Պետք է սթափվեն բոլորը եւ չխոսեն այն լեզվով, որը պարտադրում է իշխանությունը. Ալավերդյան

ՀՀ մարդու իրավունքների առաջին պաշտպան, «Ընդդեմ իրավական կամայականության» ՀԿ գործադիր տնօրեն ԼԱՐԻՍԱ ԱԼԱՎԵՐԴՅԱՆԻ գնահատմամբ` իրավական ցինիզմը ծնում է մերժողականություն:

— Ժողովուրդը չպետք է ենթարկվի այդ ցինիզմին եւ վարակվի դրանով: Դատարանում պրոդյուսեր Արմեն Գրիգորյանի մահը «ղողանջ» է, որն ամեն օր արթնանալուց պետք է լսենք ու մեր քայլերն անելուց հիշենք, որ այդ մահը հանուն ՀՀ անկախության էր: Տեղի ունեցածը քաղաքական հետապնդումների ձեւ է: Մահապատժի չեն դատապարտում, բայց մարդուն հասցնում են մահվան, առողջության ծանր վնասի: Այս իշխանությունն իրեն նման գործելաոճ է ցույց տալիս, որովհետեւ ՀՀ-ում ինկվիզիցիա չի եղել, իսկ ինքը ցույց է տալիս, թե ինչպես պետք է լինի: Խոսքը նրա մասին չէ, որ նախկինում պատվերով դատավճիռներ չեն եղել, այլ հիմքերի մասին է: Ովքեր ժամանակին պայքարել են Արցախի անկախության համար կամ այսօր են պայքարում նաեւ ՀՀ անկախության շարունակականության համար, հենց նրանք են ենթարկվում նման գործողությունների: Երբեք սա այս աստիճանի քաղաքականացված չի եղել: Սա քաղաքական ռասիզմի հավասար բան է, երբ մարդիկ քաղաքական հայացքների համար խտրականության են ենթարկվում:

— Տիկին Ալավերդյան, այս իրավիճակում ո՞րն է ելքը, որպեսզի հնարավոր լինի իրապես դիմակայել այն ամենին, ինչ տեղի է ունենում:

— Առաջնահերթ պետք է սթափվեն բոլորը՝ լրագրողները, ընդդիմադիրները եւ չխոսեն այն լեզվով, որը պարտադրում է իշխանությունը: Վերջինս եկել է երկու նպատակով՝ Արցախը բռնակցելու Ադրբեջանին եւ ՀՀ-ն դարձնելու Թուրքիայի կցորդ: Թուրքիան ուժեղացնելու են՝ տարածաշրջանում հակադրելով ՌԴ-ին: Մարդու իրավունքների հարցն այստեղ առանձին չէ: Թույլ չտանք մեզ խոսել այնպես, կարծես թե, չենք հասկանում, թե ինչի համար են եկել այս իշխանությունները: Իշխանությունը ոչ միայն օրենքներն է ոտնահարում, Սահմանադրությունը, այլ հակադրվում է մարդու իրավունքների միջազգային նորմերին:

— Բայց ՀՀ-ում ԵՄ դեսպան Անդրեա Վիկտորինն ընդգծել էր, որ ՀՀ-ում այս պահին քաղբանտարկյալներ չկան: Ինչպե՞ս եք վերաբերվում այս հայտարարությանը:

— Տիկին դեսպանն այդպես չի փրկում Եվրոպայի երկերեսանի քաղաքականությունը: Չմտածեք, թե ինքը չգիտի, թե ինչ է քաղբանտարկյալը, կամ մարդու մահը դատարանում: Իշխանության համար նրանք ոչ թե այլախոհներ եւ կամ ընդդիմադիրներ են, այլ՝ թշնամիներ: Այնպես, ինչպես ԱԱԾ-ն ձերբակալեց Արմեն Գրիգորյանին, այդպես Ադրբեջանում ձերբակալեցին Կարեն Պետրոսյանին: Եվրոպական որեւէ երկրում անթույլատրելի կլիներ կարծիք արտահայտելու համար կալանք ընտրել կամ ձերբակալման նման ձեւ կիրառել ու ցուցադրել:

ՀՐԱՆՏ ՍԱՐԱՖՅԱՆ

Այս թեմայով Ես պահանջատեր եմ, գործարքի մեջ չեմ մտնելու ու չեմ լռելու. Սարգիս Արզումանյան Մենակ չթողնե՛ք տավուշցուն. Գառնիկ Դանիելյան «Շատ հուզվում եմ ընկերոջս բացակայության պատճառով». ԱՐՄԵՆ ԱՄԻՐՅԱՆ Սամվել Վարդանյանը դատարանից գնաց տուն Իրավաբանություն չկա, տուժող չկա, վնաս չկա, ոչինչ չկա, բայց մարդն ազատազրկված է. Տիգրան Աթանեսյան