Ռուսական թատրոնում վերանորոգման աշխատանքներ կիրականացվեն,բայց ստեղծագործական դադար չի լինի
ՄշակութայինԿ. Ստանիսլավսկու անվան ռուսական դրամատիկական թատրոնի նոր՝ 85-րդ թատերաշրջանի բացումը տեղի կունենա սեպտեմբերի 16-ին՝ Ա. Պ. Չեխովի «Բալենու այգին» կատակերգությամբ (բեմադրությունը՝ թատրոնի գեղարվեստական ղեկավար Կարեն Ներսիսյանի)։ Այս մասին «Իրավունքին» տեղեկացրեց թատրոնի տնօրեն ՄԱՐԻԱՆՆԱ ՄԽԻԹԱՐՅԱՆԸ:
- Տիկին Մխիթարյան, աշնանն ի՞նչ նորություններ են սպասվում ռուսական թատրոնում:
- Սեպտեմբեր ամսվա խաղացանկը բավականին գերհագեցած է։ Սեպտեմբերի 4-ին թատրոնի Փոքր բեմում ունենք նոր ներկայացման առաջնախաղ։ Բեմ կբարձրանա Միխայիլ Խեյֆեցի «Նրան սպասելիս» պիեսը՝ Ելենա Վարդանյանի ռեժիսուրայով։ Իսկ հոկտեմբեր-նոյեմբեր ամիսներին թատրոնում վերանորոգման աշխատանքներ կիրականացվեն։ Ամեն դեպքում, ստեղծագործական դադար չի լինի. կշարունակվեն նոր բեմադրությունների փորձերը։
- Կբացե՞ք փակագծերը, թե ինչ նոր բեմադրություններով է համալրվելու թատրոնի խաղացանկը:
- Նորա Գրիգորյանը բեմադրում է «Վիյ» ներկայացումը՝ ըստ Ն․ Գոգոլի: Երեւանի մնջախաղի թատրոնի հետ համատեղ այս նախագծի առաջնախաղը կկայանա նոյեմբերի երկրորդ կեսին։ Ա. Օստրովսկու 200-ամյակի առթիվ թատրոնի գեղարվեստական ղեկավար Կարեն Ներսիսյանը բեմադրում է ռուս դրամատորգի «Բալզամինովի ամուսնությունը» պիեսը: Իսկ ՀՀ վաստակավոր արտիստ, բեմադրիչ Իռա Հարությունյանը հանդիսատեսի ուշադրությանը կներկայացնի ժամանակակից ամերիկացի դրամատուրգ Ս․ Բոբրիկի «Ամուսնացնել Ժանետին» կատակերգությունը։ Ասեմ, որ բեմադրական աշխատանքներին զուգահեռ՝ ներկայացումներ կցուցադրվեն Փոքր բեմում։ Կա եւս մեկ առաջնախաղ․ ՀՀ վաստակավոր արտիստ Ռոբերտ Հակոբյանը կներկայացնի «Վերհիշիր անունը քո» մոնոներկայացումը՝ նվիրված Կոմիտաս վարդապետին: Թատրոնի 85-ամյա հոբելյանի շրջանակում նախատեսված է Փոքր բեմում անցկացնել ՀՀ ժողովրդական արտիստ Ալ․ Գրիգորյանի թատերական ներկայացումների տեսագրությունների հետահայաց ցուցադրություն։ 85-րդ թատերաշրջանի ընթացքում կվերազինվի նաեւ թատրոնի թանգարանը։
- Իսկ փառատոների մասնակցություն պլանավորվա՞ծ է։
- Հոկտեմբերին Կ․ Միտանիի «Ծիծաղի ակադեմիա» ներկայացումը կմասնակցի Ղազախստանում անցկացվող «ՏեART- Կոկշե» փառատոնին։ 2023թ․ «Գարդենիա» ներկայացումը (բեմադրիչ՝ Գոռ Մարգարյան) կմասնակցի Մոսկվայի Չեխովյան փառատոնին։ Բանակցություններ են ընթանում նաեւ միջազգային այլ փառատոների հետ։
ՀՐԱՆՏ ՍԱՐԱՖՅԱՆ