5 տոկոս՝ սեփական հաշիվդ ռուբլով համալրելու համար
Հասարակություն«Իրավունքին» դիմած քաղաքացին ուշագրավ դժգոհություն հայտնեց կապված «Ինեկոբանկի» հետ: Քաղաքացու ընկերությունը առեւտրային հարաբերություններ ունի Ռուսաստանի հետ, եւ գործարքներ է իրականացնում մասնավորապես այդ բանկի միջոցով: Եվ ահա, հերթական գործարքի համար ընկերության հաշվից ռուբլով փոխանցում կատարելու կարիք կա: Ձեռք բերելով ռուբլի, քաղաքացին ցանկանում է այն մուտքագրել բանկում ընկերության հաշվին՝ փոխանցում կատարելու համար: Բայց ահա պարզվում է, որ սեփական հաշվին գումար մուտքագրելու համար պետք է բանկին հավելյալ 5 տոկոսի չափով գումար մուծի: Այն դեպքում, երբ այլ արժույթներով նման որեւէ պահանջ չկա:
Առաջին հայացքից իրավիճակն աբսուրդ է. բանկի գումարներն առաջանում են հենց նման մուտքագրումներից, փոխանցումներից, մի խոսքով՝ հաճախորդների ֆինանսական շարժից: Իսկ ավելորդ գումար պահանջելը կարող է բանկին վնաս դառնալ, քանի որ քաղաքացին պարզապես կարող է հրաժարվել բանկլից եւ այլ կերպ իր գործարքը կատարել: Բայց ոչ, պահանջում են նման գումար:
Փաստը, որ խոսքը միայն ռուբլու մասին է, պարզ ակնարկ է, որ այստեղ գործ ունենք նաեւ քաղաքականության հետ: Այսինքն, եթե բանկը նման քայլի է գնում՝ անգամ սեփական վնասի հեռանկարն աչքի առաջ ունենալով, դա պետք է, որ անի միայն հանձնարարականի դեպքում: Առավել եւս, որ ռուբլու հետ կապված խնդիրներ միայն այս բանկում չէ, որ կան: Շատ ավելի լուրջ խնդիրներ են առաջացել գործնականում բոլոր վճարային համակարգերում, այդ թվում՝ էլեկտրոնային: Որոշ դեպքերում ռուբլային գործարքներ առհասարակ չեն արվում, կան դեպքեր, որ արվում են աբսուրդի հասնող միջնորդավճարներով:
Վերջապես, երբ նայում ենք ռուբլու փոխարժեքի այն վիճակին, որն առկան է մեր բանկերում, պատկերն էլ ավելի ցայտուն է դառնում: Այսպես, կան բանկեր, որտեղ տրամաբանական պատկեր կա. ռուբլին (հրապխարակման պահին) գնվում է մոտ 7.6 դրամով եւ վաճառվում մոտ 8-8.1-ով, ինչը համահունչ է արտաքին բորսաներում ձեւավորված հաշվարկային փոխարժեքին: Սակայն բազում այլ դեպքերում գնվում է մոտ 7.2 դրամով եւ վաճառվում՝ 8.2-8.25-ով: 1 դրամ կամ 15 տոկոսի հասնող տարբեերություն, այն դեպքում, երբ դոլարի եւ եվրոյի համար այդ տարբերությունը 1 տոկոսանոց տրամաբանության մեջ է:
Այսպես շարունակ, ռուբլուն ոչ քաղցր աչքով նայելու այլ օրինակներ եւս կարելի է բերել: Եվ պարզ հարց՝ իսկ ՌԴ-ին դաշնակից համարող մեր կառավարությունն անտեղյա՞կ է այս իրավիճակից, մասնավորապես, որ փոխանցման համար հավելյալ 5 տոկոս պահանջելը, ըստ էության, հարված է ՌԴ-ի հետ տնտեսական հարաբերություններին: Հարված է նաեւ հայաստանյան սպառողին, քանի որ 5 տոկոս ավել վճարելով, տնտեսվարողը ստիպված է լինելու 5 տոկոսով բարձրացնել իր ապրանքի գինը...
Իսկ թե ինչու են այսպես վարվում, դեռ կփորձենք պարզել հենց նույն բանկից: