«Հրապարակ». Փաշինյանը իր արեւմտամետ կլիենտներին հորդորել է` էլ ավելի ուժեղացնել հակառուսական եւ պրոարեւմտյան քարոզչական գիծը

Երեկ վարչապետ Նիկոլ Փաշինյանը կառավարությունում արտահերթ հանդիպում ունեցավ արտախորհրդարանական ուժերի ներկայացուցիչների հետ։ Արտահերթ, քանի որ Նիկոլ Փաշինյանը արտախորհրդարանական ուժերի հետ սովորաբար հանդիպում է ամեն ամսվա վերջին շաբաթ օրը, մինչդեռ վերջին զարգացումները փոխել են պլանները եւ, ի պատասխան հակառուսական տրամադրությունների աճի մասին որոշ գործիչների վերջին օրերի հայտարարություններին ու զգուշացումներին, Փաշինյանը որոշել է հավաքել իր արեւմտամետ կլիենտներին եւ հորդորել, որ էլ ավելի ուժեղացնեն հակառուսական եւ պրոարեւմտյան քարոզչական գիծը։  

Քննարկում է եղել նաեւ վերջին իրադարձությունների եւ հատկապես Միացյալ Նահանգների ներկայացուցիչների պալատի նախագահ Նենսի Փելոսիի այցի վերաբերյալ, արեւմտամետներին հետաքրքրել է՝ ի վերջո ԱՄՆ-ն ընդունելո՞ւ է Հայաստանին իր գիրկը եւ ե՞րբ ենք դուրս գալու ՀԱՊԿ-ից, սակայն կոնկրետ պատասխան չի հնչել: Փաշինյանը հասկացրել է, որ քանի հստակ երաշխիքներ չեն ստացել արեւմուտքից, ՀԱՊԿ-ից դուրս գալու քայլը խիստ վտանգավոր կարող է լինել։