Այն ժողովուրդը, որ չի ուզում մեռնել, որեւէ մեկը չի կարող մեռցնել. Հարութ Փամբուկչյան

Թեպետ «Մենք չենք լինի էլ քսան տարեկան», որովհետեւ «Տարիներն անցան» եւ մնում է միայն հառաչել ա՛խ «Տարիներ-տարիներ», բայց ՀՀ վաստակավոր արտիստ, երգիչ ՀԱՐՈՒԹ ՓԱՄԲՈՒԿՉՅԱՆԻՆ հաջողվեց հետ շրջել ժամանակի անիվն ու իր սիրված երգերով հայ հանդիսատեսին տեղափոխել ամենաջերմ հիշողությունների գիրկը եւ նորից նրա հետ միասին երգել` «Սիրում եմ քեզ», «Անցիր այ գետակ, «Իմ կյանք», «Թե աչերս քեզ որոնեն», «Ես առանց քեզ» …Ահա այսպիսին էր «Կարեն Դեմիրճյան» մարզահամերգային համալիրում կայացած Ձախ Հարութի երկու տարի ուշացումով, բայց 70-ամյակին նվիրված հոբելյանական սպասված համերգը, որ կազմակերպել էր «Եղոյան փրոդաքշնը»:

Ի դեպ, դեռեւս 2020 թվականին համերգի տոմսերի մեծ մասը վաճառվել էր, բայց ստեղծված համավարակային եւ պատերազմական իրավիճակն անհնար դարձրեց այդ ժամանակ իրականացնել Հարութ Փամբուկչյանի հանդիպումը հայաստանյան հանդիսատեսի հետ: Սակայն, կազմակերպիչները կարեւորելով ազնիվ գործունեությունը` համբերատար տոմսերը պահածներին ընձեռեցին հնարավորություն վերջապես հիմա ունկնդրել Ձախ Հարութի հին ու նոր երգերը:

Ինչ խոսք, հայաստանյան հանդիսատեսի հետ հանդիպումը բավական հուզիչ էր նաեւ 70/2–ամյա երգչի համար, ով մի քանի անգամ հուզվեց բեմում եւ իր ուրույն ոճով ծնկի գալով խոնարհվեց` չդադարող ծափերին ի պատասխան: Այս առումով նա հիշեց զեյթունցի հոր խոսքերը. «Երբ դեռ փոքր էի, չէի կարողանում հասկանալ, բայց հայրս միշտ ասում էր` տղա՛ս, մի երեւույթ գոյություն ունի կյանքում, որ քո անձից ու քեզնից հազար անգամ ավելի բարձր է, դու պարտական ես հարգելու ու սիրելու հայ ժողովրդին: Իմ ազգն ինձնից հազար անգամ ավելի բարձր է, որը հիմա ծափահարում է ինձ»:

Համերգի ժամանակ պարզվեց, որ երգիչն իր բուն ծննդյան օրը` հուլիսի 1-ին այցելել է «Զինվորի տուն», որտեղ վիրավոր զինվորներից ստացել է յուրահատուկ նվեր, ինքն էլ երգել նրանց համար:

«Չկա մի ժողովուրդ, որի կորուստը վերածվի արվեստի, մինչդեռ մեր զինվորները պայթեցված ռումբից կենաց ծառ էին պատրաստել եւ նվիրեցին ինձ: Այն ժողովուրդը, որ չի ուզում մեռնել, որեւէ մեկը չի կարող մեռցնել», - ասաց Փամբուկչյանն ու համերգն ամփոփեց մի շարք հայրենասիրական երգերով` նվիրելով դրանք Արցախը պաշտպանողներին` ազատամարտիկից մինչեւ այսօր սահմանին կանգնած զինվորը:

ՀՐԱՆՏ ՍԱՐԱՖՅԱՆ

Այս թեմայով Գալու է հատուցման պահը, վախեցե՛ք Աստծո պատժից. ՀՀ վաստակավոր արտիստ Կյանքի 71-րդ տարում մահացել է նկարիչ Խաչիկ Հարությունյանը «Այս իրականության մեջ միայն ապուշներ են պետք, որոնց հեշտ լինի կառավարել». ԽԱՉԻԿ ՉԱԼԻԿՅԱՆ   Չի կարող հիվանդ երկրում առողջ կինո լինել. ԽԱՉԻԿ ՉԱԼԻԿՅԱՆ Օսկարակիր կոմպոզիտոր Էնիո Մորիկոնեի որդին Երեւանում կներկայացնի հոր հեղինակային ծրագիրը