Հայրենիքս ավերակների վերածածներին «հայրենակից» չեմ համարում. Ալլա Հակոբյան
«Իրավունքն» անդրադարձել էր, որ ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը հայտարարությանն առ այն, որ իշխող խմբակցությունը չի մասնակցելու հայ-ադրբեջանական եւ հայ-թուրքական հարաբերությունների օրակարգով հրավիրված «Հայաստան» եւ «Պատիվ ունեմ» ընդդիմադիր խմբակցությունների նախաձեռնած ԱԺ արտահերթ նիստին։
Անդրադառնալով վերոնշյալին՝ գրող, հրապարակախոս ԱԼԼԱ ՀԱԿՈԲՅԱՆԸ գրել է. «Դիմելով «հայրենակիցներին», այն էլ «սիրելի», ՔՊ-ականը տեղեկացնում է, որ «Հայաստան» եւ «Պատիվ ունեմ» խմբակցությունները հանդես են եկել «Հայ-ադրբեջանական եւ հայ-թուրքական հարաբերությունների օրակարգով» արտահերթ նիստ հրավիրելու նախաձեռնությամբ: Սակայն այս օրհասական պահին՝ երբ Հայոց պետականության լինել-չլինելու հարցը մտահոգում է յուրաքանչյուր հայի, նա հայտնի. «Տղամարդ եմ՝ խոսքիս տերն եմ, թախտի տակից դուրս չեմ գալու» վարիացիայով, օգտագործելով «շանտաժ» բառը, հպարտությամբ հայտարարում է. «ՔՊ-ն չի մասնակցելու Արցախի հարցը ներքաղաքական նպատակներով օգտագործելուն ուղղված՝ ԱԺ արտահերթ նիստին»: Սա դեռ քիչ է, ինքնամեկուսացված եւ ժողովրդից Կառավարության շենքը պողպատե ճաղերով ամրապնդած, երեւանյան փողոցները տարբեր գույնի кепка-ներով, фуражка-ներով, берет-ներով ողողած ոստիկանական ուժերի ֆոնին, ՔՊ-ի դեմ կծու, մռու, թթու կամ դառը խոսք ասած մարդկանց կալանավորող «իշխանությունը» դեռ 2018-ի իներցիայով զբաղված է ինքնագովազդով. «Հայաստանում ժողովրդի իշխանությունը անսասան է, ժողովրդավարությունը՝ անշրջելի։» Եվ այս ամենի գոհարը. «Կեցցե՛ հայկական ժողովրդավարությունը»: Այսպիսի՛ «ՀԱՅԿԱԿԱՆ ժողովրդավարությանն» ի պատասխան՝ Պարույր Սեւակը կասեր. «Ես փոխում եմ ազգությունս...»: Մնում է էն մեռած-չթաղած Լենին պապին էլ՝ ում օրոք հայերը նենգաբար ԶՐԿՎԵՑԻՆ Նախիջեւանից ու Արցախից, քաջալերի սրանց. «Правильной дорогой идёте, товарищи!»: Դատարկությանը բնորոշ ԶՐՆԳՈՒՆ ԻՆՔՆԱՀԱՎԱՆՈՒԹՅԱՄԲ, ՔՊ-ականը շարունակում է թմբկահարել «Երբեմնի իշխանության» կողմից «Արցախի շահերը դավաճանելու» մասին... Մի երգ ունեն, այն էլ մի նոտայանոց. «Նախկիններ...»:
Ուրեմն այսպես... Երբ ձեզանից շատերը նույնիսկ չէին ծնվել, այդ՝ ըստ ձեր որակավորման՝ «Արցախի շահերը դավաճանող», «նախկինները» թեժ մարտերում ազատագրեցին Սրբազան Հայոց հողերը: Այդ՝ ինչպես փորձում եք հեգնել, «երբեմնի իշխանության» օրոք ստեղծվեց Արցախի Հանրապետությունը՝ ՊԵՏԱԿԱՆՈՒԹՅԱՆ ԲՈԼՈՐ ՍԻՄՎՈԼՆԵՐՈՎ՝ գերբ, դրոշ, օրհներգ... Այդ «երբեմնի իշխանության» օրոք Պաշտպանության Բանակը հսկում էր Արցախի սահմանները նենգ թշնամուց, ՀԱՅԿԱԿԱՆ Շուշին ՀԱՅԵՐԻՆ էր պատկանում եւ այնտեղ ծածանվում էր Արցախի ԴՐՈՇԸ... Այդ «հարցը փակուղի մտցրածների» օրոք Լինսի հիմնադրամով կառուցված ճանապարհով ոչ միայն Արցախի պետական այրերն էին հասնում մինչեւ Ամերիկա, այլ սովորական Արցախցու կենսամակարդակը այն աստիճան էր բարձրացել, որ նա ԱՆՎԱԽ եւ ԱՆՎՏԱՆԳ ճամփորդում էր ՀՀ անձնագրով:
P.S. Հայրենիքս ավերակների վերածածներին «հայրենակից» չեմ համարում... Ավելին, պատասխանում եմ դասական դարձած. «Тамбовский волк тебе товарищ!»-ով: Մեր դեպքում, իհարկե, «Тамбовский»-ի փոխարեն՝ շատ ավելի կոնկրետ եւ հայտնի «գորշ գայլը քեզ товарищ!»: