Ակնհայտ է, որ հայկական կողմը շարժվում է Ադրբեջանի օրակարգով

ՀՀ հատուկ հանձնարարություններով դեսպան Էդմոն Մարուքյանը օրեր առաջ  ներկայացրեց Հայաստանի  կողմից ի պատասխան Ադրբեջանի 5 առաջարկությունների  ներկայացված 6 կետերը։ Մասնավորապես, նա նշել է, որ հայկական կողմն իր պատասխան նամակում ընդգծել է, որ Հայաստանի Հանրապետությունը Ադրբեջանից տարածքային պահանջ չունի:

Մյուս կետով հայկական կողմը նշել է, որ Հայաստանի համար հիմնարար են Լեռնային Ղարաբաղի հայերի անվտանգության երաշխավորման, նրանց իրավունքների և ազատություների հարգման, ինչպես նաև Լեռնային Ղարաբաղի կարգավիճակի վերջնական որոշման հարցերը:

Ներկայացնելով հաջորդ կետը, Մարուքյանը նշել է. «Հայկական կողմը կարևոր է համարում Ադրբեջանի Հանրապետության նախագահի, ՀՀ վարչապետի և ՌԴ նախագահի նոյեմբերի 9-ի, հունվարի 11-ի, նոյեմբերի 26-ի հայտարարություններում ամրագրված պարտավորությունները, որի մեջ շեշտվում է գերիների վերադարձը, կոմունիկացիաների բացումը: Այսինքն՝ այս մասով մենք շարունակում ենք առաջ տանել մեր ստանձնած պարտավորությունները»: Հայկական կողմը, ըստ Մարուքյանի, իր պատասխան առաջարկություններով պատրաստակամություն է հայտնել սկսել խաղաղության և հարաբերությունների կարգավորման պայմանագիր կնքել Ադրբեջանի և Հայաստանի միջև միջպետական հարաբերությունների հաստատման համար՝ ՄԱԿ-ի կանոնադրության, Քաղաքացիական և քաղաքական իրավունքների միջազգային դաշնագրի և Հելսինկյան եզրափակիչ ակտի հիման վրա:

Այդ թեմայի մասին Iravunk.com-ը զրուցել է քաղաքագետ  Հրանտ Մելիք Շահնազարյանի հետ։

 Քաղաքագետն անդրադառնալով  այդ 6 կետերին ասաց․ «Իմ կարծիքն այն է, որ Հայաստանը որևէ կերպ չի պատասխանել Ադրբեջանին, նախ սկսենք նրանից, որ որևէ 6 կետ գոյություն չունի և  այնտեղ ընդամենը 6 նախադասություն է որոնք համապատասխանում են Ադրբեջանի պահանջներին և այնտեղ  ուրիշ ոչինչ չկա։ Ակնհայտ է, որ հայկական կողմը շարժվում է Ադրբեջանի օրակարգով և որևէ այլ պահանջ հայկական կողմից չկար և միայն դա էր պատճառը, որ այդ ամենը ոչ թե կետ առ կետ հրապարակվել է ոնց որ հարկն է, այլև դա ուղարկել են Մարուքյանին, որ ինքը փորձի ներկայացնել դա որպես առաջարկներ  ինչը փորձել է անել Մարուքյանը  բայց  շատ անհաջող, որովհետև ակնհայտ է, որ Հայաստանը վճռական պատասխան Ադրբեջանին չի ունեցել»։ Անդրադառնալով  ՀԱՊԿ երկրների առաջնորդների հանդիպման ժամանակ վարչապետի ելույթին քաղաքագետն ասաց․ «Վարչապետը գնացել էր այնտեղ, փորձում էր անել հայտարարություններ, որոնցով փորձում էր ցույց տալ, որ պաշտպանում է հայկական շահը, բայց եթե հաշվի առնենք այն փաստը, որ Հայաստանը ժամանակին պատվիրակ չի ունեցել և այդ դիմումն էլ նախապես չի նախապատչաստել դիվանագիտական աշխատանք չի տարել, որ այդ օգնությունը լինի հիմա  դրանից խոսելը ընդամենը Հայաստանի ներքաղաքական խնդիրները հարթելու միջոց է»։

Սոնա Գիշյան