Արցախն այսօր ցանկացածիս ձայնի, ուժի, ներկայության կարիքն ունի. Խաչենց

Վերջին շրջանում բուռն ստեղծագործական գործունեությամբ է աչքի ընկնում պոետ, երգիչ, երգահան, Ապրիլյան քառօրյա եւ արցախյան 44-օրյա պատերազմների մասնակից ԱՐԹՈՒՐ ԽԱՉԵՆՑԸ: «Իրավունքը» զրուցել է երիտասարդ արվեստագետի հետ:

— Ինչպիսի՞ն էր Արթուր Խաչենցը պատերազմից առաջ եւ ինչպիսի՞ն է այսօր: Որքանո՞վ պատերազմը ազդեց Ձեր ստեղծագործական ընթացքի վրա:

— Գրեթե չեմ փոխվել, միայն ուժս ու դիմացկունությունս է շատացել:

— Դեռ 44-օրյա պատերազմի օրերին համացանցը ողողված էր առաջնագծից՝ Ձեր մասնակցությամբ ոգեղեն հայրենասիրական երգերով նկարված տեսաուղերձներով: Ինչքանո՞վ է երգը օգնում պատերազմում:

— Երգը պատերազմում օգնում է ոգեշնչվել, գոտեպնդվել ու երբեք չհանձնվել: Ինձ համար, թերեւս, երգը ոգեղեն զենք է, կարծում եմ՝ զինակիցներիս համար՝ նույնպես:

— Ի՞նչ նոր գործեր, նոր նախագծեր ունեք, որոնք պատրաստվում եք մոտ ապագայում ներկայացնել հանրության դատին:

— Նոր ստեղծագործություններ շատ ունեմ, փորձում եմ համակարգված ու ճիշտ մատուցել: Պետք է առանձնացնեմ Արցախին վերաբերող, արցախյան բարբառով նոր երգերս, որոնք առաջիկայում կհանձնեմ հանրության դատին:

— Պատերազմից հետո հաճախ եք լինում Արցախում, մասնակցում զանազան միջոցառումների: Ի՞նչ եք կարծում, Ձեր երգը փարատու՞մ է արցախցու ցավը:

— Չգիտեմ, թե իմ երգը որքանով է կարողանում ամոքել հայրենակիցներիս ցավը, բայց միանշանակ, Արցախն այսօր նման կարգավիճակում ցանկացածիս ձայնի, ուժի, ներկայության կարիքն ունի:

— Արցախում անցկացված «Ապրելու ձայնը» գրական-մշակութային օրեր ծրագրի շրջանակներում Դուք եւս հանդես եկաք համերգներով: Ի՞նչ են տալիս այսօրինակ միջոցառումները Ձեզ:

— Նմանօրինակ համերգներն ինձ մեծ սեր ու ջերմություն են տալիս, բայց նախեւառաջ, ես եմ փորձում իմ ներսի կուտակված ուժը փոխանցել հայրենակիցներիս:

— Ի՞նչ կասեք Հայաստանում եւ Արցախում տիրող քաղաքական-հասարակական գործընթացների վերաբերյալ:

— Քաղաքական գործիչ չեմ ես, այդ իսկ պատճառով չեմ կարող որոշակի քաղաքական գնահատականներ տալ, հատկապես, որ դրանք հասարակ ժողովրդին հասանելի չեն, կարող եմ միայն ասել, որ այս գործընթացները մեր ժողովրդի գլխին խաղ ու փորձանք են դառնում:

— Ինչը՞ կարող է թուլացնել Արթուր Խաչենցի՝ երգչի եւ հայրենիքի զինվորի արիությունը, կոտրել նրա ոգին:

— Ոչինչ չի կարող կոտրել պայքարողի իմ արիությունը, սասանել կամքս: Ես դժվարություններից ավելի եմ ամրանում:

— Ինչո՞վ է պայմանավորված վերջին շրջանում Ձեր ստեղծագործական բուռն ակտիվությունը: Սա պայքարի դրսեւորո՞ւմ է՝ կորսված Հայրենիքը ապրեցնելու հույսով:

— Դա իմ գաղափարական պայքարի դրսեւորման ինքնատիպ ձեւն է: Փորձում եմ ստեղծագործություններիս միջոցով նույնպես շարունակել իմ անընդհատ ձգվող պայքարի ուղին, որպեսզի կարողանամ չընկրկել կյանքի հարվածներից:

ՌՈՒԶԱՆՆԱ ԽԱՉԱՏՐՅԱՆ 

Այս թեմայով Գինու համբույրից՝ տեսահոլովակի պրեմիերա Ինձ համար սա մահապատիժ է…Շատ մեծ ցանկություն ունեմ, որ լույս սփռվի այս գործի վրա. Արթուր Վարդանյան Պետք են ավարտական դատավճիռներ. եվրոպական կառույցները փորձում են փրկել Նիկոլի դեմքը Գործելու ենք` ի հեճուկս թատերական բնագավառի հուդաների. ԱՐԹՈՒՐ ՍԱՀԱԿՅԱՆ ՌԴ-ում 3 միլիոնից ավել հայ է ապրում, դու ի՞նչ իրավունքով ես խառնվում ՀՀ-ՌԴ հարաբերություններին. Արթուր Ղազարյանը՝ Եվրոպայի հայերի միության նախագահին