Կայացավ պուրակի, հուշատախտակի բացում նվիրված 44-օրյա պատերազմում Ջաբրայիլում անմահացած ԿԱՐԵՆ ԿԱՐԱՊԵՏԻ ՄՆԱՑԱԿԱՆՅԱՆԻ հիշատակին
ՀասարակությունՄայիսի 27-ին, Արթիկ խոշորացված համայնքի Հայրենյաց գյուղի միջնակարգ դպրոցի բակում, կայացավ պուրակի, հուշատախտակի բացման արարողություն, նվիրված Արցախյան 44-օրյա ահաբեկչական պատերազմի ժամանակ Ջաբրայիլում /Ջրական/անմահացած , դպրոցի շրջանավարտ ԿԱՐԵՆ ԿԱՐԱՊԵՏԻ ՄՆԱՑԱԿԱՆՅԱՆԻ հիշատակին։ Միջոցառմանը ներկա էին հերոսի հարազատները, Հայրենյաց վարչական շրջանի ղեկավար Գևորգ Մարտիրոսյանը, ազատամարտիկ Վարդան Կոստանյանը, Հայրենյացի միջնակարգ դպրոցի տնօրեն Մասիս Ոսկանյանը, փոխտնօրեն Էմմա Սալմոյանը, ուսուցչական կոլեկտիվը, աշակերտներ, համագյուղացիներ։ Հուշատախտակի բացման պատիվը տրվեց Կարենի հայրիկին Կարապետ Մնացականյանին։ Ներկաները պուրակում տնկեցին ծառեր։ Դպրոցի տնօրեն Մասիս Ոսկանյանը, իր ելույթում նշեց. - «Կարեն Մնացականյանը, Հայրենյացի միջնակարգ դպրոցի լավագույն սաներից էր, ուսման մեջ աչքի էր ընկնում բարձր առաջադիմությամբ, հատկապես մաթեմատիկա շատ լավ գիտեր, շատ էր սիրում խնդիրներ լուծել, շատ շուտ էր տրամաբանում։ Այսօրվանից այս պուրակը կկրի մեր դպրոցի շրջանավարտ Կարեն Մնացականյանի անունը, այն բոլորիս համար կդառնա սուրբ վայր։ Կարենը, լինելով ընդամենը 2 ամսվա զինծառայող, հանուն մեզ չխնայեց ամենաթանկը, իր կյանքը, մենք պարտավոր ենք միշտ հիշել նրան, խոնարհվել»։Կարեն Կարապետի Մնացականյանը ծնվել է 2002 թվականի փետրվարի 10-ին, Հայրենյաց գյուղում ։Սովորել է ծննդավայրի միջնակարգ դպրոցում։ 9-րդ դասարանը ավարտելուց հետո, ընդունվել է Գյումրիի թիվ 3 Արհեստագործական ուսումնարանը, ոսկերչական բաժին։ Դասերից հետո Կարենը շտապում էր գյուղ, որտեղ իրենց տան մոտակայքում, հայրիկի և իր կառուցած արհեստանոցում, շարունակում էր կերտել արվեստի յուրահատուկ գործեր, գեղեցիկ մատանիներ, վզնոցներ էր պատրաստում։ Նա շատ թասիբիվ երիտասարդ էր։ Տան ավագ զավակն էր, ունի քույր ու երկու եղբայր։ Ուսումնարանը ավարտելուց հետո, Գյումրիի Ավտոդպրոցում սերտեց նաև մեքենավարության դասերը ու որպես վարորդ զորակոչվեց Հայոց բանակ հայրենիքին սրբազան պարտքը տալու։ Ծառայում էր Դիլիջանում, որպես 2-րդ ՌՀԴՆ-ի կառավարման դասակի վարորդ - ռադիոհեռախոսավար։ 2020 թվականի սեպտեմբերի 27-ին, Ադրբեջան-թուրքական սանձազերծած ահաբեկչական պատերազմի ժամանակ, շարքային Մնացականյանը զորամասի կազմի մեջ ընդգրկված է եղել Արցախյան Հարավային հատվածի պաշտպանությունում, մասնավորապես դիվիզիոնի կառավարման դասակի կազմով, զբաղեցրել են դիվիզիոնի հրամանատարական դիտակետը, կատարել են դիտարկում, վարել հրետանային հետախուզությունը, սպասարկել և կրակաճշտում կատարել հրետանու կրակը։ Մարտական գործողությունների ժամանակ, ցուցաբերելով սառնասրտություն և մասնագիտական բարձր վարպետություն, հաջողությամբ իրականացրել է դիտակետի անձնակազմի տեղափոխումը հետախուզության վարման շրջաններ, անձամբ կատարել է հրետանային հետախուզություն և ունեցավ մասնակցություն գնդի կրակի կառավարմանը։ Ցավոք, հոկտեմբերի 13-ին, ժամը 15։00-ի սահմաններում, հակառակորդի անօդաչու թռչող սարքի հարվածից Ջրականում, Կարենը, մարտական ընկերների հետ միասին, ստանալով կյանքի հետ անհամատեղելի վնասվածքներ, ընկավ հերոսի մահով, բռնելով հավերժի ճամփան։ Հետմահու պարգևատրվել է «Մարտական ծառայության» մեդալով։ Հայրենյացի Մշակույթի տան պարի խումբը անվանակոչվել է Կարեն Մնացականյանի անվամբ։ Հավերժ փառք, մեր բոլոր հերոսներին ։
Պատրաստեց ՀՈՎՀԱՆՆԵՍ ՍԱՐԳՍՅԱՆԸ