Կարեւորը նվիրումն է. ինչպես է պատկերացնում օրենսդրական աշխատանքը միջնակարգ կրթությամբ ՔՊ-ական նորընտիր պատգամավորը

ԱԺ իշխող «Քաղաքացիական պայմանագիր» խմբակցության պատգամավոր Անուշ Բեղլոյանը մանդատը վայր է դրել` նոր պաշտոնի անցնելու պատճառով: Նա ընտրվել է Մրցակցության պաշտպանության հանձնաժողովի անդամ: Իսկ խորհրդարանում Բեղլոյանին կփոխարինի «Իմ քայլը» խմբակցության ավագանու անդամ ԳԱՅԱՆԵ ԵՂԻԱԶԱՐՅԱՆԸ:

Ով է նա եւ ինչ մասնագիտություն ունի, ուշագրավ մանրամասներ ենք պարզել կենսագրությունից: Այսպիսով` կրթության վերաբերյալ միայն հայտնի է, որ 1982-1992թթ. սովորել է Երեւանի թիվ 175 միջնակարգ դպրոցում: Այնուհետեւ անցել է աշխատանքի նախ Երեւանի Հաստոցաշինական գործարանին կից գործող բնական քարերի արտադրամասում, ապա «Նարեկ» լիակատար տնտեսական ընկերությունում, այնուհետեւ` «Նարեկ Տոպազ» ՍՊԸ-ում` որպես որակի պատասխանատու:

Կենսագրության մեջ Գ. Եղիազարյանը հատուկ նշել է, որ 2013թ.-ից մասնակցել է քաղաքական եւ քաղաքացիական տարբեր միջոցառումների ու ակցիաների, վարել է ակտիվ քաղաքացիական կյանք: Իսկ 2015թ. մայիսի 30-ից «Քաղաքացիական պայմանագիր» կուսակցության հիմնադիր անդամ է: 2016-2018թ. աշխատել է «Գասպար տուր» տուրիստական ընկերությունում, իսկ 2018թ. հունիսից աշխատում է «Քաղաքացիական պայմանագիր» կուսակցության «Վերադարձի» հիմնադրամում՝ որպես Աջափնյակի գրասենյակի քարտուղար: 2018 թվականի սեպտեմբերի 23-ին կայացած Երեւանի ավագանու արտահերթ ընտրությունների արդյունքում «Իմ քայլը» կուսակցությունների դաշինքի ընտրական ցուցակով ընտրվել է Երեւանի ավագանու անդամ: Ամուսնալուծված է, ունի երկու երեխա:
Ինչպես է պատկերացնում օրենսդրական աշխատանքը ՔՊ-ական նորընտիր պատգամավորը, «Իրավունքը» պարզեց հենց նրանից` մեկ անգամ եւս ճշտելով, թե արդյոք իր կենսագրության մեջ կրթության մասին տեղեկությունը լիարժեք է:

«Կրթության մասին ոչինչ չկա, որովհետեւ կիսատ եմ թողել, թերի է: Դրա համար իմաստ չկար նշել կենսագրության մեջ: Առհասարակ քաղաքականության մեջ, կոնկրետ ԱԺ-ում եւ նաեւ ավագանիում այդքան էլ կարեւոր չէ, օրենքով էլ չկա ամրագրված, որ պետք է մասնագիտացված կրթություն ունենաս: Քաղաքական մարմին է ե՛ւ ավագանու ինստիտուտը, ե՛ւ Ազգային ժողովը, ես էլ քաղաքականությամբ եմ զբաղվում ու, բնականաբար, սա չի խոչընդոտի իմ աշխատանքին: Այսօր շատուշատ մարդիկ, ովքեր ունեն ծավալուն կենսագրություն, կրթական չգիտեմ ինչ ցենզ, չեն կարողանում անել ինչ որ իրենք պարտավոր են անել: Այստեղ կարեւորը նվիրումն է եւ սթափ դատողությունը, որով կարողանաս առաջնորդվել` ի շահ պետության եւ ժողովրդի», - պնդեց Եղիազարյանը:

ՀՐԱՆՏ ՍԱՐԱՖՅԱՆ

Այս թեմայով Էս մարդը ներքին ցեղասպանություն է իրականացնում. Գեւորգ Պետրոսյան Գալու է հատուցման պահը, վախեցե՛ք Աստծո պատժից. ՀՀ վաստակավոր արտիստ Արցախը տվեցինք, արդյոք Հայաստանը պաշտպանված է. Թագուհի Թովմասյան Եվրոպան ասեց՝ հոպ. Արթուր Խաչատրյան Կառավարվող վարձկանների մի ոհմակ հարձակվել է Բագրատ Սրբազանի վրա՝ փորձելով նրան պիտակավորել. Լիլիթ Գալստյան