«Գոնե նվազագույնն անենք…». Նարինե Մեհրաբյան

Անտանելի անտարբերություն Բերձորի՝ նույն ինքը կյանքի ճանապարհի շուրջ ստեղծված իրավիճակի նկատմամբ…

Ինչպես գիտենք, Աղավնոյի և Բերձորի բնակիչներին մինչև օգոստոսի 25-ը ժամանակ է տրվել լքելու իրենց օջախները։ Մինչև օգոստոսի 25-ն անհրաժեշտ է միջազգային լրատվական խումբ հրավիրել, բաղկացած ամենատարբեր պետություններ ներկայացնող լրատվականներից (BBC, CNN, Guardian, Al Arabia, Ria Novosti…)՝ տեղում եղածը փաստավավերագրելու համար՝ սկսած խաչքարերից, եկեղեցիներից, մինչև մեր ինքնությունը փաստող ցանկացած ապացույց։ Հաշվի առնելով լրատվականների բազմազանությունն այն արժանահավատ վավերագրական բազա կլինի հետագայում անկնալվող մշակութային վանդալիզմը փաստելու համար։

Ավելին՝ միջազգային աղմուկը կարող է նպաստել խնդրի հանրայնացմանն ու այն ճիշտ օգտագործելու պարագայում գուցե հնարավոր լինի որոշակի դրական արդյունքներ արձանագրել։

Անհնարինության պարագայում գոնե տեղական լրատվական խումբ ուղարկել՝ ֆոտո և տեսանկարահանելու տեղի ողջ ժառանգությունը։ Սա նվազագույն ջանք պահանջող, բայց գուցե հետագայում մեծ արդյունք բերող քայլ լինի, քանի որ ներկայումս, ցավոք սրտի, անտարբերության և դիմադրության (հատկապես բանակցություններում և հասարակության մեջ) բացակայության ենք առերեսվում, որը ՄԻԱԿ տարբերակն է գոյատևելու, իսկ քանի չկա դիմադրություն, ադրբեջանական կողմը չի վարանում սեղմել օղակը։