Համախմբում կլինի, եթե «Առանց Նիկոլ Հայաստանը» դառնա. «Հանցագործները` նախկին, ներկա, ապագա պետք է պատժվեն», մենակ Նիկոլով չի.Սերոբ Գասպարյան

Ինչո՞ւ հասարակությունը ի վերջո չի համախմբվում Ֆրանսիայի հրապարակում հարցի պատասխանը փորձեցինք ստանալ «Սեւ հովազ» ջոկատի լեգենդար հրամանատար Ռուստամ Գասպարյանի եղբայր՝ Սերոբ Գասպարյանից, ով նկատեց.

-Այդ հարցը պետք է տաք Ֆրանսիայի հրապարակում հավաքվողներին, ես «Ազատության» հրապարակում եմ: Թե ինչու չի համախմբվում ժողովուրդը պատճառը շատ պարզ է` ժողովրդի զգալի հատվածը վստահություն չունի Ֆրանսիայի հրապարակում գտնվող առաջնորդների նկատմամբ: Մարդիկ չեն վստահում, չեն հավատում, որովհետեւ տեսել են, այսպես ասած, խմել են այդ հրապարակում կանգնած լիդերների, թթուն:

-Պարոն Գասպարյան, ինչո՞ւ, օրինակ Ձեր շուրջը չեն հավաքվում:

- Ես չեմ կանչում մարդկանց, կոչ չեմ անում, որ գան մեր մեր կողքը կանգնեն:

-Այդ դեպքում, ինչո՞ւ եք դուրս եկել «Ազատության» հրապարակ:

-Շփվում ենք ժողովրդի հետ, ուզում ենք հասկանալ ազգը ինչ ապագա է տեսնում:

-Այսինքն հասարակության տրամադրություննե՞րն եք շոշափում ընդամենը:

-Առայժմ, այո:

-Պարոն Գասպարյան, «Դիմարության» շարժման առաջնորդները, համենայնդեպս հայտարարում են, որ չկա որեւէ կուսակցական շահ, որ նպատակը մեկն է` «առանց Նիկոլ Հայաստան»: Ինչո՞ւ չեք միանում նրանց:

-Հավատա՞մ, որ չկա կուսակցական շահ:

-Դե իրենք են ասում:

-Իրենք շատ բան են ասում, իրենք, որ իշխանության էին` էլի շատ բաներ էին ասում, խոստումներ տալիս: Այ, երբ ինձ մոտ հավատ ներշնչի նրանց խոսքեր, ես ինքս էլ իմ հերթին կոչ կանեմ, որ միանան: Ֆրանսիայի հրապարակի ժողովրդի պահանջը արդար է, իևենք բոլորը մեր ժողովուրդն են, բայց ովքեր են ելույթ ունենում` Դուք տեսնում եք:  Գիտեք, ես կհավատայի, երբ նրանց կարգախոսը մի փոքր լրամշակվեր, այն է` ոչ թե «Առանց Նիկոլ Հայաստան», այլ այս կերպ, որ հանցագործները` նախկին, ներկա, ապագա պետք է պատժվեն, մենակ Նիկոլով չի պրծնելու ամեն ինչ: 

Ես մի բանում եմ վստահ, որ Փաշինյանը վաղ թե ուշ ոչ թե գանալու է, այլ պատասխան է տալու բոլոր իր արածների համար: Ու ոչ միայն Փաշինյանը, այլ բոլոր նրանք, ովքեր նպաստել են պատերազմի նման արդյունքներին, ովքեր նպաստել երկրի կործանմանը, պետք է պատասխան տան Նիկոլի հետ միասին:

-Փաշինյանը ասաց, որ մարտերը Շուշիի համար են եղել:

-Ես Փաշինյանի ոչ մի խոսքին չեմ հավատում, ինքը խաբելով եկավ, խաբելով էլ մնաց: Ինքը էսօր մի բան է ասում, վաղը` ուրիշ: Շուշիի համար, չէ մի...Շուշիի հարց չի քննարկվել երբեւիցէ, Շուշին էլ, Հադրութն էլ սկուտեղի վրա հանձնել են:

Զրույցը` ԻԼՈՆԱ ԱԶԱՐՅԱՆԻ