Կամո Ունանյանը 5-րդ անգամ դարձել է Եվրոպայի չեմպիոն
ՍպորտՀունիսի 10-12-ը, Խորվաթիայի Վարազդին քաղաքում կայացավ օլիմպիական կարատեի 4 պաշտոնական ոճերից մեկի՝ շիտորյու մարզաձեւի Եվրոպայի առաջնությունը։ Այս տարի Եվրոպայի առաջնությանը մասնակցել է 34 երկիր։ Առաջնությունում Հայաստանը ներկայացրել է սպորտային կարատեի Աշխարհի եւ Եվրոպայի չեմպիոն, Հայաստանի կարատեի միության հիմնադիր Կամո Ունանյանը։
Հայ մարզիկը մրցելով նախ անգլիացի, հետո՝ իսպանացի, սլովենացի եւ ռումինացի մարզիկների հետ, 4 մարտերում հաղթանակներ գրանցելով, դարձել է Եվրոպայի չեմպիոն։
«Մեկնելուց առաջ խոստացել էի, որ գնում եմ ոսկե մեդալի հետեւից, ինչպես միշտ, խոստումս կատարեցի»,- ասաց Կամո Ունանյանը, ով 5-րդ անգամ է նվաճում սպորտային կարատեի Եվրոպայի չեմպիոնի տիտղոսը։
Ի դեպ, ինչպես արդեն հայտնի է, այս առաջնությունից հետո Կամո Ունանյանը Եվրոպայում մեջքի վիրահատության կենթարկվի․ «Վերջին 4 տարիների ընթացքում 3 անգամ մեջքի վիրահատություն եմ ունեցել, հուսով եմ՝ սա վերջինը կլինի»,- ասել էր Ունանյանը։
Հիշեցնենք, որ Կամոն տարիներ առաջ առաջնություններից մեկի ժամանակ մեջքի լուրջ վնասվածք էր ստացել եւ վերջին 4 տարիների ընթացքում պարբերաբար բուժում է ստանում տարբեր երկրներում։