Չեմ կարծում, թե մինչեվ նոր տարի կընդունվի ինչ-որ պայմանագիր. Իսկանդարյան
ՆերքաղաքականՍոչիում կայացած Պուտին-Փաշինյան-Ալիեւ եռակողմ հանդիպման եւ նրանց կողմից ընդունված հայտարարության վերաբերյալ զրուցել ենք «Կովկաս» ինստիտուտի տնօրեն, քաղաքագետ ԱԼԵՔՍԱՆԴՐ ԻՍԿԱՆԴԱՐՅԱՆԻ հետ:
— Պարոն Իսկանդարյան, որպես այդպիսին, որեւէ արդյունք ունեցա՞վ Սոչիում կայացած եռակողմ հանդիպումը:
— Արդյունքը նախեւառաջ հենց ինքնին հանդիպումն էր: Այն կարող էր տեղի ունենալ կամ չունենալ: Երկրորդ` արդյունքը նաեւ այն փաստաթուղթն է, որը եւս կարող էր չլինել: Իհարկե, սպասել դիրքորոշումների մերձեցման, հարցի լուծման լուրջ քայլերի, այդպիսի ակնկալիքներ ես ի սկզբանե էլ չունեի: Բայց այն, որ հանդիպման հիման վրա գործընթացը կարող է շարունակվել, նշմարվում է հետագա զարգացում: Կողմերն այնքան հեռու են գտնվում իրարից` փոխըմբռման առումով, որ սպասել ավելին հնարավոր չէ եւ լուրջ չէ: Ինչ վերաբերում է հայտարարությանը, որ խնդիրը խաղաղ ճանապարով պետք է լուծվի, չեմ կարծում, թե այդպես կլինի:
— «Վալդայ» ակումբում Ձեր հնչեցրած հարցին պատասխանեց ՌԴ նախագահ Վլադիմիր Պուտինը` խոսելով խնդրի լուծման վաշինգտոնյան տարբերակի հետեւանքների մասին: Իսկ Ձեր գնահատմամբ` ո՞ր տարբերակն է մեզ ձեռնտու:
— ՌԴ նախագահն այն անվանեց վաշինգտոնյան տարբերակ, բայց ես չեմ կարծում, թե այն վաշինգտոնյան է, ես այն կանվանեի` եվրոպա-ամերիկյան: Այո՛, այդ նախագիծը կա: Այդ տարբերակով Ադրբեջանը փորձում է խնդիրը լուծել շատ արագ, ինչպես լուծվեց Լաչինի միջանցքով ճանապարհի հարցը: Ադրբեջանն ուզում էր արագ լուծել այս հարցը ու իրեն հաջողվեց, հիմա էլ նույնն է կատարվում: Այսինքն` մինչեւ Նոր տարի ստանալ փաստաթուղթ, որտեղ գրված կլինի ոչ միայն սահմանների ճանաչում, այլեւ փաստացի կլինի հայատարարություն, որ Արցախն Ադրբեջանի ներքին գործն է: Այս տարբերակով Ղարաբաղի պատկանելությունը որոշվում է, որ Ադրբեջանինն է, իսկ մոսկովյան տարբերակով հետաձգվում է խնդիրը` թողնելով ապագային: Իհարկե, սա չի նշանակում, որ այս կամ այն տարբերակը հիմա կյանքի է կոչվելու եւ առհասարակ չեմ կարծում, թե մինչեւ Նոր տարի կընդունվի ինչ-որ պայմանագիր:
ՀՐԱՆՏ ՍԱՐԱՖՅԱՆ