Արցախում անցկացվեց ամենամյա հուշամրցաշարը. hայտնի են գավաթակիրները
ՏեսանյութերԹեեւ 44 օրյա պատերազմի վերքերն այսօր էլ թարմ են, սակայն Արցախը շարունակում է ապրել եւ ապրեցնել: Արցախում ի թիվս բնակարանաշինության, տարբեր ոլորտներում նորանոր ձեռքբերումների` չի անտեսվում նաեւ մշակույթն ու սպորտը: Արցախցիներն ամեն ինչ անում են, որ հայկական հետքը Արցախում շարունակի ամրապնդվել` ի հեճուկս հայ-ադրբեջանական շփման գծում առկա լարվածախության, որն ամենօրյա ռեժիմով խաթարում է քաղաքացիների բնականոն կյանքը: Հենց դրա համար էլ այսօր արցախցիներն անմասն չեն մնում սպորտային եւ մշակութային միջոցառումներից:
«Իրավունքն» այսօր բացառիկ հնարավորություն է ունեցել ներկա գտնվել արցախյան առաջին ազատամարտի հերոս ՍԵՅՐԱՆ ՀԱՐՈՒԹՅՈՒՆՅԱՆԻՆ նվիրված ատլետիկայի ամենամյա մրցաշարին, որի նպատակն է հայ երիտասարդների մեջ վառ պահել բազմակի չեմպիոն Հարությունյանի հիշատակը, ինչպես նաեւ կատարելագործել ատլետների մարզական վարպետությունն ու ի հայտ բերել մարզաձեւի ուժեղագույններին:
Նշենք, որ այս մրցաշարին պետք է մասնակցեին նաեւ Հայաստանի տարբեր մարզերի ատլետները, սակայն նրանք չկարողացան գալ` պայմանավորված հայ-ադրբեջանական սահմանի ողջ երկայնքով առկա ռազմական գործողություններով եւ հաշվի առնելով Հայաստանն ու Արցախը կապող միջպետական ճանապարհի ոչ անվտանգ լինելով, ինչի վերաբերյալ հայտնել էր Արցախի տեղեկատվական շտաբը: Շտաբի հայտարարության մեջ մասնավորապես ասված էր, որ Երեւանից Ստեփանակերտ երթեւեկել խիստ անհրաժեշտ դեպքերում: Ի դեպ, այսօր առավոտյան Սիսիան տանող ճանապարհի վրա եւս լսվել են կրակոցներ եւ գործնականում այն նույնպես անվտանգ չէ: Այսօր Արցախից Երեւան գրեթե մեքենա չի գնացել, հակառակ ուղղությամբ` եւս:
Վերադառնալով արցախյան ազատամարտի հերոս, բազմակի չեմպիոն Սեյրան Հարությունյանի անվան մրցաշարին` շեշտենք, որ այն նախատեսված էր անցկացնել Արցախի ղեկավարության բարձր հովանու ներքո: Սակայն հայաստանյան վերջին երկու օրերի իրադարձությունների ու զոհերի փաստով պայմանավորված` մրցաշարն անցկացվեց առանց հանդիսատեսի եւ պաշտոնատար հյուրերի: Ներկա չէր նաեւ Արցախի հանրապետության Ատլետիկայի ֆեդերացիայի նախագահ, ԱԺ նախագահ ԱՐԹՈՒՐ ԹՈՎՄԱՍՅԱՆԸ:
Մրցաշարին մասնակցեցին բացառապես արցախյան տարբեր քաղաքներից ժամանած ատլետները, որի մեկնարկը տրվեց մեկ րոպե լռությամբ` հարգանքի տուրք մատուցելով վերջին օրերին զոհված մեր զինվորների հիշատակին:
ԻԼՈՆԱ ԱԶԱՐՅԱՆ
Ստեփանակերտ-Երեւան