Թուրքիայի Էրզրում քաղաքում ՎԱՀՐԱՄ ԴՈՎԼԱԹԲԵԿՅԱՆԸ, փառահեղ հաղթանակ է տոնել

Թուրքիայի Էրզրում քաղաքում ընթացող կրտսեր տարիքի պատանիների Եվրոպայի առաջնության ժամանակ, 40կգ քաշային կարգում հանդես եկող Վլադիմիր Ենգիբարյանի անվան մարզադպրոցի սան ՎԱՀՐԱՄ ԴՈՎԼԱԹԲԵԿՅԱՆԸ, փառահեղ հաղթանակ է տոնել Իսրայելը ներկայացնող Արթուր Պրոհվնևսկու նկատմամբ։ Վահրամը տեխնիկապես ու տակտիկապես շատ գրագետ մենամարտ է անցկացրել և ոչ մի շանս չի տվել մրցակցին։ Եվ ահա, մեզ հաջողվեց կապ հաստատել այժմ Թուրքիայում գտնվող Վահրամի և նրա մարզիչների հետ։Վահրամը այսպես մեկնաբանեց իր հաղթանակը. «Իսրայելը ներկայացնող մարզիկը տեխնիկապես շատ հմուտ մարզիկ էր։ Առաջին ռաունդը մի փոքր դժվար անցկացրեցի, սակայն երկրորդ, երրորդ ռաունդներից հետո նա հոգնեց ու ես ավելի լավ սկսեցի աշխատել, որպեսզի հաղթեմ իրեն, այդքան էլ դժվար մենամարտ չէր, առաջին մենամարտը ավելի դժվար էր Ադրբեջանի ներկայացուցչի հետ ու ես ինչպես խոստացել էի, որ մեր Հայկական դրոշը պիտի բարձրացնեմ Թուրքիայում, հենց այդպես էլ արեցի, բայց գնալու եմ մինչև վերջ, որպեսզի հնչեցնեմ նաև մեր երկրի հիմնը թշնամի երկրում։ Վլադիմիր Ենգիբարյանի անվան մարզադպրոցի մարզիչ, ՀՀ վաստակավոր մարզիչ ՀԱՐՈւԹՅՈՒՆ ՆԱԶԱՐՅԱՆԸ, մեզ հետ բացառիկ զրույցում նշեց. «Վահրամը մեր մարզադպրոցի լավագույն սաներից է, նրա անձնական մարզիչը դոցենտ ԱԼԵՔՍԱՆ ՇԱԽՅԱՆՆ է, նա ևս իմ սանն է եղել։ Վահրամը շատ աշխատասեր է, բռնցքամարտի տեխնիկական հնարքներին լավ է տիրապետում, հաղթահարում է յուրաքանչյուր մրցակցային փուլերը, լսելով իր մարզչի խորհուրդները, ամեն մի խոսքը։ Վահրամը շատ խոստումնալից, պատանի բռնցքամարտիկ է ու շատ մեծ ապագա է սպասվում նրան։ Իսկ ահա Վահրամի անձնական մարզիչ ԱԼԵՔՍԱՆ ՇԱԽՅԱՆԸ այսպես բնութագրեց իր սանին. «Իմ սանը Վահրամը, շատ համարձակ, աշխատասեր, նպատակասլաց և կազմակերպված, կշռադատված մարզիկ է, խելացի է, տեխնիկատակտիկապես բարձր պատրաստություն ունեցող պատանի բռնցքամարտիկ։ Առաջին մենամարտում ակնհայտ առավելությամբ տպավորիչ հաղթանակ տարավ Ադրբեջանը ներկայացնող մարզիկի նկատմամբ, իսկ 1/4 եզրափակչում գեղեցիկ, փառահեղ հաղթանակ տարավ Իսրայելի մարզիկի նկատմամբ։

 Պատրաստեց ՀՈՎՀԱՆՆԵՍ ՍԱՐԳՍՅԱՆԸ