Այն, ինչը պետք է տեղի ունենա առաջիկայում՝ կլինի աշխարհի վերափոխման սկիզբը. Մինասյան
ՆերքաղաքականԸստ ՀՀԿ Գործադիր մարմնի անդամ ԳԱԳԻԿ ՄԻՆԱՍՅԱՆԻ, ՌԴ նախագահ Վլադիմիր Պուտինը երկիրը տեղափոխում է ռազմական ռելսերի վրա, ՌԴ-ում կառավարման համակարգը վեր է ածվում ադմինիստրատիվ ուղղահայացի, ինչը նշանակում է, որ Ռուսաստանը պատրաստվում է տեւական ու բավականին ծանր պատերազմի:
— Այն, ինչը պետք է տեղի ունենա առաջիկայում` կլինի աշխարհի վերափոխման սկիզբը: Ուկրաինական հակամարտությունը նոր փուլ է մտնում, որը դժվար թե արագ ավարտվի: Անգամ եթե ռազմական գործողությունները հաջողվի արագ ավարտել, դրա հետեւանքները դեռ երկար կմնան: Այս համատեքստում, թե ինչ տեղի կունենա Հարավային Կովկասում եւ մեր տարածաշրջանում ամեն ինչ էապես կախված է ՌԴ-ի, Իրանի եւ Թուրքիայի փոխհարաբերություններից: Զուգահեռներ անցկացնելով առաջին աշխարհամարտի զարգացումների հետ, հիշենք, որ ի տարբերություն Ադրբեջանի` Հայաստանն իր հույսն այն ժամանակ կապեց տարածաշրջանից դուրս պետությունների հետ եւ իրավիճակից մեծ կորուստներով դուրս եկավ: Իսկ Երկրորդ աշխարհամարտի ժամանակ արդեն Հարավային Կովկասը գտնվում էր ԽՍՀՄ կազմում ու Հայաստանը կարողացավ ոչ մեծ կորուստներով դուրս գալ: Հիմա կրկին մի փուլ է, որը պահանջում է կողմնորոշվել եւ Ադրբեջանն ակնհայտորեն իր ճակատագիրը կապում է տարածաշրջանային պետությունների` Թուրքիայի եւ ՌԴ-ի հետ: Սակայն, այստեղ մի հանգամանք կա, որը կարծում եմ` էապես կօգնի մեզ ճիշտ կողմնորոշվել առաջիկա զարգացումների առումով: Չափազանց կարեւոր է, որ տարածաշրջանի երկու պետություն՝ Իրանը եւ ՌԴ-ն նույն ճամբարում են գտնվում: Աննախադեպ մի բան է, որ որեւէ երկիր այդպես անթաքույց օգնում է ՌԴ-ին: Այս տանդեմը, կարծում եմ` անխախտ կլինի մինչեւ այս փուլի ավարտը՝ էական նշանակություն ունենալով Հարավային Կովկասի ճարտարապետության մեջ, ինչը Հայաստանի հանրապետության համար լավ կողմնորոշիչ է: Ի դեպ, ԻԻՀ-ն բավական պատվախնդիր է եւ Հայաստանի ու Ադրբեջանի սահմանային հատվածներում վերջին զորավարժություններով` հստակ ցույց տվեց, որ ամուր կանգնելու իր հայտարարության ակունքում ու Հարավային Կովկասում սահմանների փոփոխություն թույլ չի տալու: Ռուս-թուրքական հարաբերությունները եւս կարող են որոշակի տրանսֆորմացիաներ ապրել` կախված եկող տարի Թուրքիայում կայանալիք նախագահական ընտրությունների արդյունքներից: Ըստ տարբեր վերլուծությունների, Թուրքիայի ներկայիս նախագահի վարկանիշը էականորեն նվազել է, ու այդ միտումը կարող է շարունակվել` երկրում խորացող տնտեսական ճգնաժամի ֆոնին: Ելնելով այս իրողություններից կարծում եմ` Հայաստանը պետք է դիրքավորվի իր բնական դաշնակիցների թեւում: