Իմ որոշումը պայմանավորված է եղել հանրային շահով, սակայն․․․ԱՀ ԱԺ պատգամավորը՝ նախաձեռնությունից հրաժարվելու որոշման մասին մանրամասներ է ներկայացնում
ՆերքաղաքականԱյսօր մամուլը մասնավորապես գրել է․ <<Արցախի ընդդիմադիր խմբակցություններն 9 պատգամավորի ստորագրություն են հավաքել եւ դիմել ԱԺ-ին՝ քննիչ հանձնաժողով ձեւավորելու պահանջով։ 8 պատգամավորներին է միացել Սամվել Բաբայանի «Միասնական հայրենիք» խմբակցության 1 պատգամավոր։ Սակայն դիմումը ներկայացնելուց հետո, մեր տեղեկություններով, իշխանական «Ազատ հայրենիքի» եւ «Միասնական հայրենիքի» պատգամավորները սկսել են ճնշումներ գործադրել իրենց գործընկերոջ վրա, որպեսզի հետ վերցնի ստորագրությունը>>։
Մեզ հայտնի դարձավ, որ վերը նշյալ տեղեկատվությունից հետո, «Միասնական հայրենիքի» պատգամավոր Դավիթ Սարգսյանը հետ է վերցրել ստորագրությունը, որքանով է մեզ հասած տեղեկատվությունը իրական, եթե այդպես է, ապա ինչո՞ւ նման որոշում կայացվել, հարցի պատասխանը փորձում էինք ստանալ ողջ օրվա ընթացքում, սակայն միայն օրվա վերջին մեզ հաջողվեց կապվել պատգամավորի հետ, ով ներկայացրեց հետեւյալը․
- ԱԺ «Արդարություն» խմբակցության առաջարկով միացել եմ հիմնադրամիների գործունեությունը քննող հանձնաժողով ստեղծելու առաջարկությանը, քանի որ հիմնադրամների գործունեությունը հանրային հետաքրքրություն է ներկայացնող հարց է և արժանի է քննության։ Նախաձեռնությանը միանալու իմ որոշումը պայմանավորված է եղել հանրային շահով, սակայն «Արդարություն» խմբակցության իմ գործընկերները քաղաքականացրել են այս հարցը, այն դարձրել ներքաղաքական շահարկումների թեմա։ Մասնավորապես նրանք մամուլին հաղորդել են, թե ինձ վրա ճնշումներ կան իմ և իշխող քաղաքական ուժերից, որ նրանք ուզում են տապալել հանձնաժողովի ձեւավորումը, որ «Միասնական հայրենիք» կուսակցության առաջնորդ Սամվել Բաբայանը խաղ է սկսել ու իշխանությունից ինչ-որ զիջումներ է պահանջում և այլն։ Սա առեւտուր է, որին մեր խմբակցությունը և ես անձամբ չենք մասնակցում։
Ի դեպ, այս իրավիճակը շատ նման է 2021թ. բյուջեի քվեարկությանը, երբ ընդդիմադիր խմբակցությունների ներկայացուցիչներից մեկը «հանկարծակի» վատ զգաց, մեկ ուրիշը «անհետ» կորել էր։ Այնինչ իրենք են խաղ խաղում և զիջումներ պարտադրում իշխանությանը։ Գիտեք, բարոյականությունը և մարդկային հարաբերությունները դեռ ոչ ոք չի չեղարկել, այդ թվում' քաղաքականության մեջ։ Բացի այդ հանձնաժողովը դեռ ոչինչ չի արել, բայց արդեն հարցազրույցներ են տալիս և սենսացիաներ խոստանում։ Իմ նպատակը սա չէ, դրա համար էլ դիմում եմ ներկայացրել ԱՀ ԱԺ նախագահին՝ հրաժարվելով մասնակցել այդ նախաձեռնությանը։
ԻԼՈՆԱ ԱԶԱՐՅԱՆ