը քայլեր է ձեռնարկում Նիկոլ Փաշինյանի միջազգային ստերի բացահայտման ուղղությամբ: Երբ Նիկոլ Փաշինյանը ելույթ է ունենում, Արմեն Աշոտյանը դրանից հետո շատ մանրակրկիտ` թղթերով, փաստերով, բացատրում է մեր հասարակությանը, թե ինչու եւ որտեղ է նա խաբում: Վերջիններից էր Մադրիդյան սկզբունքների հետ կապված մանիպուլիացիան, որի վերաբերյալ իրականությունը ներկայացրեց Արմեն Աշոտյանը: Բոլոր այն մարդկանց, ովքեր ինչ-որ տեղ կարող են խանգարել այս իշխանության դավաճանական քայլերին, փորձում են լիկվիդացնել, ձերբակալել, շինծու գործերով լռեցնել: Արմեն Աշոտյանի գործով 70 տարեկան վաստակավոր հայտնի բժշկի տարել-բերել, նեղություն են տվել: Նույնիսկ առավոտյան նրա տուն են գնացել, որ կարողանան ինչ-որ ցուցմունք կորզել: Բայց դա նրանց մոտ չի ստացվել, չի ստացվում եւ չի ստացվելու, որովհետեւ սա շինծու գործ է: Այդպիսի շինծու մեղադրանքներ մենք էլի ենք տեսել, բայց, ամեն դեպքում, հնարավորություն չեն ունենալու մարսել եւ իրենք գիտեն այդ մասին: Դրա համար էլ փորձում են ցուցմունքներ կորզել, մարդկանց ռեպրեսիաների են ենթարկում, որպեսզի գոյություն չունեցող ինչ-որ բաներ գրեն: Բայց չեն հաջողելու, որովհետեւ իրականությունը մի օր բացահայտվելու է: Մենք այսօր տեսնում ենք, որ Նիկոլ Փաշինյանը, ընդդիմադիրներին ձերբակալելով, նրանց ընտանիքների անդամների վրա քրեական գործեր հարուցելով` փորձում է լռեցնել բոլորին: Սակայն մենք չենք լռել, չենք լռում եւ չենք լռելու, հնարավոր չէ ՀՀԿ-ին լռեցնել: Մենք պայքարել ենք, պայքարում ենք եւ պայքարելու ենք` հանուն մեր երկու հայկական հանրապետությունների, եւ դրանում չկա երկրորդ կարծիք:

— ԱԺ «Պատիվ ունեմ» խմբակցությունը հերթական անգամ, որպես սոլիդարության նշան, համաձայնեց «Հայաստան» խմբակցության հետ վերադառնալ խորհրդարան: Չե՞ք կարծում, որ «Հայաստան» դաշինքի օրակարգը` իշխանափոխության հասնելու, չի արդարացել, եւ ժամանակն է, որ ՀՀԿ-ն սեփական օրակարգով առաջնորդվի:

— Մենք մեր վերջին համագումարում նշել ենք, որ ՀՀԿ կուսակցության համար անկյունաքարային նշանակություն ունի ՀՀ անկախությունը, ինքնիշխանությունը եւ Արցախի ժողովրդի ինքնորոշման իրավունքը: Այդ կոնտեքստում մենք քաղաքական քայլեր ձեռնարկում ենք` որպես անկախ, առանձին կուսակցություն: Իսկ մյուս ընդդիմադիր ուժերի հետ` լինի «Հայաստան» դաշինքը, ՀՅԴ-ն, թե այլ գործընկերներ, ունենք մի ընդհանուր մոտեցում` այն է Նիկոլ Փաշինյանին հեռացնել, որովհետեւ նրա իշխանության մնալը վտանգ է մեր պետականության համար: Եթե կան մարդիկ եւ ուժեր, որոնք այդ շրջանակում են մտածում, պատրաստվում են քայլեր ձեռնարկել, մենք հնարավոր ենք համարում համագործակցություն նրանց հետ: Սա նշանակում է համագործակցութուն այդ մի օրակարգի շուրջ: ՀՀԿ-ն եղել է, կա եւ մնալու է քաղաքական խրամատում ու քայլեր է ձեռնարկու` անկախ նրանից, կհամագործակցեն կամ չեն համագործակցի այլ քաղաքական ուժեր մեզ հետ: Մենք, այո՛, բաց ենք եւ պատրաստ ենք լայն համագործակցության, բայց մենք մեր քայլերն անում ենք այն տրամաբանությամբ, որն արդեն նշեցի:

ՀՐԱՆՏ ՍԱՐԱՖՅԱՆ

Այս թեմայով Իրավաբանություն չկա, տուժող չկա, վնաս չկա, ոչինչ չկա, բայց մարդն ազատազրկված է. Տիգրան Աթանեսյան Փաշինյանը վրեժ է լուծում հայ ժողովրդից եւ հայկական պետականությունից. Գագիկ Մինասյան Պատգամավորները երաշխավորություն են ներկայացնում՝ Աշոտյանի խափանման միջոց կալանքը փոխելու համար Դատաիրավական համակարգը դարձել է ազգային գործիչներին լռեցնելու գործիք. Հենրիխ Դանիելյան Նիկոլ Փաշինյանը Հայաստանը վերածել է դժոխային իրականության. Աննա Մկրտչյան