Ցնդաբանություն է. ֆեյքերով իշխանության եկածները ֆեյք են փնտրում ընդդիմադիր դաշտում

Իշխանության համար ընդդիմության ցույցերի մասնակիցների քանակի վերաբերյալ թիվ նկարող Դանիել Իոաննիսյանի «Փաստերի ստուգման հարթակն» իբր «բացահայտում» է արել, թե բա սոցցանցերում եսիմ ինչքան ֆեյք ունի Ռեֆորմիստների կուսակցության նախագահ ՎԱՀԱՆ ԲԱԲԱՅԱՆԸ: 
Վերոնշյալի մասին «Իրավունքը» փորձեց մեկնաբանություն ստանալ հենց Բաբայանից, սակայն նա կարճ պատասխանեց. «Հումորով եմ վերաբերվում իոաննիսյանական «բացահայտումներին», առավել եւս, որ որեւէ առնչություն չունի ինձ հետ: Հետեւապես ամեն ցնդաբանություն չեմ մեկնաբանում»:

Այդուհանդերձ, մի կողմ թողնելով, որ ֆեյքերով իշխանության եկածներն ընդդիմադիր շարքերում փորձում են ֆեյք «հայտնագործել» եւ դրանով իբր ցնցել համացանցը՝ մենք որոշեցինք գնալ իոաննիսյանական «բացահայտման» հետքերով: 

Պարզվում է՝ ըստ «Փաստերի ստուգման հարթակի», ֆեյք (կեղծ էջ) է, օրինակ, Ռեֆորմիստների կուսակցության խորհրդի անդամ ԱՐՄԵՆ ԱՄԻՐՋԱՆՅԱՆԻ ֆեյսբուքյան պրոֆիլը, ով, ի դեպ, 24 ժամ է տվել, որպեսզի հերքեն այդ հրապարակումը: Ավելին՝ ըստ նույն հրապարակման, ո՛չ ավել, ո՛չ պակաս ֆեյք է նաեւ բլոգեր ՄԱՐԻԱՄ ՂԱՆԴԻԼՅԱՆԸ, ինչին անդրադառնալով՝ հենց նա հրապարակել է ընտրողների ռեգիստրից իր բնակության հասցեն եւ ընդգծել. «Անկեղծ ասած, ոմն Դանիել Իոաննիսյանին իսկապես չեմ էլ ճանաչում, ցանկություն էլ չունեմ ու չգիտեմ ինչ նպատակ է հետապնդում իմ էջն ու իմ անձը կեղծ (ֆեյք) անվանելը։ Բայց իմ անձի իրական լինելը հանրային հարթակում կասկածի տակ առնելը զրպարտություն է, ինչի համար պահանջում եմ, որպեսզի շատ արագ հեռացնեն այդ կեղծ հրապարակումը»:

Ինչեւէ, հատկանշական է այն, որ իրական մարդկանց կեղծ ներկայացնելով հանդերձ՝ իոաննիսյանական հարթակը ոչ թե մեղադրում է նրանց ապատեղեկատվություն տարածելու կամ հայհոյելու մեջ, ինչով մշտապես աչքի են ընկնում իշխանական ֆեյքերն ու ինչի վերաբերյալ, չգիտես ինչու, աչք է փակում նույն Իոաննիսյանը, այլ, պարզապես, Վահան Բաբայանի պրոֆիլի էջին հետեւելու, այսպես ասած, «պոդպիսկա» լինելու համար: Թե ինչու է սա անհանգստացրել Դ. Իոաննիսյանին, առավել խոր արմատներ ունի: 
Դեռեւս 2000-ականների սկզբին Մանկավարժական համալսարանում լեգենդներ էին պտտվում երբեմնի պատմաաշխարհագրական ֆակուլտետի ուսանողական խորհրդի նախագահ Վահան Բաբայանի անվան շուրջ: Հատկապես ուսխորհրդի անդամները լավ են հիշում, որ մեծ թվով ուսանողուհիներ սիրահարված էին սլավոնական արտաքինով երիտասարդին: Բայց ո՞վ կմտածեր, որ տարիներ անց իշխանական ֆեյքերի ՊՈԱԿ-ի աշխատակիցներն էլ կարող են սիրահարվել Վահան Բաբայանին: Հումորը հումոր, բայց, ըստ էության, ստացվում է, որ իր ֆեյքային հրապարակմամբ՝ Իոաննիսյանը «փուռն է» տալիս հենց իշխանական ֆեյքերին, որոնք իրենց հաստիքով աշխատանքից զատ՝ դու մի ասա հետեւում են նաեւ ընդդիմադիր գործչին: Այլապես ինչպե՞ս հասկանալ այն, որ Բաբայանը հրապարակումն անվանում է «ցնդաբանություն», իսկ Իոաննիսյանի հարթակում հայտնված էջերի մի մասն իրական են, մյուս մասն էլ եթե անգամ ֆեյք են, ու որոնցից քաջատեղյակ է իշխանության թիվ մեկ հարթակը, բայց «մեղադրվում են» զուտ Ռեֆորմիստների կուսակցության նախագահի էջին հետեւելու կամ ընդդիմության ներկայացուցիչների իրական հրապարակումները տարածելու մեջ:

ՀՐԱՆՏ ՍԱՐԱՖՅԱՆ

Այս թեմայով Ժողովուրդը, որին պարտադրում են իր հողը հանձնել եւ հեռանալ, չի կարող գոհունակ լինել. Վազգեն Պետրոսյան Եթե այս ընթացքը չկասեցվի, ամիսներ անց հնարավոր է` պետականություն չունենանք. Չախալյան Սա «բեսպրեդել» է` Հայաստանի պատմության մեջ չտեսնված անբարո «շոու». Նաիրա Զոհրաբյան Նիկոլի թիվ մեկ խնդիրը ՔՊ պատգամավորներին համախմբված պահելն է. Գառնիկ Իսագուլյան «Ժողովրդավարության բաստիոնում» տեղի ունեցածը հավերժ գրանցվելու է, որպես խայտառակությունն. Ալլա Հակոբյան